Infosys Hiring: ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನಕ್ಕೆ ಜಾಗತಿಕವಾಗಿ ಬೇಡಿಕೆ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ, ಭಾರತದ ಎರಡನೇ ಅತಿದೊಡ್ಡ ಐಟಿ ಸಂಸ್ಥೆಯಾದ ಇನ್ಫೋಸಿಸ್ (Infosys), 2027ನೇ ಹಣಕಾಸು ವರ್ಷದಲ್ಲಿ ಸುಮಾರು 20,000 ಹೊಸ ಪದವೀಧರರನ್ನು (Freshers) ನೇಮಿಸಿಕೊಳ್ಳುವುದಾಗಿ ಘೋಷಿಸಿದೆ.
ಸ್ವಿಟ್ಜರ್ಲೆಂಡ್ನ ದಾವೋಸ್ನಲ್ಲಿ ನಡೆಯುತ್ತಿರುವ ವಿಶ್ವ ಆರ್ಥಿಕ ವೇದಿಕೆಯ (WEF) ವಾರ್ಷಿಕ ಸಭೆಯ ವೇಳೆ ಈ ಮಾಹಿತಿಯನ್ನು ಹಂಚಿಕೊಂಡಿರುವ ಸಿಇಒ ಸಲೀಲ್ ಪರೇಖ್, “ಏಪ್ರಿಲ್ 1, 2026 ರಿಂದ ಮಾರ್ಚ್ 31, 2027 ರ ಅವಧಿಯಲ್ಲಿ 20,000 ಪದವೀಧರರನ್ನು ನೇಮಿಸಿಕೊಳ್ಳುವ ಯೋಜನೆ ಈಗಾಗಲೇ ಸಿದ್ಧವಾಗಿದೆ,” ಎಂದು ತಿಳಿಸಿದ್ದಾರೆ.
ಎಐ ತಂತ್ರಜ್ಞಾನದಿಂದ ಹೆಚ್ಚಿದ ಬೇಡಿಕೆ
ವಿಶ್ವದಾದ್ಯಂತ ಹಲವು ತಂತ್ರಜ್ಞಾನ ಕಂಪನಿಗಳು ಉದ್ಯೋಗ ಕಡಿತ (Layoffs) ಮಾಡುತ್ತಿರುವ ಬೆನ್ನಲ್ಲೇ ಇನ್ಫೋಸಿಸ್ನ ಈ ನಿರ್ಧಾರ ಉದ್ಯೋಗಾಕಾಂಕ್ಷಿಗಳಿಗೆ ಹೊಸ ಭರವಸೆ ಮೂಡಿಸಿದೆ. ಸಾಂಪ್ರದಾಯಿಕ ಐಟಿ ಸೇವೆಗಳಿಗಿಂತ ಹೆಚ್ಚಾಗಿ, ಕೃತಕ ಬುದ್ಧಿಮತ್ತೆ ಆಧಾರಿತ ಸಾಫ್ಟ್ವೇರ್ ಅಭಿವೃದ್ಧಿ, ಗ್ರಾಹಕ ಸೇವೆ ಮತ್ತು ಹಳೆಯ ಅಪ್ಲಿಕೇಶನ್ಗಳ ಆಧುನೀಕರಣದಂತಹ ಕ್ಷೇತ್ರಗಳಲ್ಲಿ ಕಂಪನಿ ಹೊಸ ಅವಕಾಶಗಳನ್ನು ಕಾಣುತ್ತಿದೆ.
- ಪ್ರಸಕ್ತ ಸಾಲಿನ ನೇಮಕಾತಿ: 2026ರ ಆರ್ಥಿಕ ವರ್ಷದ ಮೊದಲ 9 ತಿಂಗಳಲ್ಲೇ ಇನ್ಫೋಸಿಸ್ 18,000 ಪದವೀಧರರನ್ನು ನೇಮಿಸಿಕೊಂಡಿದೆ. ಮಾರ್ಚ್ 2026ರ ಒಳಗೆ ಈ ಸಂಖ್ಯೆ 20,000 ತಲುಪುವ ಗುರಿ ಇದೆ.
- ಬೃಹತ್ ವೇತನದ ಆಫರ್: ಎಐ ಮತ್ತು ವಿಶೇಷ ತಾಂತ್ರಿಕ ಕೌಶಲ್ಯ ಹೊಂದಿರುವ ಪ್ರತಿಭೆಗಳನ್ನು ಸೆಳೆಯಲು ಕಂಪನಿಯು ಆಯ್ದ ಹುದ್ದೆಗಳಿಗೆ ವಾರ್ಷಿಕ ₹21 ಲಕ್ಷದವರೆಗೆ ಆಕರ್ಷಕ ವೇತನ ಶ್ರೇಣಿಯನ್ನು ನೀಡುತ್ತಿದೆ.
- ಗ್ರಾಹಕರ ಒಲವು: ಇನ್ಫೋಸಿಸ್ನ ಟಾಪ್ 25 ಹಣಕಾಸು ಸೇವಾ ಗ್ರಾಹಕರಲ್ಲಿ 15 ಕಂಪನಿಗಳು ಇನ್ಫೋಸಿಸ್ ಅನ್ನು ತಮ್ಮ ‘ಎಐ ಪಾಲುದಾರ’ (AI Partner) ಆಗಿ ಆಯ್ಕೆ ಮಾಡಿಕೊಂಡಿವೆ. ಇವು ಕೇವಲ ಪ್ರಯೋಗಗಳಲ್ಲದೆ ಪೂರ್ಣ ಪ್ರಮಾಣದ ಪ್ರಾಜೆಕ್ಟ್ಗಳಾಗಿವೆ ಎಂದು ಪರೇಖ್ ತಿಳಿಸಿದ್ದಾರೆ.
ಜಿಯೋ, ಏರ್ಟೆಲ್ ಬಳಕೆದಾರರಿಗೆ ಬಿಗ್ ಶಾಕ್ : ರೀಚಾರ್ಜ್ ದರ ಶೀಘ್ರದಲ್ಲೇ ಮತ್ತಷ್ಟು ಏರಿಕೆ
ಎಐ ತಂತ್ರಜ್ಞಾನದಿಂದ ಕೆಲವು ಸಾಂಪ್ರದಾಯಿಕ ಕೆಲಸಗಳ ವ್ಯಾಪ್ತಿ ಕುಗ್ಗುತ್ತಿದ್ದರೂ (Compression), ಹೊಸ ರೀತಿಯ ಉದ್ಯೋಗಗಳ ಸೃಷ್ಟಿಯು ಅದಕ್ಕಿಂತ ವೇಗವಾಗಿ ನಡೆಯುತ್ತಿದೆ ಎಂದು ಕಂಪನಿ ಅಭಿಪ್ರಾಯಪಟ್ಟಿದೆ. ಅಮೆರಿಕದ ಆರ್ಥಿಕತೆಯ ಬೆಳವಣಿಗೆಯು ತಂತ್ರಜ್ಞಾನ ಹೂಡಿಕೆಗೆ ಪೂರಕವಾಗಿರಲಿದ್ದು, ಮುಂಬರುವ ವರ್ಷಗಳಲ್ಲಿ ಐಟಿ ಕ್ಷೇತ್ರಕ್ಕೆ ಹೊಸ ಚೈತನ್ಯ ಸಿಗುವ ನಿರೀಕ್ಷೆಯಿದೆ.
