ಮಕ್ಕಳ ಶೀತ - ಕೆಮ್ಮಿನ ಸಿರಪ್​ಗಳ ನಿಯಮಾವಳಿಗಳಲ್ಲಿ ಭಾರೀ ಬದಲಾವಣೆ

ದೇಶದಲ್ಲಿ ಸಣ್ಣ ಮಕ್ಕಳ ಆರೋಗ್ಯ ಸುರಕ್ಷತೆಗೆ ಸಂಬಂಧಿಸಿದಂತೆ ಕೇಂದ್ರ ಆರೋಗ್ಯ ಸಚಿವಾಲಯ ಮತ್ತು ಔಷಧ ನಿಯಂತ್ರಣ ಸಂಸ್ಥೆಯಾದ ಸಿಡಿಎಸ್‌ಸಿಒ (CDSCO) ಅತ್ಯಂತ ಮಹತ್ವದ ಮತ್ತು ಕಠಿಣವಾದ ನಿರ್ಧಾರವನ್ನು ಕೈಗೊಂಡಿದೆ. ಇನ್ಮುಂದೆ ನಾಲ್ಕು ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳಿಗೆ ಶೀತ ಮತ್ತು ಕೆಮ್ಮಿನ ಚಿಕಿತ್ಸೆಗಾಗಿ ಸಾಮಾನ್ಯವಾಗಿ ಬಳಸಲಾಗುವ ನಿರ್ದಿಷ್ಟ ರಾಸಾಯನಿಕ ಸಂಯೋಜನೆಗಳ ಔಷಧಿಗಳನ್ನು ನೀಡಬಾರದು ಎಂದು ಸಂಪೂರ್ಣವಾಗಿ ನಿರ್ಬಂಧಿಸಲಾಗಿದೆ.

ಪ್ರಮುಖವಾಗಿ ಕ್ಲೋರ್ಫೆನಿರಮೈನ್ ಮೆಲೀಯೇಟ್ ಮತ್ತು ಫಿನೈಲೈನ್ ಹೈಡ್ರೋಕ್ಲೋರೈಡ್ ಎಂಬ ಎರಡು ರಾಸಾಯನಿಕ ಮಿಶ್ರಣಗಳನ್ನು ಒಳಗೊಂಡಿರುವ ಸ್ಥಿರ ಡೋಸ್ ಸಂಯೋಜನೆಯ ಸಿರಪ್ ಹಾಗೂ ಡ್ರಾಪ್ಸ್‌ಗಳ ಮೇಲೆ ಈ ಹೊಸ ನಿಯಮವನ್ನು ಜಾರಿಗೊಳಿಸಲಾಗಿದೆ. ದೇಶದ ಪ್ರತಿಯೊಂದು ಔಷಧ ತಯಾರಿಕಾ ಕಂಪನಿಗಳು ತಮ್ಮ ಉತ್ಪನ್ನಗಳ ಪ್ಯಾಕೇಜಿಂಗ್ ಹಾಗೂ ಲೇಬಲ್‌ಗಳ ಮೇಲೆ "ಈ ಔಷಧಿಯನ್ನು 4 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳಿಗೆ ಬಳಸಬಾರದು" ಎಂಬ ಕಡ್ಡಾಯ ಎಚ್ಚರಿಕೆಯ ಸಂದೇಶವನ್ನು ಪ್ರಮುಖವಾಗಿ ಮುದ್ರಿಸಬೇಕು ಎಂದು ಕೇಂದ್ರ ಸರ್ಕಾರವು ಕಟ್ಟುನಿಟ್ಟಿನ ಆದೇಶ ನೀಡಿದೆ.

ವೈದ್ಯಕೀಯ ತಜ್ಞರ ಸಮಿತಿಯ ತನಿಖೆಯ ಪ್ರಕಾರ, ಇಂತಹ ಸಿರಪ್‌ಗಳ ಅತಿಯಾದ ಬಳಕೆಯಿಂದ ಸಣ್ಣ ಮಕ್ಕಳಲ್ಲಿ ಹಠಾತ್ ಹೃದಯ ಬಡಿತದ ಏರುಪೇರು, ತೀವ್ರ ಉಸಿರಾಟದ ತೊಂದರೆ, ಅತಿಯಾದ ತೂಕಡಿಕೆ ಮತ್ತು ಫಿಟ್ಸ್ ಬರುವಂತಹ ಅಪಾಯಕಾರಿ ಅಡ್ಡಪರಿಣಾಮಗಳು ಕಂಡುಬಂದಿವೆ. ಅಲ್ಲದೆ, ಇವು ಮಕ್ಕಳಲ್ಲಿ ಸಾಮಾನ್ಯ ಶೀತವನ್ನು ವಾಸಿ ಮಾಡಲು ಯಾವುದೇ ಗಮನಾರ್ಹ ಪ್ರಯೋಜನವನ್ನು ನೀಡುವುದಿಲ್ಲ ಎಂದು ಸಂಶೋಧನೆಗಳು ಸ್ಪಷ್ಟಪಡಿಸಿವೆ.

ಮಾರುಕಟ್ಟೆಯಲ್ಲಿ ಲಭ್ಯವಿರುವ ಹಲವು ಜನಪ್ರಿಯ ಬ್ರ್ಯಾಂಡ್‌ಗಳ ಸಿರಪ್‌ಗಳು ಈ ನಿಷೇಧದ ವ್ಯಾಪ್ತಿಗೆ ಒಳಪಡಲಿದ್ದು, ಪೋಷಕರು ಇನ್ಮುಂದೆ ಮೆಡಿಕಲ್ ಶಾಪ್‌ಗಳಿಂದ ನೇರವಾಗಿ ತಂದು ಮಕ್ಕಳಿಗೆ ಔಷಧಿ ಕೊಡುವುದನ್ನು ನಿಲ್ಲಿಸಬೇಕಾಗಿದೆ. ಯಾವುದೇ ಕೆಮ್ಮು ಅಥವಾ ಶೀತ ಕಾಣಿಸಿಕೊಂಡರೂ ಸ್ವಯಂ ಚಿಕಿತ್ಸೆ ಮಾಡದೇ, ಸಿರಪ್ ನೀಡುವ ಮುನ್ನ ಅದರ ಭೌತಿಕ ಲೇಬಲ್ ಹಾಗೂ ರಾಸಾಯನಿಕ ಪದಾರ್ಥಗಳನ್ನು ಕಡ್ಡಾಯವಾಗಿ ಪರಿಶೀಲಿಸಬೇಕು. ಸಣ್ಣ ಮಕ್ಕಳ ಸುರಕ್ಷತೆಯ ದೃಷ್ಟಿಯಿಂದ ಕಡ್ಡಾಯವಾಗಿ ಅರ್ಹ ಮಕ್ಕಳ ತಜ್ಞ ವೈದ್ಯರನ್ನು ಸಂಪರ್ಕಿಸಿ ಅವರ ಲಿಖಿತ ಸಲಹೆಯ ಮೇರೆಗೇ ಸುರಕ್ಷಿತ ಪರ್ಯಾಯ ಚಿಕಿತ್ಸೆಗಳನ್ನು ನೀಡುವುದು ಅತ್ಯಗತ್ಯವಾಗಿದೆ.