RCB ಗಾಗಿ ಬಿಲಿಯನೇರ್ ಕನ್ನಡಿಗರ ಪ್ರಬಲ ಪೈಪೋಟಿ! ಯಾರ ಪಾಲಾಗುತ್ತೆ ಬೆಂಗಳೂರು ಟೀಂ?
ಬೆಂಗಳೂರು: ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಇತಿಹಾಸದಲ್ಲೇ ಅತ್ಯಂತ ಹೆಚ್ಚು ಅಭಿಮಾನಿಗಳನ್ನು ಹೊಂದಿರುವ ಮತ್ತು ಈ ವರ್ಷ ಚೊಚ್ಚಲ ಟ್ರೋಫಿ ಗೆದ್ದು ಬೀಗಿದ ನಮ್ಮ ನಿಮ್ಮೆಲ್ಲರ ನೆಚ್ಚಿನ ತಂಡ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್ಸಿಬಿ) ಇದೀಗ ದೊಡ್ಡ ಸುದ್ದಿಯ ಕೇಂದ್ರ ಬಿಂದುವಾಗಿದೆ. ಆರ್ಸಿಬಿ ಫ್ರಾಂಚೈಸಿಯ ಮಾಲೀಕತ್ವವನ್ನು ಹೊಂದಿರುವ ಬ್ರಿಟನ್ ಮೂಲದ ಮದ್ಯ ತಯಾರಿಕಾ ದೈತ್ಯ ಕಂಪನಿ ಡಿಯಾಜಿಯೊ ಪಿಎಲ್ಸಿ (Diageo Plc), ತಮ್ಮ ಭಾರತೀಯ ಘಟಕವಾದ ಯುನೈಟೆಡ್ ಸ್ಪಿರಿಟ್ಸ್ ಲಿಮಿಟೆಡ್ (USL) ಮೂಲಕ ಫ್ರಾಂಚೈಸಿಯನ್ನು ಮಾರಾಟ ಮಾಡಲು ನಿರ್ಧರಿಸಿದೆ. ಈ ಅಧಿಕೃತ ಘೋಷಣೆಯ ಬೆನ್ನಲ್ಲೇ, ಆರ್ಸಿಬಿಯನ್ನು ಯಾರು ಖರೀದಿಸುತ್ತಾರೆ ಎಂಬ ಕುತೂಹಲ ಎಲ್ಲೆಡೆ ಮನೆ ಮಾಡಿದೆ. ಅದರಲ್ಲೂ ಮುಖ್ಯವಾಗಿ, “ಬೆಂಗಳೂರಿನ ತಂಡವನ್ನು ನಮ್ಮ ಕನ್ನಡಿಗರೇ ಖರೀದಿಸಿ ಅದರ ಗೌರವವನ್ನು ಹೆಚ್ಚಿಸುತ್ತಾರಾ?” ಎಂಬ ಪ್ರಶ್ನೆ ಕೋಟ್ಯಂತರ ಅಭಿಮಾನಿಗಳ ಮನಸ್ಸಿನಲ್ಲಿ ಮೂಡಿದೆ.
ಇದೀಗ ಕೇಳಿಬರುತ್ತಿರುವ ಸುದ್ದಿ ಮತ್ತು ವರದಿಗಳ ಪ್ರಕಾರ, ಈ ರೇಸ್ನಲ್ಲಿ ಕೆಲವು ದೊಡ್ಡ ಹೆಸರುಗಳು ಮುಂಚೂಣಿಯಲ್ಲಿವೆ. ಅದರಲ್ಲಿ ಮುಖ್ಯವಾಗಿ, ಬೆಂಗಳೂರು ಮೂಲದ ಇಬ್ಬರು ಬಿಲಿಯನೇರ್ ಕನ್ನಡಿಗರು ಆರ್ಸಿಬಿ ಖರೀದಿಸಲು ಆಸಕ್ತಿ ತೋರಿದ್ದಾರೆ ಎಂದು ಬಲವಾಗಿ ವರದಿಯಾಗಿದೆ.
ಬಿಲಿಯನೇರ್ ಕನ್ನಡಿಗರ ಪ್ರಬಲ ಪೈಪೋಟಿ!
ಆರ್ಸಿಬಿ ಫ್ರಾಂಚೈಸಿಯ ಮೌಲ್ಯ ಈಗ ಒಂದು ಬಿಲಿಯನ್ ಡಾಲರ್ಗಿಂತಲೂ (ಸುಮಾರು 8,300 ಕೋಟಿ ರೂ.) ಹೆಚ್ಚಿದ್ದು, ಐಪಿಎಲ್ನ ಅತ್ಯಂತ ಮೌಲ್ಯಯುತ ತಂಡಗಳಲ್ಲಿ ಒಂದಾಗಿದೆ. ಇಂತಹ ದೊಡ್ಡ ಮೊತ್ತದ ಡೀಲ್ಗೆ ಕೈ ಹಾಕಲು ದೊಡ್ಡ ಆರ್ಥಿಕ ಶಕ್ತಿ ಬೇಕಾಗುತ್ತದೆ. ಈ ನಿಟ್ಟಿನಲ್ಲಿ, ಬೆಂಗಳೂರು ಮೂಲದ ಇಬ್ಬರು ಯಶಸ್ವಿ ಉದ್ಯಮಿಗಳ ಹೆಸರುಗಳು ಪ್ರಮುಖವಾಗಿ ಕೇಳಿಬಂದಿವೆ.
ನಿಖಿಲ್ ಕಾಮತ್:
ಡಿಸ್ಕೌಂಟ್ ಬ್ರೋಕರೇಜ್ ಪ್ಲಾಟ್ಫಾರ್ಮ್ ಜೆರೋಧಾ (Zerodha) ಸಹ-ಸಂಸ್ಥಾಪಕರಾಗಿರುವ ನಿಖಿಲ್ ಕಾಮತ್ ಅವರು ಕೇವಲ 38 ವರ್ಷಕ್ಕೆ ಜಾಗತಿಕವಾಗಿ ಯಶಸ್ಸನ್ನು ಕಂಡಿರುವ ಕನ್ನಡಿಗ.
ಫೋರ್ಬ್ಸ್ ಅಂದಾಜಿನ ಪ್ರಕಾರ, ಅವರ ನಿವ್ವಳ ಆಸ್ತಿ 2.5 ಶತಕೋಟಿ ಡಾಲರ್ (ಸುಮಾರು 20,750 ಕೋಟಿ ರೂ.) ಇದೆ.
ಯುವ ಮತ್ತು ದೂರದೃಷ್ಟಿಯ ಉದ್ಯಮಿಯಾಗಿರುವ ಇವರು, ಆರ್ಸಿಬಿಯ ಯುವ ಅಭಿಮಾನಿ ಬಳಗದ ಜೊತೆ ಸುಲಭವಾಗಿ ಸಂಪರ್ಕ ಸಾಧಿಸುವ ಸಾಮರ್ಥ್ಯ ಹೊಂದಿದ್ದಾರೆ.
ರಂಜನ್ ಪೈ:
ಮಣಿಪಾಲ್ ಎಜುಕೇಶನ್ ಅಂಡ್ ಮೆಡಿಕಲ್ ಗ್ರೂಪ್ (MEMG) ಅಧ್ಯಕ್ಷರಾಗಿರುವ ರಂಜನ್ ಪೈ ಅವರು ಕೂಡ ಕರ್ನಾಟಕ ಮೂಲದ ಪ್ರಭಾವಿ ಉದ್ಯಮಿ.
ಫೋರ್ಬ್ಸ್ ಪ್ರಕಾರ, ಅವರ ನಿವ್ವಳ ಆಸ್ತಿ 2.8 ಶತಕೋಟಿ ಡಾಲರ್ (ಸುಮಾರು 23,240 ಕೋಟಿ ರೂ.) ಇದೆ.
ಶಿಕ್ಷಣ ಮತ್ತು ಆರೋಗ್ಯ ಕ್ಷೇತ್ರದಲ್ಲಿ ದೊಡ್ಡ ಸಾಮ್ರಾಜ್ಯವನ್ನೇ ಕಟ್ಟಿರುವ ರಂಜನ್ ಪೈ ಅವರು, ಆರ್ಸಿಬಿಯನ್ನು ಖರೀದಿಸಲು ಬೇಕಾದ ಬೃಹತ್ ಆರ್ಥಿಕ ಶಕ್ತಿ ಮತ್ತು ಉತ್ತಮ ಆಡಳಿತಾತ್ಮಕ ಹಿನ್ನೆಲೆಯನ್ನು ಹೊಂದಿದ್ದಾರೆ.
ಈ ಇಬ್ಬರು ಕನ್ನಡಿಗ ಬಿಲಿಯನೇರ್ಗಳು ಜಂಟಿಯಾಗಿ ಅಥವಾ ಒಕ್ಕೂಟವನ್ನು ರಚಿಸಿ ಆರ್ಸಿಬಿ ಖರೀದಿಸಲು ಬಿಡ್ ಮಾಡುವ ಸಾಧ್ಯತೆ ಇದೆ ಎಂದು ವರದಿಗಳು ಹೇಳುತ್ತಿವೆ. ಇದು ನಿಜವಾದರೆ, ಕನ್ನಡಿಗರ ಸ್ವಾಭಿಮಾನದ ಪ್ರತೀಕವಾಗಿರುವ ಆರ್ಸಿಬಿ, ನಮ್ಮ ರಾಜ್ಯದ ಉದ್ಯಮಿಗಳ ತೆಕ್ಕೆಗೆ ಬಂದಂತಾಗುತ್ತದೆ.
