ಹೆಂಡತಿ, ಮಕ್ಕಳಿಗೆ ವಿಡಿಯೋ ಕಾಲ್‌ ಮಾಡಿ ನೇಣು ಹಾಕಿಕೊಂಡ ಕೈಗಾ ಉದ್ಯೋಗಿ!

ಕಾರವಾರ: ಉತ್ತರ ಕನ್ನಡ ಜಿಲ್ಲೆಯ ಕೈಗಾ ಅಣು ವಿದ್ಯುತ್ ಘಟಕದ ಉದ್ಯೋಗಿಯೊಬ್ಬರು (Kaiga Employee) ತಮ್ಮ ಪತ್ನಿ ಮತ್ತು ಮಕ್ಕಳಿಗೆ ವಿಡಿಯೋ ಕಾಲ್ ಮಾಡಿ, ಅವರ ಕಣ್ಣೆದುರೇ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿರುವ ಭೀಕರ ಘಟನೆ (Karwar Crime News) ಸಂಭವಿಸಿದೆ.

ಕೈಗಾ ಘಟಕದ ಉದ್ಯೋಗಿಯಾಗಿದ್ದ ಸಚ್ಚಿದಾನಂದ ಬೀಕಾಜಿ ವಾಗ್ಳೆಕರ್ (44) ಆತ್ಮಹತ್ಯೆ ಮಾಡಿಕೊಂಡ ದುರ್ದೈವಿ. ಇವರು ಮಲ್ಲಾಪುರದ ವಸತಿಗೃಹದಲ್ಲಿ ವಾಸವಾಗಿದ್ದರು.

ಘಟನೆಯ ಹಿನ್ನೆಲೆ:

ಸಚ್ಚಿದಾನಂದ ಅವರ ಮಕ್ಕಳು ಮಂಗಳೂರಿನಲ್ಲಿ ವಿದ್ಯಾಭ್ಯಾಸ ಮಾಡುತ್ತಿದ್ದು, ಅವರ ಪತ್ನಿ ಇತಿಶ್ರೀ ಕೂಡ ಮಕ್ಕಳ ಪಾಲನೆಗಾಗಿ ಮಂಗಳೂರಿನಲ್ಲಿಯೇ ನೆಲೆಸಿದ್ದರು. ಡಿಸೆಂಬರ್ 22ರ ತಡರಾತ್ರಿ ಸುಮಾರು 11:30 ಗಂಟೆಗೆ ಸಚ್ಚಿದಾನಂದ ಅವರು ಮಂಗಳೂರಿನಲ್ಲಿದ್ದ ಪತ್ನಿಗೆ ವಿಡಿಯೋ ಕಾಲ್ ಮಾಡಿದ್ದಾರೆ.

ಕಣ್ಣೆದುರೇ ನಡೆದ ಭೀಕರ ದೃಶ್ಯ:

ಪತ್ನಿ ಮತ್ತು ಮಕ್ಕಳೊಂದಿಗೆ ಕೆಲಕಾಲ ಮಾತನಾಡಿದ ಸಚ್ಚಿದಾನಂದ, ಹಠಾತ್ತಾಗಿ “ನಾನೀಗ ಏನು ಮಾಡುತ್ತೇನೆ ನೋಡಿ” ಎಂದು ಹೇಳಿದ್ದಾರೆ. ಅವರ ಮಾತಿನ ಅರ್ಥ ತಿಳಿಯದೆ ಪತ್ನಿ ಮತ್ತು ಮಕ್ಕಳು ಕಾಯುತ್ತಿದ್ದಂತೆಯೇ, ಮೊಬೈಲ್ ಕ್ಯಾಮೆರಾ ಮುಂದೆಯೇ ಕೋಣೆಯೊಳಗೆ ಹೋದ ಅವರು ಸ್ಟೂಲ್ ಹತ್ತಿ ನಿಂತಿದ್ದಾರೆ.

ನಂತರ ಫ್ಯಾನಿಗೆ ಹಗ್ಗ ಕಟ್ಟಿ ಕೊರಳಿಗೆ ಹಾಕಿಕೊಂಡಿದ್ದಾರೆ. ಇದನ್ನು ಕಂಡು ಗಾಬರಿಗೊಂಡ ಕುಟುಂಬದವರು ಮೊಬೈಲ್ ಮೂಲಕವೇ “ಬೇಡ.. ಬೇಡ..” ಎಂದು ಕಿರುಚುತ್ತಾ, ಕೈಮುಗಿದು ಅಂಗಲಾಚಿದ್ದಾರೆ. ಆದರೆ ಯಾವುದಕ್ಕೂ ಕಿವಿಗೊಡದ ಸಚ್ಚಿದಾನಂದ, ವಿಡಿಯೋ ಕಾಲ್ ಚಾಲನೆಯಲ್ಲಿರುವಾಗಲೇ ಸ್ಟೂಲಿನಿಂದ ಜಿಗಿದು ಪ್ರಾಣ ಬಿಟ್ಟಿದ್ದಾರೆ.

ಇದನ್ನೂ ಓದಿ: ಸ್ವಂತ ವಾಹನ ಖರೀದಿಗೆ ಸಹಾಯಧನ; ಸ್ವಾವಲಂಬಿ ಸಾರಥಿ ಯೋಜನೆಯ ಪ್ರಯೋಜನಗಳಿವು

ದಂಗಾದ ಕುಟುಂಬ ಮತ್ತು ಸಹೋದ್ಯೋಗಿಗಳು:

ತಮ್ಮ ಪ್ರೀತಿಪಾತ್ರ ವ್ಯಕ್ತಿ ಕಣ್ಣೆದುರೇ ಸಾವನ್ನಪ್ಪಿದ ದೃಶ್ಯವನ್ನು ನೋಡಿ ಕುಟುಂಬದವರು ಅಕ್ಷರಶಃ ದಂಗಾಗಿದ್ದಾರೆ. ಘಟನಾ ಸ್ಥಳಕ್ಕೆ ಪೊಲೀಸರು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದು, ಮೃತದೇಹವನ್ನು ಮರಣೋತ್ತರ ಪರೀಕ್ಷೆಗೆ ರವಾನಿಸಲಾಗಿದೆ. ಆತ್ಮಹತ್ಯೆಗೆ ನಿಖರವಾದ ಕಾರಣವೇನು ಎಂಬುದು ಇನ್ನು ತಿಳಿದುಬಂದಿಲ್ಲ. ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ.

ಗಮನಿಸಿ:
ಜೀವನದಲ್ಲಿ ಏನೇ ಕಷ್ಟಗಳಿದ್ದರೂ ಆತ್ಮಹತ್ಯೆ ಪರಿಹಾರವಲ್ಲ. ಮಾನಸಿಕ ಒತ್ತಡ ಅಥವಾ ಸಮಸ್ಯೆಗಳಿದ್ದಲ್ಲಿ ಸಹಾಯಕ್ಕಾಗಿ ಈ ಸಹಾಯವಾಣಿಗಳನ್ನು ಸಂಪರ್ಕಿಸಿ: ಆರೋಗ್ಯ ಸಹಾಯವಾಣಿ: 104 ಅಥವಾ ನಿಮ್ಹಾನ್ಸ್‌ (NIMHANS): 080-46110007.