ಇಂದಿನ ಡಿಜಿಟಲ್ ಜಗತ್ತಿನಲ್ಲಿ ಸ್ಮಾರ್ಟ್ಫೋನ್ ನಮ್ಮ ಜೀವನದ ಅವಿಭಾಜ್ಯ ಅಂಗವಾಗಿದೆ ನಿಜ. ಆದರೆ, ಅದೇ ಸ್ಮಾರ್ಟ್ಫೋನ್ ನಮ್ಮ ಅರಿವಿಲ್ಲದೆಯೇ ನಮ್ಮ ಖಾಸಗಿ ಬದುಕಿಗೆ ಕನ್ನ ಹಾಕುವ ಅಪಾಯವೂ ಇರುತ್ತದೆ. ವಿಶೇಷವಾಗಿ ನೀವು ನಿಮ್ಮ ಸಂಗಾತಿಯೊಂದಿಗೆ (Partner) ಅತ್ಯಂತ ಖಾಸಗಿ ಸಮಯವನ್ನು ಕಳೆಯುತ್ತಿರುವಾಗ ಫೋನ್ನ ಕೆಲವು ಸೆಟ್ಟಿಂಗ್ಗಳು ಆನ್ ಆಗಿದ್ದರೆ, ನಿಮ್ಮ ಪ್ರೈವೆಸಿ ಮಣ್ಣು ಪಾಲಾಗಬಹುದು!
ಹೌದು, ಸೈಬರ್ ಭದ್ರತಾ ತಜ್ಞರ ಪ್ರಕಾರ, ಸ್ಮಾರ್ಟ್ಫೋನ್ನ ಕೆಲವು ಡೀಫಾಲ್ಟ್ ಸೆಟ್ಟಿಂಗ್ಗಳು ನಿಮ್ಮ ವೈಯಕ್ತಿಕ ಮಾಹಿತಿ, ಧ್ವನಿ ಹಾಗೂ ಫೋಟೋಗಳನ್ನು ಲೀಕ್ ಮಾಡುವ ಸಾಧ್ಯತೆ ಇರುತ್ತದೆ. ಹಾಗಾದರೆ ಪ್ರೈವೇಟ್ ಟೈಮ್ನಲ್ಲಿ ಸುರಕ್ಷತೆಯ ದೃಷ್ಟಿಯಿಂದ ಆಫ್ ಮಾಡಬೇಕಾದ ಆ ಪ್ರಮುಖ ಸೆಟ್ಟಿಂಗ್ಸ್ ಯಾವುವು? ಇಲ್ಲಿದೆ ಕಂಪ್ಲೀಟ್ ಗೈಡ್.
1. ವಾಯ್ಸ್ ಅಸಿಸ್ಟೆಂಟ್ ಆಫ್ ಮಾಡಿ (Google Assistant / Siri)
ನಿಮ್ಮ ಫೋನ್ನಲ್ಲಿ ‘Hey Google’ ಅಥವಾ ‘Hey Siri’ ವೈಶಿಷ್ಟ್ಯಗಳು ಯಾವಾಗಲೂ ಆನ್ ಆಗಿದ್ದರೆ ಎಚ್ಚರ! ಇವು ನಿಮ್ಮ ಧ್ವನಿ ಆಜ್ಞೆಗಳನ್ನು (Voice Commands) ಆಲಿಸಲು ಫೋನ್ನ ಮೈಕ್ರೋಫೋನ್ ಅನ್ನು 24 ಗಂಟೆಯೂ ಆಕ್ಟಿವ್ ಆಗಿಟ್ಟಿರುತ್ತವೆ. ನೀವು ಪಾರ್ಟ್ನರ್ ಜೊತೆ ಖಾಸಗಿಯಾಗಿ ಮಾತನಾಡುವಾಗ ಇದು ಬ್ಯಾಕ್ಗ್ರೌಂಡ್ನಲ್ಲಿ ಧ್ವನಿ ರೆಕಾರ್ಡ್ ಮಾಡಿಕೊಳ್ಳುವ ಅಪಾಯವಿರುತ್ತದೆ. ಆದ್ದರಿಂದ ಪ್ರೈವೇಟ್ ಟೈಮ್ನಲ್ಲಿ ಇದನ್ನು ಆಫ್ ಮಾಡುವುದು ಬೆಸ್ಟ್.
2. ಮೈಕ್ರೋಫೋನ್ ಮತ್ತು ಕ್ಯಾಮೆರಾ ಪರ್ಮಿಷನ್ ಚೆಕ್ ಮಾಡಿ
ನಾವು ಇನ್ಸ್ಟಾಲ್ ಮಾಡುವ ಬಹುತೇಕ ಆ್ಯಪ್ಗಳು ಅಗತ್ಯವಿಲ್ಲದಿದ್ದರೂ ಕ್ಯಾಮೆರಾ ಮತ್ತು ಮೈಕ್ರೋಫೋನ್ ಆಕ್ಸೆಸ್ ಕೇಳುತ್ತವೆ.
- ತಕ್ಷಣ ನಿಮ್ಮ ಫೋನ್ನ Settings > Privacy > Permission Manager ಗೆ ಹೋಗಿ.
- ಸೋಶಿಯಲ್ ಮೀಡಿಯಾ ಅಥವಾ ಇತರೆ ಆ್ಯಪ್ಗಳಿಗೆ ನೀಡಿರುವ ಮೈಕ್ರೋಫೋನ್ ಮತ್ತು ಕ್ಯಾಮೆರಾ ಪರ್ಮಿಷನ್ ಅನ್ನು ಪರಿಶೀಲಿಸಿ, ಅನಗತ್ಯ ಆ್ಯಪ್ಗಳಿಗೆ ಇದನ್ನು ಡಿನಾಯ್ (Deny) ಮಾಡಿ.
3. ಲೊಕೇಶನ್ ಟ್ರ್ಯಾಕಿಂಗ್ ಲಿಮಿಟ್ ಮಾಡಿ (Location Services)
ಹಲವಾರು ಆ್ಯಪ್ಗಳು ನೀವು ಎಲ್ಲಿದ್ದೀರಿ ಎಂಬುದನ್ನು ಪ್ರತಿ ಸೆಕೆಂಡ್ನಲ್ಲೂ ಟ್ರ್ಯಾಕ್ ಮಾಡುತ್ತಿರುತ್ತವೆ. ಯಾವಾಗಲೂ ಲೊಕೇಶನ್ ಆನ್ ಇಡುವ ಬದಲು, ಸೆಟ್ಟಿಂಗ್ಸ್ನಲ್ಲಿ ‘While using the app’ (ಆ್ಯಪ್ ಬಳಸುವಾಗ ಮಾತ್ರ) ಅಥವಾ ‘Ask every time’ (ಪ್ರತಿ ಬಾರಿ ಕೇಳು) ಎಂಬ ಆಯ್ಕೆಯನ್ನು ಸೆಲೆಕ್ಟ್ ಮಾಡಿ. ಇದರಿಂದ ಅನಗತ್ಯವಾಗಿ ನೀವು ಇರುವ ಸ್ಥಳ ಟ್ರ್ಯಾಕ್ ಆಗುವುದು ತಪ್ಪುತ್ತದೆ.
4. ಫೋಟೋ ಗ್ಯಾಲರಿಗೆ ಲಿಮಿಟೆಡ್ ಆಕ್ಸೆಸ್ ನೀಡಿ
ಕೆಲವು ಆ್ಯಪ್ಗಳು ಕೇವಲ ಒಂದು ಫೋಟೋ ಅಪ್ಲೋಡ್ ಮಾಡಲು ಇಡೀ ಗ್ಯಾಲರಿಯ ಪ್ರವೇಶವನ್ನು ಕೇಳುತ್ತವೆ. ಇಂತಹ ಸಂದರ್ಭದಲ್ಲಿ ಆ್ಯಪ್ಗಳಿಗೆ ಇಡೀ ಗ್ಯಾಲರಿ ಆಕ್ಸೆಸ್ ನೀಡುವ ಬದಲು ‘Selected Photos’ ಅಥವಾ ‘Limited Access’ ಆಯ್ಕೆಯನ್ನು ಆರಿಸಿ. ಇದರಿಂದ ನಿಮ್ಮ ವೈಯಕ್ತಿಕ ಫೋಟೋಗಳು ಫೋನ್ನಲ್ಲೇ ಸುರಕ್ಷಿತವಾಗಿರುತ್ತವೆ.
5. ಪಬ್ಲಿಕ್ ವೈ-ಫೈ (Public Wi-Fi) ಸಹವಾಸ ಬೇಡ!
ನೀವು ಪಾರ್ಟ್ನರ್ ಜೊತೆ ಹೋಟೆಲ್ ಅಥವಾ ಹೊರಗಿನ ರೆಸಾರ್ಟ್ಗಳಿಗೆ ಹೋದಾಗ ಅಲ್ಲಿ ಸಿಗುವ ಉಚಿತ ಪಬ್ಲಿಕ್ ವೈ-ಫೈ ಸಂಪರ್ಕಿಸಬೇಡಿ. ಸಾರ್ವಜನಿಕ ವೈ-ಫೈ ನೆಟ್ವರ್ಕ್ಗಳನ್ನು ಹ್ಯಾಕ್ ಮಾಡುವುದು ಸುಲಭ. ನಿಮ್ಮ ಖಾಸಗಿ ಡೇಟಾ ಕದಿಯಲು ಹ್ಯಾಕರ್ಗಳು ಇದನ್ನು ಬಳಸಬಹುದು. ಇಂತಹ ಕಡೆ ನಿಮ್ಮ ಮೊಬೈಲ್ ಡೇಟಾ ಬಳಸುವುದು ಅತ್ಯಂತ ಸುರಕ್ಷಿತ.
ಸ್ಮಾರ್ಟ್ ಟಿಪ್: ಸಂಗಾತಿಯೊಂದಿಗೆ ಗುಣಮಟ್ಟದ ಸಮಯ ಕಳೆಯುವಾಗ ಫೋನ್ ಅನ್ನು ‘Do Not Disturb’ (DND) ಮೋಡ್ಗೆ ಹಾಕುವುದು ಅಥವಾ ಕೆಲಕಾಲ ಆಫ್ ಮಾಡಿಡುವುದು ನಿಮ್ಮ ಪ್ರೈವೆಸಿ ಹಾಗೂ ನೆಮ್ಮದಿ ಎರಡಕ್ಕೂ ಒಳ್ಳೆಯದು.
