ಯಶ್ ಸರಳತೆಗೆ ಬಾಲಿವುಡ್ ದಿಗ್ಗಜ ಫಿದಾ: ಯಶ್ ಭೇಟಿ ಬಳಿಕ ಅನುಪಮ್ ಖೇರ್ ಭಾವುಕ ಪೋಸ್ಟ್

ಕನ್ನಡ ಚಿತ್ರರಂಗವನ್ನು ಜಾಗತಿಕ ಮಟ್ಟಕ್ಕೆ ಕೊಂಡೊಯ್ದ ರಾಕಿಂಗ್ ಸ್ಟಾರ್ ಯಶ್ (Yash) ಅವರ ಜನಪ್ರಿಯತೆ ದಿನದಿಂದ ದಿನಕ್ಕೆ ಹೆಚ್ಚುತ್ತಲೇ ಇದೆ. ಇದೀಗ ಬಾಲಿವುಡ್‌ನ ಹಿರಿಯ ಹಾಗೂ ಹಿರಿಯ ಶ್ರೇಷ್ಠ ನಟ ಅನುಪಮ್ ಖೇರ್ (Anupam Kher) ಅವರು ಯಶ್ ಅವರನ್ನು ಭೇಟಿಯಾಗಿ, ಅವರ ವ್ಯಕ್ತಿತ್ವ ಹಾಗೂ ಸಾಧನೆಗೆ ಮನಸೋತಿದ್ದಾರೆ. ಈ ಸುಂದರ ಭೇಟಿಯ ಫೋಟೋಗಳನ್ನು ತಮ್ಮ ಸೋಶಿಯಲ್ ಮೀಡಿಯಾ ಖಾತೆಯಲ್ಲಿ ಹಂಚಿಕೊಂಡಿರುವ ಅನುಪಮ್ ಖೇರ್, 'ಟಾಕ್ಸಿಕ್' (Toxic) ಸಿನಿಮಾಗೆ ಆಶೀರ್ವದಿಸಿ ವಿಶೇಷ ಶುಭಹಾರೈಕೆ ತಿಳಿಸಿದ್ದಾರೆ.

ಇತ್ತೀಚೆಗೆ ನಗರದ ಖಾಸಗಿ ಸ್ಟುಡಿಯೋ ಒಂದರಲ್ಲಿ ಈ ಇಬ್ಬರು ನಟರ ಭೇಟಿ ನಡೆದಿದೆ. ಈ ವೇಳೆ ಇಬ್ಬರೂ ಸಿನಿಮಾ ಜಗತ್ತು, ವೈಯಕ್ತಿಕ ಜೀವನ, ಹೆತ್ತವರು, ಕುಟುಂಬದ ಮೌಲ್ಯಗಳು ಹಾಗೂ ಭವಿಷ್ಯದ ಕನಸುಗಳ ಕುರಿತು ಅತ್ಯಂತ ಆತ್ಮೀಯವಾಗಿ ಗಂಟೆಗಳ ಕಾಲ ಚರ್ಚಿಸಿದ್ದಾರೆ. ಈ ಕ್ಷಣಗಳನ್ನು ತಮ್ಮ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಹಂಚಿಕೊಂಡಿರುವ ಅನುಪಮ್ ಖೇರ್, ಯಶ್ ಅವರನ್ನು ಭೇಟಿಯಾಗಿದ್ದು ತಮಗೆ ಅಪಾರ ಸಂತೋಷ ತಂದಿದೆ ಎಂದು ಬರೆದುಕೊಂಡಿದ್ದಾರೆ.

‘ಕೆಜಿಎಫ್’ (KGF) ಸರಣಿಯ ಮೂಲಕ 'ರಾಕಿ ಭಾಯ್' ಆಗಿ ಪ್ರೇಕ್ಷಕರನ್ನು ಗಿಫ್ಟೆಡ್ ನಟನೆಯಿಂದ ರಂಜಿಸಿದ ಯಶ್ ಅವರ ಶ್ರಮವನ್ನು ಅನುಪಮ್ ಖೇರ್ ಮುಕ್ತಕಂಠದಿಂದ ಶ್ಲಾಘಿಸಿದ್ದಾರೆ. "ತೆರೆಮೇಲೆ ಅಷ್ಟೊಂದು ಪವರ್‌ಫುಲ್ ಹಾಗೂ ಅಗ್ರೆಸಿವ್ ಆಗಿ ಕಾಣಿಸುವ ಯಶ್, ನಿಜಜೀವನದಲ್ಲಿ ಅತ್ಯಂತ ವಿನಮ್ರ, ಸರಳ ಮತ್ತು ಚಿಂತನಶೀಲ ವ್ಯಕ್ತಿ. ಹೊಸ ತಲೆಮಾರಿನ ನಟರಲ್ಲಿರುವ ಈ ಉತ್ಸಾಹ, ಶ್ರದ್ಧೆ ಮತ್ತು ಕನಸುಗಳನ್ನು ಕಂಡಾಗ ನನಗೂ ಹೊಸ ಶಕ್ತಿ ಬಂದಂತಾಗುತ್ತದೆ" ಎಂದು ಅವರು ಭಾವನಾತ್ಮಕವಾಗಿ ಬಣ್ಣಿಸಿದ್ದಾರೆ.

ಯಶ್ ಅಭಿನಯದ, ಗೀತು ಮೋಹನ್‌ದಾಸ್ ನಿರ್ದೇಶನದ ಬಹುನಿರೀಕ್ಷಿತ ‘ಟಾಕ್ಸಿಕ್’  ಸಿನಿಮಾ ಜಾಗತಿಕ ಮಟ್ಟದಲ್ಲಿ ಮತ್ತೊಂದು ಸೃಷ್ಟಿ ಮಾಡಲಿ. ಈ ಸಿನಿಮಾ ಅತ್ಯಂತ ದೊಡ್ಡ ಯಶಸ್ಸು ಕಾಣಲಿ ಮತ್ತು ಪ್ರೇಕ್ಷಕರಿಂದ ಅಪಾರ ಪ್ರೀತಿ ಗಳಿಸಲಿ ಎಂದು ಅನುಪಮ್ ಖೇರ್ ಆಶೀರ್ವದಿಸಿ ಹಾರೈಸಿದ್ದಾರೆ.

ಬಾಲಿವುಡ್ ಮತ್ತು ಸ್ಯಾಂಡಲ್‌ವುಡ್‌ನ ಈ ಇಬ್ಬರು ನಟರ ಆತ್ಮೀಯ ಚಿತ್ರಗಳು ಹೊರಬೀಳುತ್ತಿದ್ದಂತೆ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿವೆ. ಯಶ್ ಅಭಿಮಾನಿಗಳು ಹಾಗೂ ಸಿನಿಮಾ ಪ್ರಿಯರು ಈ ಪೋಸ್ಟ್‌ಗೆ ಲೈಕ್ಸ್, ಕಾಮೆಂಟ್‌ಗಳ ಸುರಿಮಳೆ ಗೈಯುತ್ತಿದ್ದು, "ಎರಡು ತಲೆಮಾರಿನ ಅದ್ಭುತ ನಟರ ಸಮ್ಮಿಲನ" ಎಂದು ಹರ್ಷ ವ್ಯಕ್ತಪಡಿಸುತ್ತಿದ್ದಾರೆ.