ಪ್ರಿಯಕರನಿಂದ ಮಹಿಳೆಯ ಭೀಕರ ಕೊಲೆ: ಶವದ ಮುಂದೆ ‘ಮೊಸಳೆ ಕಣ್ಣೀರು’ ಸುರಿಸಿದ್ದವ ಅರೆಸ್ಟ್!

Crime News Today: ಬಾಗಲಕೋಟೆ: ಅಕ್ರಮ ಸಂಬಂಧದ ಶಂಕೆಯಿಂದ ವ್ಯಕ್ತಿಯೊಬ್ಬ ತನ್ನ ಪ್ರಿಯತಮೆಯನ್ನೇ ಕತ್ತು ಹಿಸುಕಿ ಕೊಂದಿರುವ ಘಟನೆ ಜಮಖಂಡಿ ತಾಲ್ಲೂಕಿನ ಹಿರೆಪಡಸಲಗಿ ಗ್ರಾಮದಲ್ಲಿ ನಡೆದಿದೆ. ಘಟನೆ ನಡೆದ ನಂತರ ಏನೂ ಅರಿಯದವನಂತೆ ಶವದ ಮುಂದೆ ನಿಂತು ಹೈಡ್ರಾಮಾ ಮಾಡಿದ್ದ 67 ವರ್ಷದ ವೃದ್ಧನನ್ನು ಸಾವಳಗಿ ಪೊಲೀಸರು ಬಂಧಿಸಿದ್ದಾರೆ.

ಘಟನೆಯ ಹಿನ್ನೆಲೆ

ಕೊಲೆಯಾದ ಮಹಿಳೆಯನ್ನು ಯಮನವ್ವ (40) ಎಂದು ಗುರುತಿಸಲಾಗಿದೆ. ಈಕೆ ಸುಮಾರು 20 ವರ್ಷಗಳ ಹಿಂದೆಯೇ ಪತಿಯಿಂದ ವಿಚ್ಛೇದನ ಪಡೆದು ಒಂಟಿಯಾಗಿ ವಾಸಿಸುತ್ತಿದ್ದಳು. ಈ ವೇಳೆ ಆಕೆಗೆ ಅದೇ ಗ್ರಾಮದ ಶ್ರೀಶೈಲ ಪಾಟಿಲ್ (67) ಎಂಬುವವನ ಪರಿಚಯವಾಗಿ, ಅವರಿಬ್ಬರ ನಡುವೆ ಅಕ್ರಮ ಸಂಬಂಧ ಬೆಳೆದಿತ್ತು.

ಕೊಲೆಗೆ ಕಾರಣವೇನು?

ಪೊಲೀಸ್ ತನಿಖೆಯ ಪ್ರಕಾರ, ಇತ್ತೀಚೆಗೆ ಯಮನವ್ವ ಮತ್ತೊಬ್ಬ 27 ವರ್ಷದ ಯುವಕನೊಂದಿಗೆ ಸಂಪರ್ಕ ಹೊಂದಿದ್ದಾಳೆ ಎಂಬ ವಿಷಯ ಶ್ರೀಶೈಲನಿಗೆ ತಿಳಿದಿತ್ತು. ಇದರಿಂದ ತೀವ್ರ ಆಕ್ರೋಶಗೊಂಡಿದ್ದ ಆತ, ಜನವರಿ 14ರ ರಾತ್ರಿ ಹಿರೆಪಡಸಲಗಿ ಗ್ರಾಮದ ತೋಟದ ಮನೆಯಲ್ಲಿದ್ದ ಯಮನವ್ವಳೊಂದಿಗೆ ಜಗಳವಾಡಿದ್ದಾನೆ. ವಾಗ್ವಾದ ತಾರಕಕ್ಕೇರಿದಾಗ ಶ್ರೀಶೈಲನು ಆಕೆಯ ಕಿವಿಯ ಭಾಗಕ್ಕೆ ಬಲವಾಗಿ ಹೊಡೆದು, ನಂತರ ಕತ್ತು ಹಿಸುಕಿ ಉಸಿರುಗಟ್ಟಿಸಿ ಕೊಲೆ ಮಾಡಿದ್ದಾನೆ.

ಆರೋಪಿಯ ಹೈಡ್ರಾಮಾ ಮತ್ತು ಮೊಸಳೆ ಕಣ್ಣೀರು

ಕೊಲೆ ಮಾಡಿದ ನಂತರ ಗಾಬರಿಗೊಂಡ ಆರೋಪಿಯು ಅಲ್ಲಿಂದ ಪರಾರಿಯಾಗಿದ್ದನು. ಆದರೆ, ಮರುದಿನ ಬೆಳಿಗ್ಗೆ ತಾನೇ ಬಂದು ಮನೆಯ ಬಾಗಿಲು ತೆರೆದು, ಯಮನವ್ವ ಮೃತಪಟ್ಟಿರುವುದನ್ನು ಕಂಡು ದೊಡ್ಡದಾಗಿ ಬೊಬ್ಬೆ ಹೊಡೆದಿದ್ದಾನೆ. “ಆಕೆಗೆ ಹೃದಯಾಘಾತವಾಗಿದೆ” ಎಂದು ಕಟ್ಟುಕಥೆ ಕಟ್ಟಿ, ಶವದ ಮುಂದೆ ಕಣ್ಣೀರು ಸುರಿಸುತ್ತಾ ಊರವರನ್ನು ಮತ್ತು ಪೊಲೀಸರನ್ನು ನಂಬಿಸಲು ಹೈಡ್ರಾಮಾ ಮಾಡಿದ್ದಾನೆ.

ನಮ್ಮ ಮೆಟ್ರೋ ನೇಮಕಾತಿ 2026: ಬೆಂಗಳೂರು ಮೆಟ್ರೋದಲ್ಲಿ ಉದ್ಯೋಗಾವಕಾಶ; ಇಲ್ಲಿ ಅರ್ಜಿ ಸಲ್ಲಿಸಿ

ಪೊಲೀಸರ ತನಿಖೆಯಲ್ಲಿ ಬಯಲಾದ ಸತ್ಯ

ಯಮನವ್ವಳ ಸಾವಿನ ಬಗ್ಗೆ ಸಂಶಯ ವ್ಯಕ್ತಪಡಿಸಿದ ಸಾವಳಗಿ ಪೊಲೀಸರು ಶ್ರೀಶೈಲ ಪಾಟಿಲ್‌ನನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಿದಾಗ, ಆತನ “ಮೊಸಳೆ ಕಣ್ಣೀರಿನ” ಹಿಂದಿನ ಅಸಲಿ ಮುಖ ಬಯಲಾಗಿದೆ. ತೀವ್ರ ವಿಚಾರಣೆಯ ವೇಳೆ ತಾನೇ ಕೊಲೆ ಮಾಡಿರುವುದಾಗಿ ಆತ ಒಪ್ಪಿಕೊಂಡಿದ್ದಾನೆ.