ನವದೆಹಲಿ : ಪಾಸ್ ಪೋರ್ಟ್ ವಂಚನೆ ಪ್ರಕರಣ ಹೆಚ್ಚುತ್ತಿರುವುದರ ಜೊತೆಗೆ ನಕಲಿ ಪಾಸ್ ಪೋರ್ಟ್ ಗಳನ್ನು ತಡೆದು ಪ್ರಯಾಣಿಕರಿಗೆ ತ್ವರಿತಗತಿಯ ಸೇವೆಯನ್ನು ಒದಗಿಸುವ ನಿಟ್ಟಿನಲ್ಲಿ ಪಾಸ್ ಪೋರ್ಟ್ ವ್ಯವಸ್ಥೆಯಲ್ಲಿ ಭಾರೀ ಬದಲಾವಣೆಗಳನ್ನು ಮಾಡಲು ಕೇಂದ್ರ ಸರಕಾರ ಮುಂದಾಗಿದೆ.
ದೇಶದಲ್ಲಿ ಈಗಾಗಲೇ ಪಾಸ್ ಪೋರ್ಟ್ ಬದಲು ಇ-ಪಾಸ್ ಪೋರ್ಟ್ ವ್ಯವಸ್ಥೆಯನ್ನು ಜಾರಿಗೆ ತರಲು ಕೇಂದ್ರ ಸೆರಕಾರ ನಿರ್ಧರಿಸಿದೆ. ಮುದ್ರಿತ ಪಾಸ್ಪೋರ್ಟ್ ಬದಲಿಗೆ ಎಲೆಕ್ಟ್ರಾನಿಕ್ ಪಾಸ್ಪೋರ್ಟ್ ನೀಡಲು ಕೇಂದ್ರ ಸರ್ಕಾರ ನಿರ್ಧರಿಸಿದೆ. 2021ರ ಹೊತ್ತಿಗೆ ಪಾಸ್ಪೋರ್ಟ್ ವಿತರಣೆ ಆರಂಭವಾಗುವ ಸಾಧ್ಯತೆಯಿದೆ. ಪಾಸ್ಪೋರ್ಟ್ ವಂಚನೆ (ಫೋರ್ಜರಿ) ತಡೆಯುವುದು ಹಾಗೂ ವಿಮಾನ ನಿಲ್ದಾಣಗಳಲ್ಲಿ ವಲಸೆ ಪ್ರಕ್ರಿಯೆ ಬೇಗನೆ ಮುಗಿಸಲು ನೆರವಾಗುವುದು ಈ ಯೋಜನೆಯ ಉದ್ದೇಶವಾಗಿದೆ.
ಪ್ರಾಯೋಗಿಕವಾಗಿ 20,000 ಅಧಿಕೃತ ಮತ್ತು ರಾಜತಾಂತ್ರಿಕ ಇ-ಪಾಸ್ಪೋರ್ಟ್ಗಳನ್ನು ಮಂಜೂರು ಮಾಡಲಾಗಿದೆ. ಅವುಗಳಲ್ಲಿ ಎಲೆಕ್ಟ್ರಾನಿಕ್ ಮೈಕ್ರೋಪ್ರೋಸೆಸರ್ ಚಿಪ್ಗಳನ್ನು ಅಳವಡಿಸಲಾಗಿದೆ.
ಇ-ಪಾಸ್ಪೋರ್ಟ್ಗಳನ್ನು ಅಂತಾರಾಷ್ಟ್ರೀಯ ನಾಗರಿಕ ವಿಮಾನಯಾನ ಸಂಸ್ಥೆಯ (ಐಸಿಎಒ) ಮಾನದಂಡಗಳಿಗೆ ಅನುಗುಣವಾಗಿ ಇವೆ. ಇ-ಪಾಸ್ಪೋರ್ಟ್ ಯೋಜನೆ ಅನುಷ್ಠಾನಕ್ಕಾಗಿ ಮಾಹಿತಿ ತಂತ್ರಜ್ಞಾನ (ಐಟಿ) ಸೌಕರ್ಯ ಸ್ಥಾಪಿಸಲು ಸರ್ಕಾರ ಸಂಸ್ಥೆಯೊಂದನ್ನು ಆಯ್ಕೆ ಮಾಡಲಿದೆ.
ಇನ್ಮುಂದೆ ದೇಶದಲ್ಲಿರುವ ಎಲ್ಲಾ 36 ಪಾಸ್ಪೋರ್ಟ್ ಕಚೇರಿಗಳು ಕೂಡ ಇ-ಪಾಸ್ಪೋರ್ಟ್ ಸೇವೆಯನ್ನು ಒದಗಿಸಲಿವೆ. ಪ್ರತೀ ಗಂಟೆಗೆ 10,000ದಿಂದ 20,000 ಇ-ಪಾಸ್ಪೋರ್ಟ್ಗಳನ್ನು ನೀಡುವ ನಿಟ್ಟಿನಲ್ಲಿ ತಾಂತ್ರಿಕವಾಗಿ ಸಜ್ಜುಗೊಳಿಸಲಾಗುತ್ತದೆ.
ದೆಹಲಿ ಮತ್ತು ಚೆನ್ನೈನಲ್ಲಿ ಐಟಿ ವ್ಯವಸ್ಥೆಗಳನ್ನು ಅಳವಡಿಸಲಾಗುತ್ತದೆ. ಚಿಪ್ ನೆರವಿನೊಂದಿಗೆ ಕಾರ್ಯಾಚರಿಸುವ ಸುಧಾರಿತ ಭದ್ರತಾ ಅಂಶಗಳ್ನೊಳಗೊಂಡ ಇ-ಪಾಸ್ಪೋರ್ಟ್ ರೂಪಿಸಲು ನಾಸಿಕ್ನಲ್ಲಿರುವ ಭಾರತೀಯ ಭದ್ರತಾ ಪ್ರೆಸ್ ಹಾಗೂ ರಾಷ್ಟ್ರೀಯ ಮಾಹಿತಿ ಕೇಂದ್ರದೊಂದಿಗೆ ತಮ್ಮ ಸಚಿವಾಲಯ ಕೆಲಸ ಮಾಡುತ್ತಿದೆ.
ಇ-ಪಾಸ್ಪೋರ್ಟ್ ಚಾಲ್ತಿಗೆ ಬರುವುದರಿಂದ ಭಾರತೀಯರ ಪ್ರವಾಸ ದಾಖಲೆಪತ್ರದ ಭದ್ರತಾ ಅಂಶಗಳು ಬಲಗೊಳ್ಳಲಿವೆ ಎಂದು ವಿದೇಶಾಂಗ ಸಚಿವ ಎಸ್. ಜೈಶಂಕರ್ ತಿಳಿಸಿದ್ದಾರೆ.