100 ರೂಪಾಯಿ ನೋಟು ಚಲಾವಣೆಯಲ್ಲಿ ಎಚ್ಚರಿಕೆ; ಆರ್ಬಿಐ ಮಹತ್ವದ ಸೂಚನೆ
ಮಾರುಕಟ್ಟೆಯಲ್ಲಿ ನಕಲಿ 100 ರೂಪಾಯಿ ನೋಟುಗಳ ಪ್ರಕರಣಗಳು ಹೆಚ್ಚುತ್ತಿರುವ ಹಿನ್ನೆಲೆ, ಗ್ರಾಹಕರು ಮೋಸಕ್ಕೆ ಒಳಗಾಗದಂತೆ ಅಸಲಿ ನೋಟನ್ನು ಗುರುತಿಸುವ ಪ್ರಮುಖ ಭದ್ರತಾ ಲಕ್ಷಣಗಳ ಬಗ್ಗೆ ಆರ್ಬಿಐ ಸ್ಪಷ್ಟ ಸೂಚನೆ ನೀಡಿದೆ.
ದಿನನಿತ್ಯದ ಖರೀದಿ, ಮಾರಾಟದ ವೇಳೆ ನಮ್ಮ ಕೈಗೆ ಬರುವ 100 ರೂಪಾಯಿ ನೋಟು ಯಾವಾಗಲೂ ಅಸಲಿಯೇ ಇರಬೇಕೆಂದಿಲ್ಲ. ಇತ್ತೀಚಿನ ದಿನಗಳಲ್ಲಿ ನಕಲಿ ಕರೆನ್ಸಿ ಪ್ರಕರಣಗಳು ಮತ್ತೆ ಗಮನ ಸೆಳೆಯುತ್ತಿರುವ ಹಿನ್ನೆಲೆಯಲ್ಲಿ, ಗ್ರಾಹಕರು ಎಚ್ಚರಿಕೆಯಿಂದ ಇರಬೇಕೆಂದು ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್ಬಿಐ) ಸಲಹೆ ನೀಡಿದೆ.
ಆರ್ಬಿಐ ತನ್ನ ಅಧಿಕೃತ ಮಾಹಿತಿಯಲ್ಲಿ 100 ರೂಪಾಯಿ ನೋಟಿನ ಅಸಲಿತನವನ್ನು ಗುರುತಿಸಲು ಹಲವು ಭದ್ರತಾ ಲಕ್ಷಣಗಳನ್ನು ವಿವರಿಸಿದೆ. ಈ ಗುರುತುಗಳನ್ನು ಗಮನಿಸಿದರೆ ನಕಲಿ ಮತ್ತು ಅಸಲಿ ನೋಟಿನ ನಡುವಿನ ವ್ಯತ್ಯಾಸವನ್ನು ಸುಲಭವಾಗಿ ತಿಳಿದುಕೊಳ್ಳಬಹುದು.
ನೋಟಿನ ಕೆಳಭಾಗದ ಎಡಬದಿಯಲ್ಲಿ ಇರುವ ‘100’ ಮೌಲ್ಯದ ಪಾರದರ್ಶಕ ಭದ್ರತಾ ಗುರುತು ಬೆಳಕಿಗೆ ಹಿಡಿದಾಗ ಸ್ಪಷ್ಟವಾಗಿ ಕಾಣಬೇಕು. ಇದೇ ವೇಳೆ ನೋಟಿನ ಮೇಲೆ ‘100’ ಎಂಬ ಮೌಲ್ಯ ದೇವನಾಗರಿ ಲಿಪಿಯಲ್ಲಿಯೂ ಮುದ್ರಿತವಾಗಿರುತ್ತದೆ.
ನೋಟಿನ ಮುಂಭಾಗದ ಮಧ್ಯದಲ್ಲಿ ಮಹಾತ್ಮ ಗಾಂಧೀಜಿ ಅವರ ಚಿತ್ರ ಇರುವುದು ಪ್ರಮುಖ ಲಕ್ಷಣವಾಗಿದೆ. ಬಲಭಾಗದಲ್ಲಿ ಆರ್ಬಿಐ ಗವರ್ನರ್ ಅವರ ಸಹಿ, ಭರವಸೆ ಘೋಷಣೆ ಹಾಗೂ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಚಿಹ್ನೆ ಕಾಣಿಸಬೇಕು.
ಇದರ ಜೊತೆಗೆ, ಮೇಲಿನ ಎಡಭಾಗದಲ್ಲಿ ದೊಡ್ಡ ಅಂಕಿಗಳೊಂದಿಗೆ ಸೀರಿಯಲ್ ನಂಬರ್ ಪ್ಯಾನೆಲ್ ಇರುತ್ತದೆ. ಕೆಳಗಿನ ಬಲಭಾಗದಲ್ಲಿ ಅಶೋಕ ಸ್ತಂಭದ ಚಿಹ್ನೆ ಸ್ಪಷ್ಟವಾಗಿ ಮುದ್ರಿತವಾಗಿರುತ್ತದೆ. ಈ ಎಲ್ಲಾ ಭದ್ರತಾ ಲಕ್ಷಣಗಳು ಸರಿಯಾಗಿದ್ದರೆ ಅದು ಅಸಲಿ 100 ರೂಪಾಯಿ ನೋಟಾಗಿರುವ ಸಾಧ್ಯತೆ ಹೆಚ್ಚು.
ಯಾವುದೇ ಅನುಮಾನಾಸ್ಪದ ನೋಟು ಕೈಗೆ ಬಂದರೆ ಅದನ್ನು ಪರಿಶೀಲಿಸದೆ ಬಳಸುವುದಕ್ಕಿಂತ ಮೊದಲು ಬ್ಯಾಂಕ್ನಲ್ಲಿ ದೃಢೀಕರಿಸಿಕೊಳ್ಳುವುದು ಉತ್ತಮ. ಸ್ವಲ್ಪ ಎಚ್ಚರಿಕೆ ವಹಿಸಿದರೆ ನಕಲಿ ನೋಟುಗಳಿಂದ ಉಂಟಾಗುವ ಆರ್ಥಿಕ ನಷ್ಟ ಹಾಗೂ ಮೋಸದಿಂದ ನಿಮ್ಮನ್ನು ನೀವು ರಕ್ಷಿಸಿಕೊಳ್ಳಬಹುದು.
