ಖಾಲಿ ಹೊಟ್ಟೆಯಲ್ಲಿ ಈ ಆಹಾರಗಳನ್ನು ಸೇವಿಸಲೇಬೇಡಿ! ವೈದ್ಯರ ಸಲಹೆ ಇಲ್ಲಿದೆ

ಮುಂಜಾನೆ ಎದ್ದ ತಕ್ಷಣ ನಾವು ಅನುಸರಿಸುವ ಆಹಾರ ಪದ್ಧತಿ ನಮ್ಮ ಇಡೀ ದಿನದ ಆರೋಗ್ಯ ಮತ್ತು ಜೀರ್ಣಶಕ್ತಿಯನ್ನು ನಿರ್ಧರಿಸುತ್ತದೆ. ಆದರೆ ನಮಗೆ ಅರಿವಿಲ್ಲದಂತೆ ನಾವು ಬೆಳಿಗ್ಗೆ ಸೇವಿಸುವ ಕೆಲವು ಆರೋಗ್ಯಕರ ಆಹಾರಗಳೇ ನಮ್ಮ ಕರುಳಿನ ಆರೋಗ್ಯವನ್ನು (Gut Health) ಹಾಳುಮಾಡುತ್ತಿವೆ ಎಂದು ದೆಹಲಿಯ ಫೋರ್ಟಿಸ್ ಆಸ್ಪತ್ರೆಯ ಖ್ಯಾತ ಗ್ಯಾಸ್ಟ್ರೋಎಂಟರಾಲಜಿಸ್ಟ್ ಡಾ. ಶುಭಂ ವತ್ಸ್ಯ ಅವರು ಎಚ್ಚರಿಸಿದ್ದಾರೆ.

ಡಾ. ವತ್ಸ್ಯ ಅವರು ತಮ್ಮ ಇತ್ತೀಚಿನ ಸೋಷಿಯಲ್ ಮೀಡಿಯಾ ಪೋಸ್ಟ್‌ನಲ್ಲಿ, ಕೆಲವು ಆಹಾರಗಳು ಪೌಷ್ಟಿಕವಾಗಿದ್ದರೂ ಅವುಗಳನ್ನು ಸೇವಿಸುವ ‘ಸಮಯ’ ಮತ್ತು ‘ಕ್ರಮ’ ಬಹಳ ಮುಖ್ಯ ಎಂದು ತಿಳಿಸಿದ್ದಾರೆ. ಅವರು ಮುಖ್ಯವಾಗಿ ಮೂರು ಆಹಾರಗಳನ್ನು ಖಾಲಿ ಹೊಟ್ಟೆಯಲ್ಲಿ ಸೇವಿಸದಂತೆ ಸಲಹೆ ನೀಡಿದ್ದಾರೆ:

೧. ಟೀ, ಕಾಫಿ ಅಥವಾ ಸಿಟ್ರಸ್ ಪಾನೀಯಗಳು:
ಬೆಳಿಗ್ಗೆ ಎದ್ದ ತಕ್ಷಣ ಬಿಸಿಬಿಸಿ ಟೀ ಅಥವಾ ಕಾಫಿ ಕುಡಿಯುವುದು ಹಲವರ ಅಭ್ಯಾಸ. ಆದರೆ ಖಾಲಿ ಹೊಟ್ಟೆಯಲ್ಲಿ ಕೆಫೀನ್ ಅಥವಾ ಲಿಂಬು ಪಾನೀಯದಂತಹ ಸಿಟ್ರಸ್ ಪೇಯಗಳನ್ನು ಸೇವಿಸುವುದರಿಂದ ಹೊಟ್ಟೆಯ ಒಳಪದರಕ್ಕೆ ನೇರವಾಗಿ ಹಾನಿಯಾಗುತ್ತದೆ. ಇದು ಆಸಿಡಿಟಿ, ಹೊಟ್ಟೆ ಉರಿ ಮತ್ತು ವಾಕರಿಕೆಗೆ ಕಾರಣವಾಗಬಹುದು. ಈ ಅಭ್ಯಾಸ ಮುಂದುವರಿದರೆ ದೀರ್ಘಕಾಲದ ಆಸಿಡ್ ರಿಫ್ಲಕ್ಸ್ (Acid Reflux) ಸಮಸ್ಯೆಗೆ ದಾರಿಯಾಗಬಹುದು.

೨. ಬಾಳೆಹಣ್ಣು ಅಥವಾ ಹಾಲು ಆಧಾರಿತ ಸ್ಮೂಥಿಗಳು:
ಸಾಮಾನ್ಯವಾಗಿ ಹಣ್ಣು ಮತ್ತು ಹಾಲಿನ ಮಿಶ್ರಣದ ಸ್ಮೂಥಿಗಳು ಆರೋಗ್ಯಕರ ಎಂದು ನಂಬಲಾಗಿದೆ. ಆದರೆ ಡಾ. ವತ್ಸ್ಯ ಅವರ ಪ್ರಕಾರ, ಖಾಲಿ ಹೊಟ್ಟೆಯಲ್ಲಿ ಇವುಗಳನ್ನು ಜೀರ್ಣಿಸಿಕೊಳ್ಳುವುದು ದೇಹಕ್ಕೆ ಕಷ್ಟವಾಗುತ್ತದೆ. ಇದು ಹೊಟ್ಟೆ ಉಬ್ಬರ (Bloating), ಗ್ಯಾಸ್ ಮತ್ತು ಇಡೀ ದಿನ ಸುಸ್ತು ಅಥವಾ ಆಲಸ್ಯದ ಭಾವನೆಯನ್ನು ಉಂಟುಮಾಡಬಹುದು.

ಪ್ರಧಾನಮಂತ್ರಿ ವಿದ್ಯಾಲಕ್ಷ್ಮಿ ಯೋಜನೆ: ಉನ್ನತ ಶಿಕ್ಷಣ ಮಾಡಲು ಸಿಗುತ್ತೆ ಕೈತುಂಬಾ ಹಣ

೩. ಹಸಿ ತರಕಾರಿ ಸಲಾಡ್‌ಗಳು:
ಹಸಿ ತರಕಾರಿಗಳಲ್ಲಿ ಕರಗದ ನಾರು (Insoluble Fibre) ಹೆಚ್ಚಿರುತ್ತದೆ. ಖಾಲಿ ಹೊಟ್ಟೆಯಲ್ಲಿ ಈ ನಾರು ಜೀರ್ಣಾಂಗವ್ಯೂಹಕ್ಕೆ ಒಂದು ರೀತಿಯಲ್ಲಿ ‘ಶಾಕ್’ ನೀಡುತ್ತದೆ. ತರಕಾರಿಗಳನ್ನು ಬೇಯಿಸಿದ ಆಹಾರದೊಂದಿಗೆ ಅಥವಾ ನಂತರ ಸೇವಿಸುವುದು ಉತ್ತಮ. ಹಸಿ ತರಕಾರಿಗಳನ್ನು ಮುಂಜಾನೆ ಸೇವಿಸುವುದರಿಂದ ಜೀರ್ಣಕ್ರಿಯೆಯಲ್ಲಿ ವ್ಯತ್ಯಯ ಉಂಟಾಗಬಹುದು.

ಪರಿಹಾರವೇನು?
ಜೀರ್ಣಕ್ರಿಯೆಯನ್ನು ಸುಧಾರಿಸಲು ಬೆಳಿಗ್ಗೆ ಮೃದುವಾದ, ಸುಲಭವಾಗಿ ಜೀರ್ಣವಾಗುವ ಮತ್ತು ಪೌಷ್ಟಿಕಾಂಶಯುಕ್ತ ಆಹಾರದೊಂದಿಗೆ ದಿನವನ್ನು ಆರಂಭಿಸುವುದು ಉತ್ತಮ. ಈ ಮೂಲಕ ಕರುಳಿನ ಆರೋಗ್ಯವನ್ನು ಕಾಪಾಡಿಕೊಳ್ಳಬಹುದು ಎಂದು ಅವರು ತಿಳಿಸಿದ್ದಾರೆ.