ಪ್ರಧಾನ ಮಂತ್ರಿ ಫಸಲ್ ಬಿಮಾ ಯೋಜನೆ (PMFBY) : ಅರ್ಜಿ ಸಲ್ಲಿಸುವುದು ಹೇಗೆ ?

ಪ್ರಧಾನ ಮಂತ್ರಿ ಫಸಲ್ ಬಿಮಾ ಯೋಜನೆ (PMFBY) ಭಾರತ ಸರ್ಕಾರವು 2016ರಲ್ಲಿ ಪ್ರಾರಂಭಿಸಿದ ಬೆಳೆ ವಿಮಾ ಯೋಜನೆ. ನೈಸರ್ಗಿಕ ವಿಕೋಪಗಳಿಂದ ಉಂಟಾಗುವ ಬೆಳೆ ನಷ್ಟದಿಂದ ರೈತರಿಗೆ ಆರ್ಥಿಕ ಭದ್ರತೆಯನ್ನು ಒದಗಿಸುವುದು ಇದರ ಮುಖ್ಯ ಉದ್ದೇಶ.

ಕೃಷಿಯಲ್ಲಿನ ಅಪಾಯಗಳನ್ನು ಕಡಿಮೆ ಮಾಡಿ, ರೈತರ ಆದಾಯವನ್ನು ಸ್ಥಿರಗೊಳಿಸಲು ಮತ್ತು ನವೀನ ಕೃಷಿ ಪದ್ಧತಿಗಳನ್ನು ಅಳವಡಿಸಿಕೊಳ್ಳಲು ಅವರನ್ನು ಪ್ರೋತ್ಸಾಹಿಸಲು ಈ ಯೋಜನೆ ನೆರವಾಗುತ್ತದೆ.

PMFBY ಯೋಜನೆಯ ವಿಶೇಷತೆಯೇನು ?

• ಕಡಿಮೆ ಪ್ರೀಮಿಯಂ: ಈ ಯೋಜನೆಯು ರೈತರಿಗೆ ಕಡಿಮೆ ಪ್ರೀಮಿಯಂ ದರದಲ್ಲಿ ಬೆಳೆ ವಿಮೆಯನ್ನು ಒದಗಿಸುತ್ತದೆ.
• ಖಾರಿಫ್ (ಮುಂಗಾರು) ಬೆಳೆಗಳು: ಆಹಾರ ಧಾನ್ಯಗಳು ಮತ್ತು ಎಣ್ಣೆಕಾಳುಗಳ ಎಲ್ಲಾ ಖಾರಿಫ್ ಬೆಳೆಗಳಿಗೆ ವಿಮಾ ಮೊತ್ತದ ಶೇ. 2 ರಷ್ಟು ಪ್ರೀಮಿಯಂ.
• ರಬಿ (ಹಿಂಗಾರು) ಬೆಳೆಗಳು: ಆಹಾರ ಧಾನ್ಯಗಳು ಮತ್ತು ಎಣ್ಣೆಕಾಳುಗಳ ಎಲ್ಲಾ ರಬಿ ಬೆಳೆಗಳಿಗೆ ವಿಮಾ ಮೊತ್ತದ ಶೇ. 1.5 ರಷ್ಟು ಪ್ರೀಮಿಯಂ.
• ವಾರ್ಷಿಕ ವಾಣಿಜ್ಯ/ತೋಟಗಾರಿಕೆ ಬೆಳೆಗಳು: ವಿಮಾ ಮೊತ್ತದ ಶೇ. 5 ರಷ್ಟು ಪ್ರೀಮಿಯಂ.

ಉಳಿದ ಪ್ರೀಮಿಯಂ ಮೊತ್ತವನ್ನು ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು ಸಮಾನವಾಗಿ ಹಂಚಿಕೊಂಡು ಭರಿಸುತ್ತವೆ.

ಯಾವ ಸಂದರ್ಭದಲ್ಲಿ ಯೋಜನೆಯ ಲಾಭ ಸಿಗುತ್ತೆ ?

ಇಳುವರಿ ನಷ್ಟ (ಪ್ರಾದೇಶಿಕ ಆಧಾರದ ಮೇಲೆ): ಸಾಮಾನ್ಯ ಬೆಂಕಿ ಮತ್ತು ಸಿಡಿಲು, ಬಿರುಗಾಳಿ, ಆಲಿಕಲ್ಲು, ಚಂಡಮಾರುತ, ಪ್ರವಾಹ, ಭೂಕುಸಿತ, ಬರ, ಶುಷ್ಕ ಅವಧಿ ಮತ್ತು ಕೀಟ/ರೋಗಗಳಿಂದಾಗುವ ಇಳುವರಿ ನಷ್ಟಕ್ಕೆ ವಿಮಾ ರಕ್ಷಣೆ.

ಬಿತ್ತನೆ ವಿಫಲತೆ: ಪ್ರತಿಕೂಲ ಹವಾಮಾನದಿಂದಾಗಿ ಬಿತ್ತನೆ ಅಥವಾ ನಾಟಿ ಮಾಡಲು ಸಾಧ್ಯವಾಗದಿದ್ದರೆ ಪರಿಹಾರ.

ಕೊಯ್ಲು ನಂತರದ ನಷ್ಟಗಳು: ಕೊಯ್ಲು ಮಾಡಿದ ನಂತರ 14 ದಿನಗಳವರೆಗೆ ಹೊಲದಲ್ಲಿ ಒಣಗಲು ಇಟ್ಟ ಬೆಳೆಗಳಿಗೆ ಚಂಡಮಾರುತ, ಚಂಡಮಾರುತ ಮಳೆ, ಅಕಾಲಿಕ ಮಳೆಯಿಂದಾಗುವ ನಷ್ಟಕ್ಕೆ ರಕ್ಷಣೆ.

ಸ್ಥಳೀಯ ವಿಪತ್ತುಗಳು: ನಿರ್ದಿಷ್ಟ ಪ್ರದೇಶದಲ್ಲಿ ಸಂಭವಿಸುವ ಆಲಿಕಲ್ಲು ಮಳೆ, ಭೂಕುಸಿತ ಮತ್ತು ಮೇಘಸ್ಫೋಟದಂತಹ ಸ್ಥಳೀಯ ವಿಪತ್ತುಗಳಿಂದ ಉಂಟಾಗುವ ನಷ್ಟಗಳಿಗೆ ಪ್ರತ್ಯೇಕವಾಗಿ ಪರಿಹಾರ.

ಸ್ವಯಂಪ್ರೇರಿತ ಯೋಜನೆ: ಖಾರಿಫ್ 2020 ಋತುವಿನಿಂದ ಈ ಯೋಜನೆಗೆ ನೋಂದಣಿ ಸ್ವಯಂಪ್ರೇರಿತವಾಗಿದೆ. ಬೆಳೆ ಸಾಲ ಪಡೆದ ರೈತರಿಗೆ ಇದು ಮೊದಲು ಕಡ್ಡಾಯವಾಗಿತ್ತು.

ತಂತ್ರಜ್ಞಾನದ ಬಳಕೆ: ಬೆಳೆ ನಷ್ಟದ ಅಂದಾಜು ಮಾಡಲು ಮತ್ತು ಪರಿಹಾರ ವಿತರಣೆಯಲ್ಲಿ ಪಾರದರ್ಶಕತೆ ತರಲು ಸ್ಮಾರ್ಟ್ ಫೋನ್‌ಗಳು, ರಿಮೋಟ್ ಸೆನ್ಸಿಂಗ್, ಡ್ರೋನ್ ತಂತ್ರಜ್ಞಾನ ಇತ್ಯಾದಿಗಳನ್ನು ಬಳಸಲಾಗುತ್ತದೆ. ನೇರ ಲಾಭ ವರ್ಗಾವಣೆ (DBT) ಮೂಲಕ ಪರಿಹಾರವನ್ನು ರೈತರ ಖಾತೆಗೆ ನೇರವಾಗಿ ಜಮಾ ಮಾಡಲಾಗುತ್ತದೆ.

ಯಾರು ಅರ್ಜಿ ಸಲ್ಲಿಸಬಹುದು?

ಅಧಿಸೂಚಿತ ಪ್ರದೇಶಗಳಲ್ಲಿ ಬೆಳೆ ಬೆಳೆಯುವ ಎಲ್ಲಾ ರೈತರು (ಭೂ ಮಾಲೀಕರು ಮತ್ತು ಗುತ್ತಿಗೆದಾರರು ಇಬ್ಬರೂ) ಈ ಯೋಜನೆಗೆ ಅರ್ಜಿ ಸಲ್ಲಿಸಬಹುದು.

PMFBY ಅರ್ಜಿ ಸಲ್ಲಿಸುವುದು ಹೇಗೆ ?

ಆನ್ಲೈನ್ ಮೂಲಕ:

• ಪ್ರಧಾನ ಮಂತ್ರಿ ಫಸಲ್ ಬಿಮಾ ಯೋಜನೆಯ ಅಧಿಕೃತ ವೆಬ್‌ಸೈಟ್‌ Click ಮಾಡಿ
• “ಫಾರ್ಮರ್ ಕಾರ್ನರ್” ವಿಭಾಗ ಕ್ಲಿಕ್‌ ಮಾಡಿ ನಿಮ್ಮ ನೋಂದಣಿ ಸಂಖ್ಯೆಯನ್ನು ನೋಂದಾಯಿಸಿಕೊಳ್ಳಿ.
• ಅಗತ್ಯವಿರುವ ಎಲ್ಲಾ ಮಾಹಿತಿಯನ್ನು ಭರ್ತಿ ಮಾಡಿ ಮತ್ತು ದಾಖಲೆಗಳನ್ನು ಅಪ್‌ಲೋಡ್ ಮಾಡಿ.
• ವಿಮಾ ಪ್ರೀಮಿಯಂ ಅನ್ನು ಆನ್‌ಲೈನ್ ಮೂಲಕ ಪಾವತಿಸಿ.
• ಕರ್ನಾಟಕದ ರೈತರಿಗಾಗಿ ಪ್ರತ್ಯೇಕ ಪೋರ್ಟಲ್ ಸಹ ಲಭ್ಯವಿದೆ:

www.samrakshane.karnataka.gov.in/CropHome.aspx

ಆಫ್ಲೈನ್ ಮೂಲಕ:

• ನಿಮ್ಮ ಹತ್ತಿರದ ಬ್ಯಾಂಕ್ ಶಾಖೆ (ಬೆಳೆ ಸಾಲ ಪಡೆದಿರುವ ಬ್ಯಾಂಕ್ ಅಥವಾ ಇತರ ಯಾವುದೇ ಬ್ಯಾಂಕ್), ಸಹಕಾರಿ ಸಂಸ್ಥೆ, ಅಥವಾ ಸಾಮಾನ್ಯ ಸೇವಾ ಕೇಂದ್ರ (CSC) ಗಳಿಗೆ ಭೇಟಿ ನೀಡಿ.
• ಅಲ್ಲಿ ಲಭ್ಯವಿರುವ ಅರ್ಜಿ ನಮೂನೆಯನ್ನು ಭರ್ತಿ ಮಾಡಿ.
• ಅಗತ್ಯವಿರುವ ದಾಖಲೆಗಳೊಂದಿಗೆ ಅರ್ಜಿಯನ್ನು ಸಲ್ಲಿಸಿ.

Also Read : ಪಿಎಂ ಕಿಸಾನ್ ಯೋಜನೆ : ಕರ್ನಾಟಕದ 5 ಲಕ್ಷ ರೈತರಿಗೆ ಸಿಗಲ್ಲ ಹಣ

ಅಗತ್ಯವಿರುವ ದಾಖಲೆಗಳು:

• ಆಧಾರ್ ಕಾರ್ಡ್
• ಬ್ಯಾಂಕ್ ಪಾಸ್‌ಬುಕ್
• ಜಮೀನಿನ ಪಹಣಿ (RTC) ಅಥವಾ ಗುತ್ತಿಗೆ ಒಪ್ಪಂದದ ದಾಖಲೆ
• ಬಿತ್ತನೆ ದೃಢೀಕರಣ ಪತ್ರ (ಗ್ರಾಮ ಲೆಕ್ಕಿಗರಿಂದ)
• ಬೆಳೆ ಬಿತ್ತನೆ ದೃಢೀಕರಣ ಪತ್ರ

ಕರ್ನಾಟಕದಲ್ಲಿ ಪ್ರಧಾನ ಮಂತ್ರಿ ಫಸಲ್ ಬಿಮಾ ಯೋಜನೆ

ಕರ್ನಾಟಕದಲ್ಲಿಯೂ PMFBY ಯೋಜನೆಯು ಯಶಸ್ವಿಯಾಗಿ ಜಾರಿಯಲ್ಲಿದೆ. ಪ್ರತಿ ಋತುವಿನಲ್ಲಿ (ಖಾರಿಫ್ ಮತ್ತು ರಬಿ) ಅಧಿಸೂಚಿತ ಬೆಳೆಗಳಿಗೆ ನೋಂದಾಯಿಸಲು ಕೃಷಿ ಇಲಾಖೆ ಸೂಚನೆಗಳನ್ನು ನೀಡುತ್ತದೆ.

ರೈತರು ತಮ್ಮ ಜಿಲ್ಲೆಗಳಲ್ಲಿ ಅಧಿಸೂಚಿತ ಬೆಳೆಗಳು ಮತ್ತು ಅದಕ್ಕೆ ಸಂಬಂಧಿಸಿದ ಕಟ್-ಆಫ್ ದಿನಾಂಕಗಳ ಬಗ್ಗೆ ಕೃಷಿ ಇಲಾಖೆ ಅಥವಾ ವಿಮಾ ಕಂಪನಿಗಳಿಂದ ಮಾಹಿತಿ ಪಡೆಯಬಹುದು. ಖಾರಿಫ್ 2025 ಗಾಗಿ ಜುಲೈ 31, 2025 ಕೊನೆಯ ದಿನಾಂಕವಾಗಿದೆ.

Also Read : ಗೃಹಲಕ್ಷ್ಮೀ ಸಂಘದಿಂದ 5000 ರೂ. : ಗೃಹಿಣಿಯರಿಗೆ ಏನಿದು ಗುಡ್‌ನ್ಯೂಸ್‌

ಹೆಚ್ಚಿನ ಮಾಹಿತಿಗಾಗಿ, ನೀವು PMFBY ಅಧಿಕೃತ ವೆಬ್‌ಸೈಟ್‌ಗೆ ಭೇಟಿ ನೀಡಬಹುದು ಅಥವಾ ಟೋಲ್-ಫ್ರೀ ಸಹಾಯವಾಣಿ ಸಂಖ್ಯೆ 14447 ಅನ್ನು ಸಂಪರ್ಕಿಸಬಹುದು.

Pradhan Mantri Fasal Bima Yojana (PMFBY): How to apply ?