ಕಡಿಮೆಯಾಗದ ಸಿದ್ದು ಕ್ರೇಜ್​ : ಮಗುವಿಗೆ ಅನ್ನರಾಮಯ್ಯ ಎಂದು ನಾಮಕರಣ

ಬೀದರ್ ಜಿಲ್ಲೆಯ ಹುಮನಾಬಾದ್ ತಾಲ್ಲೂಕಿನ ದುಬಲಗುಂಡಿ ಗ್ರಾಮದಲ್ಲಿ ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರ ಮೇಲಿನ ಅಪಾರ ಅಭಿಮಾನಕ್ಕೆ ಸಾಕ್ಷಿಯಾಗುವಂತಹ ಅಪರೂಪದ ಘಟನೆಯೊಂದು ಜರುಗಿದೆ.

ಇಲ್ಲಿನ ನಿವಾಸಿಯಾದ ಮಾಜಿ ಸೈನಿಕ ರಾಜಪ್ಪ ಪೂಜಾರಿ ಮತ್ತು ಅವರ ಪತ್ನಿ ಅಂಬಿಕಾ ದಂಪತಿ ಸೆಪ್ಟೆಂಬರ್ 29ರಂದು ಜನಿಸಿದ ತಮ್ಮ ಮುದ್ದಾದ ಗಂಡು ಮಗುವಿಗೆ ಅನ್ನರಾಮಯ್ಯ ಎಂದು ನಾಮಕರಣ ಮಾಡುವ ಮೂಲಕ ರಾಜ್ಯದ ಗಮನ ಸೆಳೆದಿದ್ದಾರೆ.

ಈ ವಿಶೇಷ ಹೆಸರಿನ ಹಿಂದೆ ದಂಪತಿಗಳ ದೊಡ್ಡ ಅಭಿಮಾನದ ಕಥೆಯಿದೆ. ಸಿದ್ದರಾಮಯ್ಯ ಅವರು ಮುಖ್ಯಮಂತ್ರಿಯಾಗಿದ್ದ ಅವಧಿಯಲ್ಲಿ ಜಾರಿಗೆ ತಂದ ಬಡವರ ಹಸಿವು ನೀಗಿಸುವ ಅತ್ಯಂತ ಜನಪ್ರಿಯ ಅನ್ನಭಾಗ್ಯ ಯೋಜನೆಯಿಂದ ಪ್ರೇರಿತರಾದ ರಾಜಪ್ಪ ಪೂಜಾರಿ ಅವರು, ಆ ಯೋಜನೆಯ ಹೆಸರಿನ ಅರ್ಧ ಭಾಗವಾದ ಅನ್ನ ಮತ್ತು ಸಿದ್ದರಾಮಯ್ಯ ಅವರ ಹೆಸರಿನ ಕೊನೆಯ ಭಾಗವಾದ ರಾಮಯ್ಯ ಎರಡನ್ನೂ ಜೋಡಿಸಿ ಮಗುವಿಗೆ ಈ ವಿಶಿಷ್ಟ ಹೆಸರನ್ನು ಇಟ್ಟಿದ್ದಾರೆ. ಕೇವಲ ಮೌಖಿಕವಾಗಿ ಅಷ್ಟೇ ಅಲ್ಲದೆ, ಈಗಾಗಲೇ ಮಗುವಿನ ಜನನ ಪ್ರಮಾಣಪತ್ರದಲ್ಲೂ ಇದೇ ಹೆಸರನ್ನು ಅಧಿಕೃತವಾಗಿ ನೋಂದಾಯಿಸಿ ಸರ್ಕಾರದಿಂದ ದಾಖಲೆಯನ್ನು ಪಡೆದುಕೊಂಡಿದ್ದಾರೆ.

ಕುತೂಹಲದ ಸಂಗತಿಯೆಂದರೆ, ಈ ದಂಪತಿಗಳು ಮಗು ಜನಿಸುವ ಮುನ್ನವೇ ಹೆಸರನ್ನು ಅಂತಿಮಗೊಳಿಸಿದ್ದರು. ಒಂದು ವೇಳೆ ತಮಗೆ ಹೆಣ್ಣು ಮಗು ಜನಿಸಿದ್ದರೆ ಪಾರ್ವತಿರಾಮಯ್ಯ ಎಂದು ಹೆಸರಿಡಲು ಮೊದಲೇ ತೀರ್ಮಾನಿಸಿದ್ದರು. ಆದರೆ ಗಂಡು ಮಗು ಜನಿಸಿದ ಕಾರಣ ಮುಂಚಿತವಾಗಿ ಅಂದುಕೊಂಡಂತೆಯೇ ಅನ್ನರಾಮಯ್ಯ ಎಂದು ಹೆಸರಿಟ್ಟಿದ್ದಾರೆ.

ರಾಜ್ಯದ ಬಡ ಜನರ ಹಸಿವನ್ನು ನೀಗಿಸಿದ ಮಹಾನ್ ನಾಯಕನ ಹೆಸರಿನ ನೆರಳಿನಲ್ಲೇ ತಮ್ಮ ಮಗನೂ ಕೂಡ ಸಮಾಜದಲ್ಲಿ ಬೆಳೆದು ದೊಡ್ಡವನಾಗಬೇಕು ಎಂಬ ಉದಾತ್ತ ಆಶಯ ಪೋಷಕರದ್ದಾಗಿದೆ. ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಈ ಅಪರೂಪದ ಅಭಿಮಾನದ ಸುದ್ದಿ ಸಿಕ್ಕಾಪಟ್ಟೆ ವೈರಲ್ ಆಗುತ್ತಿದ್ದು, ಸಾರ್ವಜನಿಕ ವಲಯದಲ್ಲಿ ಭಾರಿ ಪ್ರಶಂಸೆ ವ್ಯಕ್ತವಾಗುತ್ತಿದೆ.