ಬೆಂಗಳೂರು: ಈಗಾಗಲೇ ಕೊರೋನಾ ಎರಡನೇ ಅಲೆ ಎದುರಿಸಲಾಗದೇ ಸೋತಿರುವ ಕರ್ನಾಟಕಕ್ಕೆ ಮತ್ತೊಂದು ಸಂಕಷ್ಟ ಎದುರಾಗಿದ್ದು, ಬ್ಲಾಕ್ ಫಂಗಸ್ ರೋಗದ ಭೀತಿ ಕಾಡುತ್ತಿದೆ. ರೋಗದ ಜೊತೆಗೆ ಇದಕ್ಕೆ ಅಗತ್ಯವಾದ ಆಂಟಿಫಂಗಲ್ ಮೆಡಿಸಿನ್ ಕೊರತೆ ಇದೆ ಎಂಬ ಆತಂಕಕಾರಿ ಅಂಶವೂ ಬೆಳಕಿಗೆ ಬಂದಿದೆ.
ಮ್ಯೂಕೋರ್ ಮೈಸೋಸಿಸ್ ಎಂದು ಕರೆಯಿಸಿಕೊಳ್ಳೋ ಈ ಬ್ಲಾಕ್ ಫಂಗಸ್ ಸಮಸ್ಯೆ ಕೊರೋನಾದಿಂದ ಚೇತರಿಸಿಕೊಂಡ ಸಕ್ಕರೆ ಕಾಯಿಲೆ ಇರುವವರಿಗೆ ಹಾಗೂ ಇತರ ರೋಗನಿರೋಧಕ ಶಕ್ತಿ ಕೊರತೆ ಇರುವವರಲ್ಲಿ ಹೆಚ್ಚು ಕಾಣಿಸಿಕೊಳ್ಳುತ್ತಿದೆ.
ಸದ್ಯ ಕರ್ನಾಟಕದಲ್ಲಿ ಈ ಸಮಸ್ಯೆ ಕಾಣಿಸಿಕೊಂಡಿಲ್ಲವಾದರೂ ಗುಜರಾತ್,ಅಹ್ಮದಾಬಾದ್ ಸೇರಿದಂತೆ ಹಲವೆಡೆ ಇದ್ದು, ಹೆಚ್ಚಿನ ಕಾಳಜಿ ವಹಿಸುವಂತೆ ಡಿಸಿಎಂ ಅಶ್ವತ್ಥ ನಾರಾಯಣ ಹಾಗೂ ಆರೋಗ್ಯ ಸಚಿವ ಡಾ.ಸುಧಾಕರ್ ಮನವಿ ಮಾಡಿದ್ದಾರೆ.
ಈ ಮಧ್ಯೆ ಬ್ಲಾಕ್ ಫಂಗಸ್ ಚಿಕಿತ್ಸೆ ಕೂಡ ದುಬಾರಿಯದ್ದಾಗಿದ್ದು, ಪ್ರತಿನಿತ್ಯ 10 ರಿಂದ 15 ಸಾವಿರ ರೂಪಾಯಿ ವೆಚ್ಚವಾಗಲಿದೆ ಎನ್ನಲಾಗುತ್ತಿದೆ. ಜೊತೆಗೆ ಬ್ಲಾಕ್ ಫಂಗಸ್ ಚಿಕಿತ್ಸೆಗೆ ಬಳಸುವ ಆಂಪೋಟೆರಿಸಿನ್ ಇಂಜಕ್ಷನ್ ಹಾಗೂ ಇತರೇ ಆಂಟಿಫಂಗಲ್ ಔಷಧಿಗಳ ಕೊರತೆ ಎದುರಾಗಿದ್ದು, ಔಷಧಿ ತಯಾರಿಕಾ ಕಂಪನಿಗಳಲ್ಲೂ ಈ ಔಷಧಿಗಳು ಲಭ್ಯವಿಲ್ಲ.
ಈ ಸಮಸ್ಯೆಗೆ ಚಿಕಿತ್ಸೆ ನೀಡಲು ಬಳಸುವ ಆಂಪೋಟೆರಿಸಿನ್ ಇಂಜಕ್ಷನ್ ಗೆ ಅಗತ್ಯವಾದ ಕಚ್ಚಾವಸ್ತುಗಳು ಅಮೇರಿಕಾದಿಂದ ಬರಬೇಕಿದ್ದು, ಸದ್ಯ ವಿಮಾನಯಾನ ಸೌಲಭ್ಯಗಳು ಸ್ಥಗತಿಗೊಂಡಿರೋದರಿಂದ ಕಚ್ಚಾವಸ್ತುಗಳ ಕೊರತೆಯೂ ಕಾಡುತ್ತಿದೆ.
ಸೂರತ್ ನಲ್ಲಿ ಈ ಸೋಂಕಿನಿಂದ ಈಗಾಗಲೇ 8 ಜನರು ಕಣ್ಣಿನ ದೃಷ್ಟಿಕಳೆದುಕೊಂಡಿದ್ದಾರೆ. ಹೀಗಾಗಿ ಕೊರೋನಾದಿಂದ ಚೇತರಿಸಿಕೊಂಡವರು ಹಾಗೂ ಇತರರು ದೇಹದ ರೋಗನಿರೋಧಕ ಶಕ್ತಿ ಹೆಚ್ಚಿಸಿಕೊಳ್ಳುವತ್ತ ಗಮನ ಕೊಡಿ ಎಂದು ವೈದ್ಯರು ಹಾಗೂ ಸರ್ಕಾರ ಮನವಿ ಮಾಡಿದೆ.
