ವನ್ಯಜೀವಿಗಳ ಮುದ್ದಾದ, ಅಚ್ಚರಿಯ ಹಾಗೂ ಭಾವನಾತ್ಮಕ ಕ್ಷಣಗಳು ನೆಟ್ಟಿಗರ ಗಮನ ಸೆಳೆಯುತ್ತಲೇ ಇರುತ್ತವೆ. ಇದೀಗ ಅಂತಹದ್ದೇ ಒಂದು ತಾಯಾನೆ ಮತ್ತು ಮರಿಯಾನೆಯ ನಡುವಿನ ಸುಂದರ ಬಾಂಧವ್ಯ ಸಾರುವ ವಿಡಿಯೋ ಸೋಶಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗುತ್ತಿದೆ.
ವೈರಲ್ ಆಗಿರುವ ಈ ವೀಡಿಯೋದಲ್ಲಿ, ಆನೆ ಮರಿಯೊಂದು ತಂಟೆ ಮಾಡುತ್ತಾ ಓಟಕ್ಕಿಟ್ಟಿದೆ. ಆದರೆ, ಮರಿ ಆನೆ ಓಡುವ ರಭಸಕ್ಕೆ ಎಲ್ಲಾದರೂ ಕೆಳಗೆ ಬಿದ್ದು ಗಾಯ ಮಾಡಿಕೊಳ್ಳುತ್ತದೇನೋ ಎಂಬ ಭಯದಲ್ಲಿದ್ದ ತಾಯಾನೆ, ತಕ್ಷಣವೇ ಚುರುಕಾಗಿ ತನ್ನ ಸೊಂಡಿಲಿನಿಂದ ಮರಿಯಾನೆಯ ಬಾಲವನ್ನು ಗಟ್ಟಿಯಾಗಿ ಹಿಡಿದುಕೊಂಡಿದೆ. ಆ ಮೂಲಕ ಮರಿಯಾನೆ ಬಿದ್ದು ಹೋಗದಂತೆ ಜಾಗರೂಕತೆಯಿಂದ ತಡೆದು ನಿಲ್ಲಿಸಿದೆ.
ತಾಯಿ ತನ್ನ ಮಗುವನ್ನು ಹೇಗೆ ಪ್ರತಿಯೊಂದು ಹೆಜ್ಜೆಯಲ್ಲೂ ರಕ್ಷಿಸುತ್ತಾಳೆ ಎಂಬುದಕ್ಕೆ ಈ ದೃಶ್ಯ ಸಾಕ್ಷಿಯಂತಿದೆ. ಮರಿಯು ಆಟದ ಗುಂಗಿನಲ್ಲಿ ಓಡುತ್ತಿದ್ದರೂ, ತಾಯಿಯ ಕಣ್ಣು ಮಾತ್ರ ಮರಿಯ ಸುರಕ್ಷತೆಯ ಮೇಲೆಯೇ ಇತ್ತು ಎಂಬುದನ್ನು ಈ ವಿಡಿಯೋ ಸ್ಪಷ್ಟವಾಗಿ ತೋರಿಸುತ್ತದೆ.
ಈ ಮುದ್ದಾದ ವಿಡಿಯೋ ವೈರಲ್ ಆಗುತ್ತಿದ್ದಂತೆ ನೆಟ್ಟಿಗರು ಭಾವನಾತ್ಮಕವಾಗಿ ಪ್ರತಿಕ್ರಿಯಿಸುತ್ತಿದ್ದಾರೆ. “ತಾಯಿಯ ಪ್ರೀತಿಗೆ ಯಾವುದೇ ಗಡಿಗಳಿಲ್ಲ, ಮನುಷ್ಯರಾಗಲಿ, ಪ್ರಾಣಿಗಳಾಗಲಿ ತಾಯಿಯ ಮಮತೆ ಒಂದೇ” ಎಂದು ಹಲವರು ಕಾಮೆಂಟ್ ಮಾಡಿದ್ದಾರೆ.ಆನೆಗಳು ಅತ್ಯಂತ ಬುದ್ಧಿವಂತ ಹಾಗೂ ಕುಟುಂಬದ ಬಾಂಧವ್ಯಕ್ಕೆ ಹೆಚ್ಚು ಒತ್ತು ಕೊಡುವ ಪ್ರಾಣಿಗಳು ಎಂಬುದಕ್ಕೆ ಈ ಘಟನೆ ಮತ್ತೊಂದು ಸಾಕ್ಷಿಯಾಗಿದೆ.
ಮರಿಯಾನೆಯ ಚೇಷ್ಟೆ ಮತ್ತು ತಾಯಾನೆಯ ಸಮಯಪ್ರಜ್ಞೆಯ ಈ ಅಪರೂಪದ ದೃಶ್ಯವು ಸದ್ಯ ಇಂಟರ್ನೆಟ್ನಲ್ಲಿ ಲಕ್ಷಾಂತರ ಜನರ ಮನ ಗೆದ್ದಿದ್ದು, ವಿಡಿಯೋ ಸಖತ್ ಸೌಂಡ್ ಮಾಡುತ್ತಿದೆ!
