Kohinoor Diamond : ಕರ್ನಾಟಕದಲ್ಲೇ ಸಿಕ್ಕಿತ್ತು ಕೊಹಿನೂರ್ ವಜ್ರ : ದುಸ್ಥಿತಿಯಲ್ಲಿದೆ ಜಗತ್ಪ್ರಸಿದ್ಧ ವಜ್ರ ಸಿಕ್ಕ ಈ ಜಾಗ
ಯಾದಗಿರಿ : Kohinoor Diamond : ಬ್ರಿಟಿನ್ ರಾಣಿ ಎರಡನೇ ಎಲೆಜಬೆತ್ ಮರಣದ ಬಳಿಕ ಕೊಹಿನೂರ್ ವಿಚಾರವಾಗಿ ಸಾಕಷ್ಟು ಚರ್ಚೆಗಳು ಸೋಶಿಯಲ್ ಮೀಡಿಯಾದಲ್ಲಿ ಆರಂಭಗೊಂಡಿದೆ. ಈಗಾಗಲೇ ಬ್ರಿಟನ್ನಲ್ಲಿರುವ ಬೆಲೆಬಾಳುವ ಈ ಕೊಹಿನೂರ್ ವಜ್ರವನ್ನು ಭಾರತಕ್ಕೆ ವಾಪಾಸ್ ಕೊಡಿ ಎಂಬ ಬೇಡಿಕೆಗಳೂ ಸಹ ಕೇಳಿ ಬರ್ತಿದೆ. ಅಂದಹಾಗೆ ಬ್ರಿಟನ್ನ ದೀರ್ಘಾವಧಿ ಕಾಲದ ರಾಣಿ ಎಲೆಜಬೆತ್ ತನ್ನ ಕಿರೀಟದಲ್ಲಿ ಧರಿಸುತ್ತಿದ್ದ ಈ ಕೊಹಿನೂರ್ ವಜ್ರವು ಕರ್ನಾಟಕಕ್ಕೆ ಸೇರಿದ್ದಾಗಿದೆ. ಆದರೆ ಇದೀಗ ಕೊಹಿನೂರ್ ವಜ್ರ ಸಿಕ್ಕ ಜಾಗವು ಸಂಪೂರ್ಣ ಪಾಳು ಬಿದ್ದಿದೆ.
ಶಹಾಪುರ ತಾಲೂಕಿನ ಕೊಳ್ಳೂರು ಗ್ರಾಮದ ಬಳಿಯಲ್ಲೇ ಇರುವ ಕೃಷ್ಣಾ ನದಿಯ ತಟದಲ್ಲಿ ಈ ಬೆಲೆಬಾಳುವ ವಜ್ರವು ಸಿಕ್ಕಿತ್ತು. ಹೀಗಾಗಿ ಬ್ರಿಟನ್ನ ರಾಣಿ ಧರಿಸುತ್ತಿದ್ದ ಬೆಲೆಬಾಳುವ ಕಿರೀಟದಲ್ಲಿ ಕರ್ನಾಟಕದ್ದೂ ಪಾಲಿದೆ ಎಂಬುದನ್ನು ಹೆಮ್ಮೆಯಿಂದ ಹೇಳಿಕೊಳ್ಳಬಹುದು.
ಬ್ರಿಟನ್ನ ರಾಣಿಯಾಗಿದ್ದ 2ನೇ ಎಲಿಜಬೆತ್ ಧರಿಸುತ್ತಿದ್ದ ಕಿರೀಟದಲ್ಲಿ 2900 ವಜ್ರದ ಹರಳುಗಳು ಇದ್ದವು. ಇದರಲ್ಲಿ ಅತ್ಯಂತ ಬೆಲೆಬಾಳುವ ವಜ್ರವು ಕೊಹಿನೂರ್ ಆಗಿತ್ತು.ಈ ಕೊಹಿನೂರ್ ವಜ್ರವು 105.06 ಕ್ಯಾರೆಟ್ ಶುಭ್ರತೆಯನ್ನು ಹೊಂದಿದೆ. ಈ ಕಿರೀಟದ ಬೆಲೆಯು ಬರೋಬ್ಬರಿ 4500 ಕೋಟಿ ರೂಪಾಯಿ ಮೌಲ್ಯವಾಗಿದೆ. ಬ್ರಿಟನ್ನ ರಾಣಿ ಹಾಗೂ ಆಕೆ ಧರಿಸುತ್ತಿದ್ದ ವಜ್ರದ ಕಿರೀಟ ಮತ್ತು ಅದರಲ್ಲಿರುವ ಕೊಹಿನೂರ್ ವಜ್ರವೆನೋ ಇಷ್ಟೆಲ್ಲ ಪ್ರಸಿದ್ಧಿಯನ್ನು ಪಡೆದಿದೆ. ಆದರೆ ಇಂತಹ ವಜ್ರವನ್ನು ವಿಶ್ವಕ್ಕೆ ಕೊಟ್ಟಂತಹ ಜಾಗ ಮಾತ್ರ ಯಾವುದೇ ಅಭಿವೃದ್ಧಿಯನ್ನು ಕಾಣದೇ ಸಂಪೂರ್ಣ ಪಾಳು ಬಿದ್ದಿದೆ.
ವಿಶ್ವ ಪ್ರಸಿದ್ಧ ಕೊಹಿನೂರ್ ವಜ್ರವು ಕೃಷ್ಣಾ ನದಿ ದಡದಲ್ಲಿರುವ ಕೊಳ್ಳೂರು ಗಣಿಯಲ್ಲಿ ಸಿಕ್ಕಿತ್ತು ಎಂಬ ವಿಚಾರವನ್ನು ಖ್ಯಾರ ವಜ್ರ ಪರೀಕ್ಷಕ ಡಾ. ಬಾಲೆ ಹಾಗೂ ಲೇಖಕ ರಾಬರ್ಟ್ ಸಿವಿಲ್ ತಮ್ಮ ಫಾರ್ಗಟನ್ ಎಂಪೈರ್ ಎಂಬ ಪುಸ್ತಕದಲ್ಲಿ ವರ್ಣಿಸಿದ್ದಾರೆ. ಈ ಕೃತಿಯಲ್ಲಿರುವ ಮಾಹಿತಿಯ ಪ್ರಕಾರ ಬೆಲೆ ಬಾಳುವ ಕೊಹಿನೂರ್ ವಜ್ರವು 1656ರಲ್ಲಿ ವಜ್ರದ ಗಣಿ ಮಾಲೀಕ ಮೀರ್ ಜುಮುಲಾನಿಗೆ ಸಿಕ್ಕಿತ್ತು. ಈತ ಈ ವಜ್ರವನ್ನು ಗೋಲ್ಕೊಂಡ ಸುಲ್ತಾನನಿಗೆ ನೀಡಿದ್ದ. ಗೋಲ್ಕೊಂಡ ಸುಲ್ತಾನ ಕಾಲಾಂತರದಲ್ಲಿ ಈ ವಜ್ರವನ್ನು ದೆಹಲಿಯ ಸುಲ್ತಾನ ಶಹಜಹಾನನಿಗೆ ಕಾಣಿಕೆ ರೂಪದಲ್ಲಿ ನೀಡಿದ್ದನು ಎನ್ನಲಾಗಿದೆ.
ಇದಾದ ಬಳಿಕ 1739ರಲ್ಲಿ ನಾದಿರ್ ಶಾ ದೆಹಲಿ ಮೇಲೆ ದಾಳಿ ಮಾಡಿದ ಸಂದರ್ಭದಲ್ಲಿ ಈ ವಜ್ರವು ಮೊಘಲ್ ರಾಜನಿಂದ ಈತನ ಕೈಗೆ ಸೇರಿತ್ತು. ಈತ ಈ ವಜ್ರದ ಸೌಂದರ್ಯವನ್ನು ಕಂಡು ಕೊಹಿನೂರ್ ಎಂದು ಉದ್ಘರಿಸಿದ್ದನಂತೆ. ಅಂದಿನಿಂದ ಈ ಬೆಲೆಬಾಳುವ ವಜ್ರವು ಕೊಹಿನೂರ್ ಎಂಬ ಹೆಸರನ್ನುಪಡೆದುಕೊಂಡಿತಯ. 1813ರಲ್ಲಿ ಲಾಹೋರ್ನ ರಣಜೀತ್ ಸಿಂಗ್ಗೆ ಕೊಹಿನೂರ್ ಉಡುಗೊರೆ ರೂಪದಲ್ಲಿ ಸಿಕ್ಕಿತ್ತು. 1849ರಲ್ಲಿ ಬ್ರಿಟಿಷ್ ಅಧಿಕಾರಿ ಸರ್ ಜಾನ್ ಲಾರೆನ್ಸ್ ಪಂಜಾಬ್ ಪ್ರಾಂತ್ಯವನ್ನು ವಶಪಡಿಸಿಕೊಂಡಾಗ ಕೊಹಿನೂರ್ ವಜ್ರ ಅವನ ಮೂಲಕ ಇಂಗ್ಲೆಂಡ್ ರಾಣಿ ಮುಡಿಗೆ ಸೇರಿತ್ತು.
Kohinoor Diamond In Britain Queen Elizabeth 2 Crown Was Extracted From Yadgir District Kollura Village
Comments are closed.