ಎಚ್ಚರಿಕೆ: ನಿಮ್ಮ ಫೋನ್ ನೆಟ್ವರ್ಕ್ 5G ಯಿಂದ 2G ಗೆ ಬದಲಾಗುತ್ತಾ? ತಕ್ಷಣ ಹೀಗೆ ಮಾಡಿ
Stop hack phone to 5G to 2G: ಸೈಬರ್ ಅಪರಾಧಿಗಳು ಈಗ ಸಾರ್ವಜನಿಕರ ಫೋನ್ ನೆಟ್ವರ್ಕ್ ಹೈಜಾಕ್ ಮಾಡುವ ಮೂಲಕ ವಂಚಿಸಲು ಶುರುಮಾಡಿದ್ದಾರೆ. ಪೋರ್ಟಬಲ್ ಸಾಧನಗಳನ್ನು ಬಳಸಿಕೊಂಡು ನಿಮ್ಮ ಫೋನಿನ ಸುರಕ್ಷಿತ ನೆಟ್ವರ್ಕ್ ಅನ್ನು ದುರ್ಬಲಗೊಳಿಸಿ, ನಕಲಿ ಸಂದೇಶಗಳನ್ನು ಕಳುಹಿಸುವ ಹೊಸ ತಂತ್ರ ಇದೀಗ ಬೆಳಕಿಗೆ ಬಂದಿದೆ.
ವಂಚನೆ ನಡೆಯುವುದು ಹೇಗೆ?
ವಂಚಕರು ‘ಎಸ್ಎಮ್ಎಸ್ ಬ್ಲಾಸ್ಟರ್’ (SMS Blaster) ಅಥವಾ ‘ಐಎಂಎಸ್ಐ ಕ್ಯಾಚರ್’ (IMSI Catcher) ಎಂಬ ಸಾಧನಗಳನ್ನು ಬಳಸುತ್ತಾರೆ. ಇವು ನಕಲಿ ಮೊಬೈಲ್ ಟವರ್ಗಳಂತೆ ಕೆಲಸ ಮಾಡುತ್ತವೆ. ನಿಮ್ಮ ಫೋನ್ ಈ ನಕಲಿ ಟವರ್ಗೆ ಕನೆಕ್ಟ್ ಆದ ತಕ್ಷಣ, ಅದು ಸುರಕ್ಷಿತವಾದ 5G ಅಥವಾ 4G ನೆಟ್ವರ್ಕ್ನಿಂದ ಅತ್ಯಂತ ದುರ್ಬಲವಾದ 2G ನೆಟ್ವರ್ಕ್ಗೆ ಬದಲಾಗುತ್ತದೆ. ಒಮ್ಮೆ 2G ಗೆ ಬದಲಾದ ಮೇಲೆ, ಅಪರಾಧಿಗಳಿಗೆ ನಿಮ್ಮ ಫೋನ್ಗೆ ನಕಲಿ ಸಂದೇಶಗಳನ್ನು ಕಳುಹಿಸುವುದು ಸುಲಭವಾಗುತ್ತದೆ.
ಬರುವ ಸಂದೇಶಗಳು ಯಾವ ರೀತಿ ಇರುತ್ತವೆ?
ನಿಮ್ಮ ಫೋನ್ಗೆ ಬ್ಯಾಂಕ್ಗಳ ಹೆಸರಿನಲ್ಲಿ (ಉದಾಹರಣೆಗೆ: SBI-SEC, HDFC-BANK) ಅಧಿಕೃತವಾಗಿ ಕಾಣುವ ಸಂದೇಶಗಳು ಬರತೊಡಗುತ್ತವೆ. ಅವುಗಳಲ್ಲಿ ಸಾಮಾನ್ಯವಾಗಿ ಇಂತಹ ವಿಷಯಗಳಿರುತ್ತವೆ:
- ಬ್ಯಾಂಕ್ ಕೆವೈಸಿ (KYC) ಅಪ್ಡೇಟ್ ಮಾಡದಿದ್ದರೆ ಖಾತೆ ಸ್ಥಗಿತಗೊಳ್ಳುತ್ತದೆ.
- ವಿದ್ಯುತ್ ಬಿಲ್ ಪಾವತಿಸದ ಕಾರಣ ಇಂದು ರಾತ್ರಿ ಕರೆಂಟ್ ಕಡಿತವಾಗುತ್ತದೆ.
- ನಿಮ್ಮ ರಿವಾರ್ಡ್ ಪಾಯಿಂಟ್ಸ್ ಅವಧಿ ಮುಗಿಯುತ್ತಿದೆ, ತಕ್ಷಣ ನಗದೀಕರಿಸಿ.
- ಪಾರ್ಟ್ ಟೈಮ್ ಕೆಲಸದ ಆಮಿಷ ಅಥವಾ ಕೊರಿಯರ್ ಪಾರ್ಸೆಲ್ ಸಿಕ್ಕಿಹಾಕಿಕೊಂಡಿರುವ ಸುಳ್ಳು ಮಾಹಿತಿ.
ಭೀತಿ ಹುಟ್ಟಿಸುವ ಅಂಕಿ-ಅಂಶಗಳು:
ಕೇಂದ್ರ ಗೃಹ ಸಚಿವಾಲಯದ ವರದಿಯ ಪ್ರಕಾರ, ಟೆಲಿಕಾಂ ಸಂಬಂಧಿತ ವಂಚನೆ ಪ್ರಕರಣಗಳು ಕಳೆದ ಒಂದು ವರ್ಷದಲ್ಲಿ ಶೇ. 300ರಷ್ಟು ಹೆಚ್ಚಾಗಿವೆ. ಕಳೆದ ವರ್ಷವೊಂದರಲ್ಲೇ ಭಾರತೀಯರು ಸೈಬರ್ ವಂಚನೆಯಿಂದ ಸುಮಾರು 30,000 ಕೋಟಿ ರೂಪಾಯಿಗೂ ಅಧಿಕ ಹಣ ಕಳೆದುಕೊಂಡಿದ್ದಾರೆ.
ರಾಜ್ಯದಲ್ಲಿ ವಿದ್ಯುತ್ ದರ ಪ್ರತಿ ಯೂನಿಟ್ಗೆ 1 ರೂಪಾಯಿ ಹೆಚ್ಚಳ ಸಾಧ್ಯತೆ; ಏಪ್ರಿಲ್ 1 ರಿಂದಲೇ ಜಾರಿ
ರಕ್ಷಣೆ ಪಡೆಯುವುದು ಹೇಗೆ?
ಸೈಬರ್ ತಜ್ಞರು ಈ ಕೆಳಗಿನ ಮುನ್ನೆಚ್ಚರಿಕೆಗಳನ್ನು ವಹಿಸಲು ಸೂಚಿಸಿದ್ದಾರೆ:
- 2G ಸಂಪರ್ಕ ಸ್ಥಗಿತಗೊಳಿಸಿ: ನಿಮ್ಮ ಫೋನಿನ ಸೆಟ್ಟಿಂಗ್ಸ್ಗೆ ಹೋಗಿ (Network Settings) ಅಲ್ಲಿ ‘Allow 2G’ ಎಂಬ ಆಯ್ಕೆಯನ್ನು ಆಫ್ ಮಾಡಿ. ಇದರಿಂದ ಫೋನ್ ನಕಲಿ ಟವರ್ಗಳಿಗೆ ಕನೆಕ್ಟ್ ಆಗುವುದು ತಪ್ಪುತ್ತದೆ.
- ಸಿಗ್ನಲ್ ಗಮನಿಸಿ: ಇದ್ದಕ್ಕಿದ್ದಂತೆ 5G ಅಥವಾ 4G ಸಿಗ್ನಲ್ ಮಾಯವಾಗಿ ಕೇವಲ 2G ಎಂದು ತೋರಿಸುತ್ತಿದ್ದರೆ ಎಚ್ಚರದಿಂದಿರಿ.
- ಅಪರಿಚಿತ ಲಿಂಕ್ ಒತ್ತಬೇಡಿ: ಯಾವುದೇ ಬ್ಯಾಂಕ್ ಅಥವಾ ಸರ್ಕಾರಿ ಸಂಸ್ಥೆಗಳು ಎಸ್ಎಮ್ಎಸ್ ಮೂಲಕ ಲಿಂಕ್ ಕಳುಹಿಸಿ ಹಣ ಪಾವತಿಸಲು ಅಥವಾ ಮಾಹಿತಿ ಕೇಳಲು ಹೇಳುವುದಿಲ್ಲ.
- ಅಧಿಕೃತ ಆ್ಯಪ್ ಬಳಸಿ: ಬ್ಯಾಂಕಿಂಗ್ ಕೆಲಸಗಳಿಗಾಗಿ ಯಾವಾಗಲೂ ಅಧಿಕೃತ ಆ್ಯಪ್ ಅಥವಾ ವೆಬ್ಸೈಟ್ ಮಾತ್ರ ಬಳಸಿ.
ವಂಚನೆಗೊಳಗಾದಲ್ಲಿ ತಕ್ಷಣ 1930 ಸಂಖ್ಯೆಗೆ ಕರೆ ಮಾಡಿ ಅಥವಾ ಸೈಬರ್ ಕ್ರೈಮ್ ಪೋರ್ಟಲ್ನಲ್ಲಿ ದೂರು ದಾಖಲಿಸಿ.
