ನಿದ್ರೆಯಲ್ಲೂ ಪಾರ್ಶ್ವವಾಯು! ಈ ಲಕ್ಷಣಗಳಿದ್ದರೆ ಎಚ್ಚರ

ನವದೆಹಲಿ: ನಿದ್ರೆಯಿಂದ ಹಠಾತ್ತಾಗಿ ಎಚ್ಚರಗೊಂಡರೂ ಕೆಲ ಸೆಕೆಂಡುಗಳ ಕಾಲ ದೇಹವನ್ನು ಚಲಿಸಲು, ಮಾತನಾಡಲು ಅಥವಾ ಉಸಿರಾಡಲು ಸಾಧ್ಯವಾಗದಿರುವ ಸ್ಥಿತಿಯನ್ನು 'ನಿದ್ರಾ ಪಾರ್ಶ್ವವಾಯು' (Sleep Paralysis) ಎಂದು ಕರೆಯಲಾಗುತ್ತದೆ. ಇದು ಭೀತಿ ಮೂಡಿಸುವ ಅನುಭವವಾಗಿದ್ದರೂ, ಸಾಮಾನ್ಯವಾಗಿ ತಾತ್ಕಾಲಿಕವಾಗಿದ್ದು ಯಾವುದೇ ಶಾಶ್ವತ ಅಪಾಯವನ್ನು ಉಂಟುಮಾಡುವುದಿಲ್ಲ.

ಪ್ರಮುಖ ಕಾರಣಗಳು

• ಆರ್‌ಇಎಮ್ (REM) ನಿದ್ರೆಯ ವ್ಯತ್ಯಯ: ಕಲ್ಪನಾತ್ಮಕ ಕನಸುಗಳು ಬೀಳುವ ಆರ್‌ಇಎಮ್ ಹಂತದಲ್ಲಿ ಮೆದುಳು ದೇಹದ ಸ್ನಾಯುಗಳ ಚಲನೆಯನ್ನು ತಾತ್ಕಾಲಿಕವಾಗಿ ತಡೆಯುತ್ತದೆ. ಎಚ್ಚರಗೊಳ್ಳುವಾಗ ಸ್ನಾಯುಗಳ ಮೇಲಿನ ನಿಯಂತ್ರಣ ಮರಳಿ ಬರುವುದು ಕೊಂಚ ತಡವಾದಾಗ ಈ ಸ್ಥಿತಿ ಎದುರಾಗುತ್ತದೆ.

• ಅನಿಯಮಿತ ನಿದ್ರೆ ಮತ್ತು ಒತ್ತಡ: ನಿದ್ರೆಯ ಅಭಾವ, ಸಮಯಕ್ಕೆ ಸರಿಯಾಗಿ ಮಲಗದರುವುದು, ಮಾನಸಿಕ ಒತ್ತಡ ಮತ್ತು ಆತಂಕಗಳು ಈ ಸಮಸ್ಯೆಗೆ ಪ್ರಮುಖ ಕಾರಣಗಳಾಗಿವೆ.

• ಸ್ಕ್ರೀನ್ ಬಳಕೆ ಹಾಗೂ ಜೀವನಶೈಲಿ: ರಾತ್ರಿ ಮಲಗುವ ಮುನ್ನ ಅತಿಯಾಗಿ ಮೊಬೈಲ್ ಅಥವಾ ಟಿವಿ ಸ್ಕ್ರೀನ್ ನೋಡುವುದು ನಿದ್ರೆಯ ಗುಣಮಟ್ಟವನ್ನು ಕೆಡಿಸುತ್ತದೆ.

• ಮಲಗುವ ಭಂಗಿ: ಬೆನ್ನಿನ ಮೇಲೆ ನೇರವಾಗಿ (Supine Position) ಮಲಗುವ ಅಭ್ಯಾಸ ಇರುವವರಲ್ಲಿ ಈ ಸ್ಥಿತಿ ಕಂಡುಬರುವ ಸಾಧ್ಯತೆ ಹೆಚ್ಚಿರುತ್ತದೆ.

ಅನುಭವಕ್ಕೆ ಬರುವ ಲಕ್ಷಣಗಳು

• ಭ್ರಮೆಗಳು (Hallucinations): ಈ ಸ್ಥಿತಿಯಲ್ಲಿರುವಾಗ ಕೊಠಡಿಯಲ್ಲಿ ಯಾರೋ ಇದ್ದಾರೆ, ನೆರಳು ಚಲಿಸುತ್ತಿದೆ ಅಥವಾ ಶಬ್ದಗಳು ಕೇಳಿಸುತ್ತಿವೆ ಎಂಬಂತಹ ನೈಜ ಎನಿಸುವ ಭ್ರಮೆಗಳು ಉಂಟಾಗಬಹುದು.

• ಎದೆಯ ಮೇಲೆ ಒತ್ತಡ: ದೇಹ ಚಲಿಸದಿರುವುದರಿಂದ ಹಾಗೂ ಶ್ವಾಸಕೋಶದ ಚಲನೆ ನಿಧಾನವಾಗಿರುವುದರಿಂದ ಎದೆಯ ಮೇಲೆ ಯಾರೋ ಕುಳಿತಂತೆ ಅಥವಾ ಭಾರ ಬಿದ್ದಂತೆ ಭಾಸವಾಗುತ್ತದೆ.

ನಿರ್ವಹಣೆ ಮತ್ತು ತಡೆಯುವ ಮಾರ್ಗಗಳು

1. ಗಾಬರಿಯಾಗಬೇಡಿ: ಇಂತಹ ಸ್ಥಿತಿ ಎದುರಾದಾಗ ಇದು ತಾತ್ಕಾಲಿಕ ಎಂಬ ಅರಿವಿದ್ದು ಶಾಂತವಾಗಿರಲು ಪ್ರಯತ್ನಿಸಿ.

2. ಸಣ್ಣ ಚಲನೆಗಳು: ಕೈ ಅಥವಾ ಕಾಲಿನ ಬೆರಳುಗಳನ್ನು ನಿಧಾನವಾಗಿ ಅಲುಗಾಡಿಸಲು ಪ್ರಯತ್ನಿಸಿ.

3. ನಿಯಮಿತ ನಿದ್ರೆ: ಪ್ರತಿದಿನ ಒಂದೇ ಸಮಯಕ್ಕೆ ಮಲಗಿ ಎಚ್ಚರಗೊಳ್ಳುವ ಅಭ್ಯಾಸ ಮಾಡಿಕೊಳ್ಳಿ.

4. ಪಕ್ಕಕ್ಕೆ ಮಲಗಿ: ಬೆನ್ನಿನ ಮೇಲೆ ಮಲಗುವ ಬದಲಾಗಿ ಮಗ್ಗಲಾಗಿ (ಪಕ್ಕಕ್ಕೆ) ಮಲಗುವುದು ಸೂಕ್ತ.

ಈ ರೀತಿಯ ಘಟನೆಗಳು ಪದೇ ಪದೇ ಸಂಭವಿಸುತ್ತಿದ್ದರೆ ಅಥವಾ ನಿದ್ರಾಹೀನತೆಗೆ ಕಾರಣವಾಗಿದ್ದರೆ ವೈದ್ಯಕೀಯ ಸಲಹೆ ಪಡೆಯುವುದು ಅಗತ್ಯ.