ಆರೋಗ್ಯ ಪ್ರಿಯರು ಮತ್ತು ತೂಕ ಇಳಿಸುವ ಪಯಣದಲ್ಲಿರುವವರು ಸಾಮಾನ್ಯವಾಗಿ ಎಣ್ಣೆ ಮತ್ತು ಕರಿದ ಪದಾರ್ಥಗಳಿಂದ ದೂರವಿರಲು ಬಯಸುತ್ತಾರೆ. ಆದರೆ ಪ್ರೋಟೀನ್ ಅಂಶಕ್ಕಾಗಿ ಚಿಕನ್ ಸೇವಿಸುವುದು ಅನಿವಾರ್ಯವಿರುತ್ತದೆ. ಇಂತಹವರಿಗಾಗಿ ಎಣ್ಣೆ ಇಲ್ಲದೆ ಕಡಿಮೆ ಕ್ಯಾಲೊರಿಯಲ್ಲಿ ರುಚಿಕರವಾದ ಚಿಕನ್ ಸವಿಯಲು ಈ ವಿಧಾನ ಸೂಕ್ತವಾಗಿದೆ.
ಜೀರೋ ಆಯಿಲ್ ಚಿಕನ್ ಮಾಡಲು ಬೇಕಾಗುವ ಪದಾರ್ಥಗಳು:
• ಚಿಕನ್: 500 ಗ್ರಾಂ (ಚರ್ಮರಹಿತ / Skinless)
• ಈರುಳ್ಳಿ: 2 (ಸಣ್ಣದಾಗಿ ಹೆಚ್ಚಿದ್ದು)
• ಟೊಮೆಟೋ: 2 (ಪೇಸ್ಟ್ ಅಥವಾ ಕತ್ತರಿಸಿದ್ದು)
• ಶುಂಠಿ-ಬೆಳ್ಳುಳ್ಳಿ ಪೇಸ್ಟ್: 2 ಚಮಚ
• ಮೊಸರು: 2-3 ಚಮಚ (ರುಚಿ ಮತ್ತು ಸಾಫ್ಟ್ನೆಸ್ಗಾಗಿ)
• ಮಸಾಲೆಗಳು: ಅರಿಶಿನ ಪುಡಿ, ಧನಿಯಾ ಪುಡಿ, ಗರಂ ಮಸಾಲ, ಜೀರಿಗೆ ಪುಡಿ ಹಾಗೂ ರುಚಿಗೆ ತಕ್ಕಷ್ಟು ಉಪ್ಪು.
• ಖಾರದ ಪುಡಿ: ಅಗತ್ಯವಿದ್ದಷ್ಟು
• ಹಸಿಮೆಣಸಿನಕಾಯಿ ಹಾಗೂ ಕೊತ್ತಂಬರಿ ಸೊಪ್ಪು
ಜೀರೋ ಆಯಿಲ್ ಚಿಕನ್ ಮಾಡುವ ಸರಳ ವಿಧಾನ
ಮೊದಲಿಗೆ ಚಿಕನ್ ಅನ್ನು ಚೆನ್ನಾಗಿ ತೊಳೆದು, ಅದಕ್ಕೆ ಮೊಸರು, ಶುಂಠಿ-ಬೆಳ್ಳುಳ್ಳಿ ಪೇಸ್ಟ್, ಅರಿಶಿನ, ಉಪ್ಪು ಮತ್ತು ಖಾರದ ಪುಡಿ ಹಾಕಿ ಅರ್ಧ ಗಂಟೆ ಕಾಲ ನೆನೆಸಿಡಿ. ಒಲೆಯ ಮೇಲೆ ಒಂದು ಉತ್ತಮ ಗುಣಮಟ್ಟದ ನಾನ್-ಸ್ಟಿಕ್ ಕಡಾಯಿ ಅಥವಾ ಪ್ರೆಶರ್ ಕುಕ್ಕರ್ ಇಟ್ಟು ಬಿಸಿ ಮಾಡಿ.
ಎಣ್ಣೆ ಬಳಸದೆ, ಸಣ್ಣಗೆ ಹೆಚ್ಚಿದ ಈರುಳ್ಳಿಯನ್ನು ಪಾತ್ರೆಯಲ್ಲಿ ಹಾಕಿ, ಅದು ಗೋಲ್ಡನ್ ಬ್ರೌನ್ ಬಣ್ಣ ಬರುವವರೆಗೆ ಚೆನ್ನಾಗಿ ತಿರುಗಿಸುತ್ತಾ ರೋಸ್ಟ್ ಮಾಡಿ. ಅಗತ್ಯವಿದ್ದರೆ ಸ್ವಲ್ಪ ನೀರು ಸಿಂಪಡಿಸಬಹುದು. ಈರುಳ್ಳಿ ಹದವಾಗಿ ಬೆಂದ ಬಳಿಕ ಟೊಮೆಟೊ ಪೇಸ್ಟ್ ಹಾಗೂ ಉಳಿದ ಮಸಾಲೆ ಪದಾರ್ಥಗಳನ್ನು ಸೇರಿಸಿ, ಮಸಾಲೆ ಹಸಿವಾಸನೆ ಹೋಗುವವರೆಗೆ ಚೆನ್ನಾಗಿ ಬಾಡಿಸಿ.
ಈಗ ಮ್ಯಾರಿನೇಟ್ ಮಾಡಿಟ್ಟಿರುವ ಚಿಕನ್ ಅನ್ನು ಮಸಾಲೆಗೆ ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ. ಪಾತ್ರೆಗೆ ಮುಚ್ಚಳ ಮುಚ್ಚಿ ಕಡಿಮೆ ಉರಿಯಲ್ಲಿ ಚಿಕನ್ ಅನ್ನು ಬೇಯಲು ಬಿಡಿ. ಚಿಕನ್ನಿಂದಲೇ ಸ್ವಾಭಾವಿಕ ನೀರು ಬಿಟ್ಟುಕೊಂಡು ಅದು ಚೆನ್ನಾಗಿ ಬೇಯುತ್ತದೆ. ಚಿಕನ್ ಸಂಪೂರ್ಣವಾಗಿ ಬೆಂದ ಬಳಿಕ ಮೇಲಿಂದ ಸಣ್ಣಗೆ ಹೆಚ್ಚಿದ ಕೊತ್ತಂಬರಿ ಸೊಪ್ಪು ಉದುರಿಸಿ. ಈಗ ಬಿಸಿಬಿಸಿಯಾದ ರುಚಿಕರವಾದ ಜೀರೋ ಆಯಿಲ್ ಚಿಕನ್ ಸವಿಯಲು ಸಿದ್ಧ.
ಜೀರೋ ಆಯಿಲ್ ಚಿಕನ್ ಸೇವನೆಯ ಪ್ರಯೋಜನ:
ಇದು ಕಡಿಮೆ ಕ್ಯಾಲೊರಿ ಹೊಂದಿರುವುದರಿಂದ ವೇಟ್ ಲಾಸ್ ಡಯಟ್ನಲ್ಲಿರುವವರಿಗೆ ಇದು ಬೆಸ್ಟ್ ಪ್ರೋಟೀನ್ ಫುಡ್.
ಯಾವುದೇ ಕೆಟ್ಟ ಕೊಬ್ಬು (Trans Fat / Bad Cholesterol) ಇಲ್ಲದಿರುವುದರಿಂದ ಹೃದಯದ ಆರೋಗ್ಯಕ್ಕೆ ಇದು ತುಂಬಾನೇ ಸುರಕ್ಷಿತ.
ಎಣ್ಣೆಯಂಶವಿಲ್ಲದ ಕಾರಣ ಜೀರ್ಣವಾಗಲು ಸುಲಭವಾಗುತ್ತದೆ ಮತ್ತು ಹೊಟ್ಟೆ ಭಾರ ಎನಿಸುವುದಿಲ್ಲ.
ತೂಕ ಇಳಿಸುವ ಅಥವಾ ಫಿಟ್ನೆಸ್ ಕಾಪಾಡಿಕೊಳ್ಳುವ ನಿರ್ಧಾರದಲ್ಲಿದ್ದರೆ, ನಿಮ್ಮ ಡೈಯಟ್ನಲ್ಲಿ ಈ ಜೀರೋ ಆಯಿಲ್ ಚಿಕನ್ ಅನ್ನು ಸೇರಿಸಿ ಉತ್ತಮ ಫಲಿತಾಂಶ ಪಡೆಯಬಹುದು.