ಪಾಕಿಸ್ತಾನದ ಅಶಾಂತ ಬಲೂಚಿಸ್ತಾನ ಪ್ರಾಂತ್ಯದಲ್ಲಿ ಹಿಂಸಾಚಾರ ತೀವ್ರಗೊಂಡಿದ್ದು, ಪ್ರತ್ಯೇಕತಾವಾದಿ ಸಂಘಟನೆಯಾದ ಬಲೂಚಿಸ್ತಾನ್ ಲಿಬರೇಶನ್ ಆರ್ಮಿ (ಬಿಎಲ್ಎ) ನಡೆಸಿದ ಎರಡು ಪ್ರತ್ಯೇಕ ದಾಳಿಗಳಲ್ಲಿ ಪಾಕಿಸ್ತಾನ ಸೇನೆಯ 25 ಯೋಧರು ಹತರಾಗಿದ್ದಾರೆ ಎಂದು ಸಂಘಟನೆ ಪ್ರತಿಪಾದಿಸಿದೆ. ದಾಳಿಯ ಬೆನ್ನಲ್ಲೇ ಬಿಎಲ್ಎ ಭೀಕರ ಸ್ಫೋಟಗಳು, ಗುಂಡಿನ ಚಕಮಕಿ ಹಾಗೂ ಹೊತ್ತಿ ಉರಿಯುತ್ತಿರುವ ಸೇನಾ ಟ್ರಕ್ ಅನ್ನು ತೋರಿಸುವ ಸಿನೆಮಾ ಶೈಲಿಯ ನಾಟಕೀಯ ವಿಡಿಯೋ ಒಂದನ್ನು ಬಿಡುಗಡೆ ಮಾಡಿದೆ.
ದಾಳಿಯ ವಿವರ:
ಸೇನಾ ಬೆಂಗಾವಲು ವಾಹನದ ಮೇಲೆ ಹೊಂಚುದಾಳಿ: ಜಿಯಾರತ್ ಕ್ರಾಸ್ ಬಳಿ ತೆರಳುತ್ತಿದ್ದ ಪಾಕಿಸ್ತಾನಿ ಸೇನೆಯ ಬೆಂಗಾವಲು ಪಡೆಯ ಮೇಲೆ ಬಿಎಲ್ಎ ಸಂಘಟನೆಯ 'ಫತೇಹ್ ಸ್ಕ್ವಾಡ್' ಹೋರಾಟಗಾರರು ಭೀಕರ ಹೊಂಚುದಾಳಿ ನಡೆಸಿದ್ದಾರೆ.
ಭಾರೀ ಸಾವು-ನೋವು: ಈ ದಾಳಿಯಲ್ಲಿ ಎರಡು ಸೇನಾ ವಾಹನಗಳು ಸಂಪೂರ್ಣವಾಗಿ ಧ್ವಂಸಗೊಂಡಿದ್ದು, 18 ಯೋಧರು ಸ್ಥಳದಲ್ಲೇ ಮೃತಪಟ್ಟಿದ್ದಾರೆ ಎಂದು ಬಿಎಲ್ಎ ತಿಳಿಸಿದೆ. ಗಾಯಗೊಂಡ ಐವರು ಯೋಧರು ಪರಾರಿಯಾಗಿದ್ದಾರೆ ಎನ್ನಲಾಗಿದೆ. ಎರಡು ಪ್ರತ್ಯೇಕ ದಾಳಿಗಳನ್ನು ಸೇರಿಸಿ ಒಟ್ಟು 25 ಸೈನಿಕರನ್ನು ಕೊಲ್ಲಲಾಗಿದೆ ಎಂದು ಸಂಘಟನೆ ಹೇಳಿಕೊಂಡಿದೆ.
ಪಾಕಿಸ್ತಾನ ಸೇನೆಯ ಪ್ರತಿದಾಳಿ
ಯೋಧರ ಹತ್ಯೆಯ ಬೆನ್ನಲ್ಲೇ ಆಕ್ರೋಶಗೊಂಡ ಇಸ್ಲಾಮಾಬಾದ್ ಬಲೂಚಿಸ್ತಾನದಾದ್ಯಂತ ಭಾರೀ ಕಾರ್ಯಾಚರಣೆ ನಡೆಸಿದ್ದು, ವಿವಿಧೆಡೆ ನಡೆಸಿದ ದಾಳಿಗಳಲ್ಲಿ 48 ಉಗ್ರರನ್ನು ಹತ್ಯೆ ಮಾಡಿರುವುದಾಗಿ ತಿಳಿಸಿದೆ.
ಕಳೆದ ಕೆಲವು ತಿಂಗಳುಗಳಿಂದ ಪಾಕಿಸ್ತಾನಿ ಸೇನೆಯ ವಿರುದ್ಧ ಬಿಎಲ್ಎ ತನ್ನ ಸಶಸ್ತ್ರ ಹೋರಾಟವನ್ನು ತೀವ್ರಗೊಳಿಸಿದ್ದು, ಈ ಸಂಘರ್ಷ ಪ್ರಾಂತ್ಯದಲ್ಲಿ ಮತ್ತಷ್ಟು ಉದ್ವಿಗ್ನತೆಗೆ ಕಾರಣವಾಗಿದೆ.