ಬೆಂಗಳೂರು : ನಿಮ್ಮ ಮನೆಯಲ್ಲೇನಾದ್ರೂ ಹಳೆಯ ಕಾಲದ ಟಿವಿ ಇದೆಯಾ. ಮರದ ಡೋರ್ ಹೊಂದಿರುವ ಟಿವಿಯಿದ್ರೆ ಕೊಡಿ ನಿಮಗೆ ಹೊಸ ಎಲ್ ಇಡಿ ಟಿವಿ ಕೊಡ್ತೇವೆ ಅಂತಾ ಯಾರಾದ್ರೂ ಹೇಳಿದ್ರೆ ಕೂಡಲೇ ಪೊಲೀಸರಿಗೆ ಸುದ್ದಿ ಮುಟ್ಟಿಸಿ. ಮರದ ಡೋರ್ ಹೊಂದಿರುವ ಟಿವಿ ಖರೀದಿಸಿ ದೇಶದ್ರೋಹದ ಕೃತ್ಯವೆಸಗುವ ಜಾಲವೊಂದು ರಾಜ್ಯದಲ್ಲಿ ಸಕ್ರೀಯವಾಗಿದೆ ಅನ್ನುವ ಮಾಹಿತಿ ಲಭ್ಯವಾಗಿದೆ. ಒಂದೊಮ್ಮೆ ಹೊಸ ಟಿವಿಯ ಆಸೆಗೆ ಬಲಿಬಿದ್ದು ಹಳೆಯ ಟಿವಿ ಮಾರಾಟ ಮಾಡಿದ್ರೆ ಅಪಾಯ ಕಟ್ಟಿಟ್ಟ ಬುತ್ತಿ.
ಹೌದು, ಹಿಂದಿನ ಕಾಲದಲ್ಲಿ ಮರದ ಡೋರ್ ಹೊಂದಿರುವ ಟಿವಿ ಮತ್ತು ರೆಡಿಯೋ ಬಳಕೆಯಲ್ಲಿತ್ತು. ದಿನಕಳೆದಂತೆ ಟಿವಿಯ ಡಿಸೈನ್ ನಲ್ಲಿ ಬಾರೀ ಬದಲಾವಣೆಯಾಗಿತ್ತು. ಆದ್ರೆ ಎರಡು ದಶಕಗಳಿಗೂ ಹಿಂದೆ ಬಳಕೆಯಲ್ಲಿದ್ದ ಮರದ ಡೋರ್ ಹೊಂದಿರುವ ಟಿವಿ ಹಾಗೂ ರೆಡಿಯೋಗೆ ಬಾರೀ ಡಿಮ್ಯಾಂಡ್ ಬಂದಿದೆ. ಹಲವು ಕಡೆಗಳಲ್ಲಿ ಕಾರ್ಯ ನಿರ್ವಹಿಸದ ಹಳೆಯ ಟಿವಿಗಳಿಗೆ 10 ಸಾವಿರ ರೂಪಾಯಿಯಿಂದ 20 ಸಾವಿರ ರೂಪಾಯಿ ಕೊಟ್ಟು ಖರೀದಿ ಮಾಡುವುದಾಗಿಯೂ ಹೇಳುತ್ತಿದ್ದಾರಂತೆ. ಅಷ್ಟಕ್ಕೂ ಈ ಹಳೆಯ ಕಾಲದ ಮರದ ಡೋರ್ ಇರುವ ಟಿವಿಗೆ ಅಷ್ಟೊಂದು ಡಿಮ್ಯಾಂಡ್ ಬರೋದಕ್ಕೆ ಕಾರಣವಾಗಿರೋದು ಏನ್ ಗೊತ್ತಾ… ಅದೇ ರೆಡ್ ಮರ್ಕ್ಯೂರಿ.
ದೇಶದಲ್ಲಿ ರೆಡ್ ಮರ್ಕ್ಯೂರಿ ಖರೀದಿ ಹಾಗೂ ಮಾರಾಟಕ್ಕೆ ನಿಷೇಧವಿದೆ. ಒಂದೊಮ್ಮೆ ರೆಡ್ ಮರ್ಕ್ಯೂರಿ ಮಾರಾಟ ಮಾಡೋದಾಗ್ಲಿ ಅಥವಾ ಖರೀದಿ ಮಾಡೋದು ಪತ್ತೆಯಾದ್ರೆ ಕಠಿಣ ಶಿಕ್ಷೆಗೆ ಗುರಿಯಾಗುಬೇಕಾಗುತ್ತದೆ. ನ್ಯೂಕ್ಲಿಯರ್ ಬಾಂಬ್ ತಯಾರಿಕೆಗೆ ಬಳಕೆಯಾಗುವ ರೆಡ್ ಮರ್ಕ್ಯೂರಿಗೆ ಅಂತರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಬಾರೀ ಡಿಮ್ಯಾಂಡ್ ಇದೆ. ಹಲವು ತಜ್ಞರು ಹೇಳುವ ಪ್ರಕಾರ 1 ಕೆ.ಜಿ.ಗೆ ಬರೋಬ್ಬರಿ 3 ಕೋಟಿ ರೂಪಾಯಿಗೂ ಅಧಿಕ ಬೆಲೆ ಬಾಳುತ್ತಂತೆ. ಮಾರುಕಟ್ಟೆಯಲ್ಲಿ ದುಬಾರಿ ಬೆಲೆಯಿರುವ ರೆಡ್ ಮರ್ಕ್ಯೂರಿಗಾಗಿ ಇದೀಗ ದಂಧೆಕೋರರು ಮರದ ಡೋರ್ ಹೊಂದಿರುವ ಟಿವಿಯ ಬೆನ್ನು ಬಿದ್ದಿದ್ದಾರೆ. ಹಿಂದಿನ ಕಾಲದಲ್ಲಿ ರೆಡ್ ಮರ್ಕ್ಯೂರಿ ಅತ್ಯಂತ ಕಡಿಮೆ ಬೆಲೆಗೆ ಲಭ್ಯವಾಗುತ್ತಿತ್ತು.
ಹೀಗಾಗಿಯೇ ಅಂದಿನ ಕಾಲದಲ್ಲಿ ತಯಾರಾಗುತ್ತಿದ್ದ ಟಿವಿಗಳ ಮದರ್ ಬೋರ್ಡ್ ನಲ್ಲಿ ಕನೆಕ್ಟರ್ ಆಗಿ ರೆಡ್ ಮರ್ಕ್ಯೂರಿಯನ್ನು ಬಳಕೆ ಮಾಡಲಾಗುತ್ತಿತ್ತು. ಆದ್ರೀಗ ರೆಡ್ ಮರ್ಕ್ಯೂರಿ ಬೆಲೆ ಕೋಟಿಗೆ ದಾಟುತ್ತಲೇ ಟಿವಿ ತಯಾರಿಕಾ ಕಂಪೆನಿಗಳು ರೆಡ್ ಮರ್ಕ್ಯೂರಿ ಬಳಕೆ ಮಾಡುತ್ತಿಲ್ಲ. ದಂಧೆಕೋರರು ಇದೀಗ ಹಳೆಯ ಮರದ ಡೋರ್ ಹೊಂದಿರುವ ಟಿವಿಗಳನ್ನ ಹುಡುಕಾಡುವ ಕಾರ್ಯವನ್ನು ಮಾಡುತ್ತಿದ್ದಾರೆ ಎನ್ನಲಾಗುತ್ತಿದೆ.
ಕರ್ನಾಟಕ ರಾಜ್ಯದಲ್ಲಿ ಈಗಾಗಲೇ ಇಂತಹದೊಂದು ದಂಧೆ ನಡೆಯುತ್ತಿದೆ. ಚಿತ್ರದುರ್ಗ, ಮಂಡ್ಯ ಜಿಲ್ಲೆಗಳಲ್ಲಿ ಈಗಾಗಲೇ ಯುವಕ ಗುಂಪು ಹಳೆಯ ಮರದ ಟಿವಿ ಇದೆಯಾ ಅಂತಾ ಜನರ ಬಳಿಯಲ್ಲಿ ವಿಚಾರಿಸಿದ್ದಾರಂತೆ. ಅಲ್ಲದೇ ಹಳೆಯ ಟಿವಿ ಕೊಟ್ರೆ ಹೊಸ ಎಲ್ ಇಡಿ ಟಿವಿಯನ್ನು ನೀಡುವುದಾಗಿಯೂ ಜನರಿಗೆ ಆಮಿಷವೊಡ್ಡಿದ್ದಾರಂತೆ.
ಈ ಕುರಿತು ಹಲವು ವಿಡಿಯೋಗಳು ಈಗಾಗಲೇ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ. ಹಳ್ಳಿ ಭಾಗಗಳಲ್ಲಿ ಹಳೆ ಟಿವಿಗೆ ಲಕ್ಷಾಂತರ ರೂಪಾಯಿ ಕೊಟ್ಟು ಖರೀದಿ ಮಾಡುತ್ತಿದ್ದಾರೆ ಅನ್ನುವ ಗಾಳಿ ಸುದ್ದಿ ಇದೀಗ ಎಲ್ಲೆಡೆ ಹರಿದಾಡುತ್ತಿದೆ. ಇಂತಹ ಜಾಲ ಸಕ್ರೀಯವಾಗಿದೆಯಾ ? ಇಲ್ಲಾ ಇದು ಕೇವಲ ಗಾಳಿ ಸುದ್ದಿಯ ಅನ್ನುವ ಕುರಿತು ಪೊಲೀಸ್ ಇಲಾಖೆಯ ಈಗಾಗಲೇ ಕಾರ್ಯೋನ್ಮುಖವಾಗಿದೆ.