ಕೊರೋನಾ ಸಂಕಷ್ಟ ಬಡವ-ಬಲ್ಲಿದ ಎನ್ನದೇ ಎಲ್ಲರನ್ನು ಬಲಿಪಡೆಯುತ್ತಿದೆ. ಈಗಾಗಲೇ ಸ್ಯಾಂಡಲ್ ವುಡ್ ನ ಹಲವರು ಕೊರೋನಾಕ್ಕೆ ಬಲಿಯಾಗಿದ್ದಾರೆ. ಈ ಮಧ್ಯೆ ತಮ್ಮ ಸಹೋದರನಂತಿದ್ದ ಆಪ್ತನ ಪುತ್ರ ಕೊರೋನಾಕ್ಕೆ ಬಲಿಯಾಗಿರೋದರಿಂದ ತೀವ್ರನೊಂದುಕೊಂಡಿರೋ ಜಗ್ಗೇಶ್, ನೋವಿನಲ್ಲೇ ಟ್ವಿಟರ್ ಗೂ ವಿದಾಯದ ಮಾತನ್ನಾಡಿದ್ದಾರೆ.
ನವರಸ ನಾಯಕ ಜಗ್ಗೇಶ್ ಕುಟುಂಬಕ್ಕೆ ಕೊರೋನಾ ಇನ್ನಿಲ್ಲದಂತೆ ಕಾಡಿದೆ. ಕೆಲದಿನಗಳ ಹಿಂದೆಯಷ್ಟೇ ಕೊರೋನಾ ಸೋಂಕಿಗೆ ತುತ್ತಾದ ಕೋಮಲ್ ಆಸ್ಪತ್ರೆ ಸೇರಿದ್ದು, ಹೋರಾಡಿ ತಮ್ಮನನ್ನು ಬದುಕಿಸಿಕೊಂಡೇ ಎಂದು ಜಗ್ಗೇಶ್ ಹೇಳಿಕೊಂಡಿದ್ದರು.
ಇದರ ಬೆನ್ನಲ್ಲೇ ಜಗ್ಗೇಶ್ ಆಪ್ತ ಹಾಗೂ ಪಿಎ ಕಳೆದ 30 ವರ್ಷದಿಂದ ಜಗ್ಗೇಶ್ ಜೊತೆಗಿದ್ದ ಮಾದೇಗೌಡನ ಮಗ ಕೊರೋನಾಕ್ಕೆ ಬಲಿಯಾಗಿದ್ದಾನೆ. ಮಾದೇಗೌಡನ ಪುತ್ರನ ಸಾವಿಗೆ ಮರುಗಿರುವ ಜಗ್ಗೇಶ್, ಇದ್ದೊಬ್ಬ ಮಗನನ್ನು ಕಳೆದುಕೊಂಡ ಮಾದೇಗೌಡನ ನೋವು ನೋಡಲಾಗುತ್ತಿಲ್ಲ.
ನನ್ನ ಮಗನಿಗಿಂತ ಒಂದು ವರ್ಷ ಕಿರಿಯವನು. ಅವನಿಗೆ ಕಳೆದ ಆರು ತಿಂಗಳ ಹಿಂದೆ ಮಗಳು ಹುಟ್ಟಿದ್ದಾಳೆ. ಈಗ ಆತನಿಲ್ಲ ಎಂದ್ರೇ ಮಾದೇಗೌಡನಿಗೆ ಏನೆಂದು ಸಮಾಧಾನ ಮಾಡಲಿ ಎಂದು ತಮ್ಮ ನೋವು ತೋಡಿಕೊಂಡಿದ್ದಾರೆ.
ಹೇಗೆ ಸಹಿಸುತ್ತಾನೆ ಮಾದೇಗೌಡ ಈ ದುಃಖವನ್ನು. ನನ್ನ ದೇಹವೇ ಸುಟ್ಟಂತೆ ಆಗಿದೆ. ಕೆಲ ದಿನ ನಾ ಇಲ್ಲಿಂದ ದೂರ ಉಳಿಯುವೆ. ಮನಸ್ಸು ಒಡೆದು ಚೂರಾಗಿದೆ. ಏನು ಮಾಡಿದರೂ ಸಮಾಧಾನ ಆಗುತ್ತಿಲ್ಲ. ಬಂಗಾರದಂತಹ ಆತ್ಮೀಯ ಬಂಧುಗಳೇ,ನಿಮ್ಮನ್ನು ನೀವು ಕಾಪಾಡಿಕೊಳ್ಳಿ. ಯಾರು ನಮಗಾಗಿ ಬರರು.
ಇಂದಿನ ಈ ಸ್ವಾರ್ಥಿಗಳ ಜಗದಲ್ಲಿ. ಸ್ವಾರ್ಥ,ಮೋಸ ಹಾಗೂ ಧನದಾಹಿ ಜಗತ್ತು. ಒಳ್ಳೆಯವರಿಗಲ್ಲಾ ಇಂದಿನ ಜಗತ್ತು ಎಂದು ಟ್ವೀಟರ್ ನಲ್ಲಿ ಜಗ್ಗೇಶ್ ಬರೆದುಕೊಂಡಿದ್ದಾರೆ.
