ಧ್ರುವ ಸರ್ಜಾ ಹಾಗೂ ರಶ್ಮಿಕಾ ನಟಿಸಿರುವ ಬಹುನಿರೀಕ್ಷಿತ ಸಿನಿಮಾ ಪೊಗರು. ಸ್ಯಾಂಡಲ್ವುಡ್ನಲ್ಲಿ ಈ ಚಿತ್ರದ ಕುರಿತಾಗಿ ಬೆಟ್ಟದಷ್ಟು ನಿರೀಕ್ಷೆ ಇದೆ. ಡೈಲಾಗ್ ಟೀಸರ್ ಹಾಗೂ ಹಾಡುಗಳಿಂದಲೇ ಸದ್ದು ಮಾಡುತ್ತಿರುವ ಪೊಗರು ಸಿನಿಮಾ ಸಿನಿಪ್ರಿಯರಲ್ಲಿರುವ ನಿರೀಕ್ಷೆಯನ್ನು ಹುಟ್ಟುಹಾಕಿದೆ.
ಚಂದನ್ ಶೆಟ್ಟಿ ಮ್ಯೂಸಿಕಲ್ ಕಂಪೋಸ್ ಮಾಡಿರುವ ಕನ್ನಡದ ಪೊಗರು ಸಿನಿಮಾದ ತೆಲುಗು ಅವತರಿಣಿಕೆಯ ಖರಾಬು ಹಾಡು ಈಗಾಗಲೇ ಬಿಡುಗಡೆಯಾಗಿದ್ದು ಹೊಸ ದಾಖಲೆ ಬರೆಯುತ್ತಿದೆ.
ಚಿತ್ರತಂಡ ಈ ಹಿಂದೆಯೇ ಹೇಳಿದಂತೆ ಖರಾಬು ಹಾಡನ್ನು ಇಂದು ತೆಲುಗಿನಲ್ಲಿ ರಿಲೀಸ್ ಮಾಡಿದೆ. ಟಾಲಿವುಡ್ನಲ್ಲೂ ಈ ಹಾಡಿಗೆ ಕನ್ನಡದಂತೆಯೇ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ. ಯೂಟ್ಯೂಬ್ ಟ್ರೆಂಡಿಂಗ್ನಲ್ಲಿ ಸದ್ಯ ಟಾಪ್ನಲ್ಲಿದೆ.
ಹಾಡಿನಲ್ಲಿ ನಾಯಕಿಗೆ ಕಾಟ ಕೊಡಲಾಗಿದ್ದು, ಸಮಾಜಕ್ಕೆ ಕೆಟ್ಟ ಸಂದೇಶ ರವಾನೆಯಾಗುತ್ತಿದೆಯೆಂಬ ಆರೋಪ ಸ್ಯಾಂಡಲ್ ವುಡ್ ಅಂಗಳದಲ್ಲಿ ಕೇಳಿಬಂದಿತ್ತು. ಮಾತ್ರವಲ್ಲ ಪೊಗರು ಸಿನಿಮಾದಿಂದಲೂ ಹಾಡನ್ನು ಸಿನಿಮಾದಿಂದ ತೆಗೆಯುವಂತೆ ಕೆಲವು ಮಹಿಳಾ ಸಂಘಟನೆಗಳು ಆಗ್ರಹಿಸಿದ್ದವು.
ಕನ್ನಡದಲ್ಲಿ ಖರಾಬು ಹಾಡು ಏಪ್ರಿಲ್ನಲ್ಲಿ ರಿಲೀಸ್ ಆಗಿದ್ದು, ಮೂರು ತಿಂಗಳಿನಲ್ಲಿ ಹತ್ತು ಕೋಟಿ ಜನ ವೀಕ್ಷಿಸಿದ್ದಾರೆ. ನಂದ ಕಿಶೋರ್ ನಿರ್ದೇಶನದ ಈ ಸಿನಿಮಾದಲ್ಲಿ ಆ್ಯಕ್ಷನ್ ಪ್ರಿನ್ಸ್ ಧ್ರುವ ಸರ್ಜಾ ಶಿವನ ಪಾತ್ರದಲ್ಲಿ ನಟಿಸಿದ್ದಾರೆ. ನಟ ಧ್ರುವ ಸರ್ಜಾ ಜೊತೆಗೆ ಅಂತರರಾಷ್ಟ್ರೀಯ ಫೈಟರ್ಗಳು ಕೈ ಮಿಲಾಯಿಸಿದ್ದಾರೆ.
ಇದೀಗ ಧ್ರುವ ಸರ್ಜಾ ತೆಲುಗಿನಲ್ಲಿಯೂ ಮಿಂಚುಹರಿಸಿದ್ದು, ಖರಾಬು ಹಾಡು ಯೂಟ್ಯೂಬ್ ನಲ್ಲಿ ಧೂಳು ಎಬ್ಬಿಸುತ್ತಿದೆ. ವಿಭಿನ್ನವಾಗಿರುವ ಹಾಡು ತೆಲುಗು ಸಿನಿ ರಸಿಕರಿಗೆ ಸಖತ್ ಇಷ್ಟವಾದಂತಿದೆ.