ದೇಶದಲ್ಲಿ ಸಾರ್ವಜನಿಕ ಆರೋಗ್ಯಕ್ಕೆ ದೊಡ್ಡ ಸವಾಲಾಗಿ ಪರಿಣಮಿಸಿರುವ ಡೆಂಗ್ಯೂ ನಿಯಂತ್ರಣಕ್ಕೆ ಭಾರತವು ಮಹತ್ವದ ಹೆಜ್ಜೆಯನ್ನಿಟ್ಟಿದೆ. ಜಪಾನ್ನ ಪ್ರಸಿದ್ಧ ಜಾಗತಿಕ ಔಷಧ ತಯಾರಿಕಾ ಕಂಪನಿಯಾದ 'ಟಕೆಡಾ ಫಾರ್ಮಾಸ್ಯುಟಿಕಲ್ಸ್' ಮತ್ತು ಭಾರತದ ಖ್ಯಾತ 'ಡಾ. ರೆಡ್ಡೀಸ್ ಲ್ಯಾಬೊರೇಟರೀಸ್' ಸಂಸ್ಥೆಗಳು ಜಂಟಿಯಾಗಿ ಭಾರತೀಯ ಮಾರುಕಟ್ಟೆಗೆ 'ಕ್ಯೂಡೆಂಗಾ' ಹೆಸರಿನ ಮೊದಲ ಡೆಂಗ್ಯೂ ನಿಯಂತ್ರಣ ಲಸಿಕೆಯನ್ನು ಪರಿಚಯಿಸಲು ಒಪ್ಪಂದ ಮಾಡಿಕೊಂಡಿವೆ. ಭಾರತೀಯ ಔಷಧ ನಿಯಂತ್ರಣ ಪ್ರಾಧಿಕಾರದಿಂದ ಈಗಾಗಲೇ ಅನುಮೋದನೆ ಪಡೆದಿರುವ ಈ ಲಸಿಕೆಯು, ಪ್ರಸ್ತುತ ಗುಣಮಟ್ಟದ ತಪಾಸಣೆಗಳನ್ನು ಯಶಸ್ವಿಯಾಗಿ ಮುಗಿಸಿಕೊಂಡಿದೆ. ಎಲ್ಲವೂ ಯೋಜನೆಯಂತೆ ನಡೆದರೆ ಮುಂಬರುವ 2027ರ ಮೊದಲಾರ್ಧದ ವೇಳೆಗೆ ದೇಶದ ಖಾಸಗಿ ಮಾರುಕಟ್ಟೆಗಳಲ್ಲಿ ಸಾರ್ವಜನಿಕರಿಗೆ ಈ ವ್ಯಾಕ್ಸಿನ್ ಮುಕ್ತವಾಗಿ ಲಭ್ಯವಾಗುವ ನಿರೀಕ್ಷೆಯಿದೆ.
ಹೊಸ ಸಹಭಾಗಿತ್ವದ ಅನ್ವಯ ಡಾ. ರೆಡ್ಡೀಸ್ ಸಂಸ್ಥೆಯು ದೇಶದ ಖಾಸಗಿ ಆಸ್ಪತ್ರೆಗಳು ಮತ್ತು ವಿವಿಧ ಹೆಲ್ತ್ಕೇರ್ ನೆಟ್ವರ್ಕ್ಗಳ ಮೂಲಕ ಈ ಲಸಿಕೆಯನ್ನು ಗ್ರಾಹಕರಿಗೆ ವಿತರಿಸುವ ಹಾಗೂ ಪ್ರಚಾರ ಮಾಡುವ ಹಕ್ಕನ್ನು ಪಡೆದುಕೊಂಡಿದೆ. 4 ರಿಂದ 60 ವರ್ಷದೊಳಗಿನ ಯಾವುದೇ ವಯಸ್ಸಿನ ವ್ಯಕ್ತಿಗಳು ಈ ಲಸಿಕೆಯನ್ನು ಪಡೆಯಬಹುದಾಗಿದ್ದು, ವ್ಯಕ್ತಿಗೆ ಈ ಹಿಂದೆ ಡೆಂಗ್ಯೂ ಸೋಂಕು ತಗುಲಿದೆಯೇ ಇಲ್ಲವೇ ಎಂಬುದನ್ನು ಪ್ರತ್ಯೇಕವಾಗಿ ಪರೀಕ್ಷಿಸುವ ಕಡ್ಡಾಯ ನಿಯಮಗಳಿರುವುದಿಲ್ಲ. ಈ ಲಸಿಕೆಯನ್ನು ಒಟ್ಟು ಎರಡು ಡೋಸ್ಗಳಲ್ಲಿ ನೀಡಲಾಗುತ್ತಿದ್ದು, ಇವುಗಳ ನಡುವೆ ಕನಿಷ್ಠ ಮೂರು ತಿಂಗಳ ಕಾಲಾವಕಾಶದ ಅಂತರವಿರಲಿದೆ. ಲಸಿಕೆಯ ಅಂತಿಮ ದರ ನಿಗದಿ ಪ್ರಕ್ರಿಯೆಗಳು ಸದ್ಯ ಸ್ಥಳೀಯ ನಿಯಂತ್ರಕ ಸಂಸ್ಥೆಗಳೊಂದಿಗೆ ಚಾಲ್ತಿಯಲ್ಲಿವೆ.
ವೈದ್ಯಕೀಯ ಸಂಶೋಧನೆಗಳ ಪ್ರಕಾರ, ಕ್ಯೂಡೆಂಗಾ ಲಸಿಕೆಯು ಡೆಂಗ್ಯೂ ಸೋಂಕಿನ ವಿರುದ್ಧ ಶೇಕಡಾ 80.2 ರಷ್ಟು ರಕ್ಷಣಾತ್ಮಕ ಶಕ್ತಿಯನ್ನು ಒದಗಿಸುತ್ತದೆ. ಅಲ್ಲದೆ, ಸೋಂಕು ತಗುಲಿದರೂ ರೋಗಿಗಳು ತೀವ್ರ ನಿಗಾ ಘಟಕ ಅಥವಾ ಆಸ್ಪತ್ರೆಗೆ ದಾಖಲಾಗುವ ಅಪಾಯವನ್ನು ಇದು ಶೇಕಡಾ 90.4 ರಷ್ಟು ಕಡಿಮೆ ಮಾಡುತ್ತದೆ ಎಂದು ಪ್ರಾಯೋಗಿಕ ಪರೀಕ್ಷೆಗಳಿಂದ ದೃಢಪಟ್ಟಿದೆ. ವಿಶೇಷವಾಗಿ ಮುಂಗಾರು ಹಾಗೂ ತದನಂತರದ ಅವಧಿಯಲ್ಲಿ ದೇಶಾದ್ಯಂತ ಈಡಿಸ್ ಸೊಳ್ಳೆಗಳ ಹಾವಳಿಯಿಂದ ಲಕ್ಷಾಂತರ ಜನರು ಡೆಂಗ್ಯೂಗೆ ತುತ್ತಾಗಿ ಆಸ್ಪತ್ರೆ ಸೇರುತ್ತಿದ್ದರು. ಇಂತಹ ಸಂದಿಗ್ಧ ಪರಿಸ್ಥಿತಿಯಲ್ಲಿ ಕ್ಯೂಡೆಂಗಾ ಲಸಿಕೆಯ ಪ್ರವೇಶವು ದೇಶದ ಆರೋಗ್ಯ ವಲಯಕ್ಕೆ ಮತ್ತು ಸಾರ್ವಜನಿಕರಿಗೆ ದೊಡ್ಡ ಆಸರೆಯಾಗಲಿದೆ.