ನಂದಿನಿ ಹಾಲಿಗೆ 8 ರೂ. ಹೆಚ್ಚಳ ಬೆನ್ನಲ್ಲೇ : ಬಸ್​ ಟಿಕೆಟ್​ ಬೆಲೆ ಏರಿಕೆಗೂ ಸಚಿವ ಸಂಪುಟ​ ಅಸ್ತು

ಬೆಂಗಳೂರು : ರಾಜ್ಯದ ಸಾರ್ವಜನಿಕರ ಜೇಬಿಗೆ ಆರ್ಥಿಕ ಹೊರೆ ನೀಡುವ ಮಹತ್ವದ ತೀರ್ಮಾನವೊಂದನ್ನು ಸರ್ಕಾರ ಕೈಗೊಂಡಿದೆ. ಸಚಿವ ಸಂಪುಟ ಸಭೆಯಲ್ಲಿ ಹಾಲಿನ ಮಾರಾಟ ದರವನ್ನು 8 ರೂಪಾಯಿಗಳಷ್ಟು ಹೆಚ್ಚಿಸಲು ಹಾಗೂ ಸಾರ್ವಜನಿಕ ಸಾರಿಗೆ ಬಸ್ ಟಿಕೆಟ್‌ಗಳ ದರವನ್ನು ಪರಿಷ್ಕರಿಸಲು ಒಪ್ಪಿಗೆ ಸೂಚಿಸಲಾಗಿದೆ. ಈ ಎರಡೂ ಅಗತ್ಯ ಸೇವೆಗಳ ಬೆಲೆ ಏರಿಕೆಯು ರಾಜ್ಯದ ಸಾಮಾನ್ಯ ಮತ್ತು ಮಧ್ಯಮ ವರ್ಗದ ಜನರ ದೈನಂದಿನ ಬಜೆಟ್ ಮೇಲೆ ನೇರ ಪರಿಣಾಮ ಬೀರಲಿದೆ.

ಪ್ರಸ್ತುತ ಜಾರಿಯಲ್ಲಿರುವ ಚುನಾವಣಾ ನೀತಿ ಸಂಹಿತೆಯ ಕಾರಣದಿಂದಾಗಿ ಸರ್ಕಾರವು ಈ ನಿರ್ಧಾರವನ್ನು ತಕ್ಷಣವೇ ಅಧಿಕೃತವಾಗಿ ಪ್ರಕಟಿಸಿಲ್ಲ. ಬದಲಿಗೆ, ಚುನಾವಣಾ ಆಯೋಗಕ್ಕೆ ಈ ಕುರಿತು ಪ್ರಸ್ತಾಪವನ್ನು ಕಳುಹಿಸಲಾಗಿದ್ದು, ಅಲ್ಲಿಂದ ಹಸಿರು ನಿಶಾನೆ ಸಿಕ್ಕ ತಕ್ಷಣವೇ ಅಧಿಕೃತ ಆದೇಶ ಹೊರಬೀಳಲಿದೆ. ಬಹುತೇಕ ಮುಂಬರುವ ನವೆಂಬರ್ 1 ರಿಂದ ಈ ಹೊಸ ನಿಯಮಗಳು ಜಾರಿಗೆ ಬರುವ ನಿರೀಕ್ಷೆಯಿದೆ.

ಹಾಲಿನ ಬೆಲೆ ಏರಿಕೆಗೆ ಸಂಬಂಧಿಸಿದಂತೆ ಸರ್ಕಾರವು 80:20 ರ ಅನುಪಾತದ ಸೂತ್ರವನ್ನು ಅಳವಡಿಸಿಕೊಂಡಿದೆ. ಇದರ ಅನ್ವಯ ಗ್ರಾಹಕರಿಂದ ಹೆಚ್ಚುವರಿಯಾಗಿ ಪಡೆಯುವ ಎಂಟು ರೂಪಾಯಿಗಳಲ್ಲಿ 6 ರೂಪಾಯಿಗಳು ನೇರವಾಗಿ ಶ್ರಮಜೀವಿ ಹಾಲು ಉತ್ಪಾದಕ ರೈತರ ಖಾತೆಗೆ ಸೇರಲಿವೆ.

ಇದು ಗ್ರಾಮೀಣ ಭಾಗದ ಡೈರಿ ನೆಚ್ಚಿಕೊಂಡಿರುವ ರೈತರಿಗೆ ಆರ್ಥಿಕ ಪ್ರೋತ್ಸಾಹ ನೀಡಲಿದೆ. ಇನ್ನುಳಿದ 2 ರೂಪಾಯಿಗಳನ್ನು ಜಿಲ್ಲಾ ಹಾಲು ಒಕ್ಕೂಟಗಳ ನಿರ್ವಹಣಾ ವೆಚ್ಚಕ್ಕಾಗಿ ನೀಡಲಾಗುತ್ತದೆ.

ಈ ಬದಲಾವಣೆಯಿಂದಾಗಿ ಮಾರುಕಟ್ಟೆಯಲ್ಲಿ ನಿತ್ಯ ಬಳಕೆಯ ಟೋನ್ಡ್ ಹಾಲಿನ ಬೆಲೆ 46ರಿಂದ 54 ರೂಪಾಯಿಗಳಿಗೆ ಏರಲಿದೆ. ಹಾಗೆಯೇ ಗುಣಮಟ್ಟದ ಸಮೃದ್ಧಿ ಹಾಲಿನ ದರ 50- 64 ರೂಪಾಯಿಗಳಿಗೆ ಹೆಚ್ಚಾಗಲಿದೆ. ಹಸುವಿನ ಹಾಲು ಮತ್ತು ಶುಭಂ ಹಾಲಿನ ದರಗಳು ಕೂಡ ತಲಾ 8 ರೂಪಾಯಿಗಳಷ್ಟು ದುಬಾರಿಯಾಗಲಿವೆ.

ಮತ್ತೊಂದೆಡೆ ಬಸ್ ಪ್ರಯಾಣ ದರವೂ ಗಣನೀಯವಾಗಿ ಏರಿಕೆಯಾಗುತ್ತಿದ್ದು, ಪ್ರಯಾಣಿಕರು ತಾವು ಚಲಿಸುವ ದೂರಕ್ಕೆ ಅನುಗುಣವಾಗಿ ಕನಿಷ್ಠ ಮೂರು ರೂಪಾಯಿಗಳಿಂದ ಗರಿಷ್ಠ ಮೂವತ್ತು ರೂಪಾಯಿಗಳವರೆಗೆ ಹೆಚ್ಚಿನ ಹಣವನ್ನು ಟಿಕೆಟ್‌ಗಾಗಿ ಪಾವತಿಸಬೇಕಾಗುತ್ತದೆ. ನಿತ್ಯ ಸಾರಿಗೆ ಸಂಸ್ಥೆಯ ಬಸ್‌ಗಳನ್ನು ಅವಲಂಬಿಸಿರುವ ಉದ್ಯೋಗಿಗಳು ಮತ್ತು ಸಾರ್ವಜನಿಕರಿಗೆ ಈ ದ್ವಿಮುಖ ಬೆಲೆ ಏರಿಕೆಯು ಹೊಸ ಆರ್ಥಿಕ ಸಂಕಷ್ಟವನ್ನು ತಂದೊಡ್ಡಲಿದೆ.