ರಾಜ್ಯದಲ್ಲಿ ಮತ್ತೆ ಬರಲಿದೆ ಬೈಕ್​ ಆ್ಯಂಬುಲೆನ್ಸ್​ : ಹೊಸ ವಾಹನಗಳ ಖರೀದಿಗೆ ಆರ್ಥಿಕ ಇಲಾಖೆಗೆ ಪ್ರಸ್ತಾವನೆ ಸಲ್ಲಿಕೆ

ರಾಜ್ಯದಲ್ಲಿ ತುರ್ತು ಜೀವರಕ್ಷಕ ವೈದ್ಯಕೀಯ ಸೇವೆಗಳನ್ನು ಮತ್ತಷ್ಟು ಬಲಪಡಿಸಲು ಆರೋಗ್ಯ ಇಲಾಖೆಯು ಮಹತ್ವದ ಕ್ರಮ ಕೈಗೊಂಡಿದ್ದು, ಈ ಹಿಂದೆ ಸ್ಥಗಿತಗೊಂಡಿದ್ದ ಪ್ರಸಿದ್ಧ ‘ಬೈಕ್ ಆಂಬುಲೆನ್ಸ್’ ಯೋಜನೆಯನ್ನು ಪುನರಾರಂಭಿಸಲು ಸಿದ್ಧತೆ ನಡೆಸಿದೆ. ಅಪಘಾತ ಹಾಗೂ ಹೃದಯಾಘಾತದಂತಹ ಗಂಭೀರ ತುರ್ತು ಪರಿಸ್ಥಿತಿಗಳಲ್ಲಿ ರೋಗಿಗಳಿಗೆ ಅತ್ಯಂತ ನಿರ್ಣಾಯಕವಾಗಿರುವ ‘ ಅವಧಿಯಲ್ಲೇ ಪ್ರಾಥಮಿಕ ಚಿಕಿತ್ಸೆ ಒದಗಿಸುವುದು ಈ ಯೋಜನೆಯ ಮುಖ್ಯ ಉದ್ದೇಶವಾಗಿದೆ.

ಈ ಮಹತ್ವಾಕಾಂಕ್ಷಿ ಯೋಜನೆಗಾಗಿ ಹೊಸದಾಗಿ ಒಟ್ಟು ನೂರು ವಿಶೇಷ ದ್ವಿಚಕ್ರ ವಾಹನಗಳನ್ನು ಖರೀದಿಸಲು ಉದ್ದೇಶಿಸಲಾಗಿದ್ದು, ಅಗತ್ಯ ಅನುದಾನ ಮತ್ತು ಅನುಮತಿ ಕೋರಿ ಆರ್ಥಿಕ ಇಲಾಖೆಗೆ ಈಗಾಗಲೇ ಪ್ರಸ್ತಾವನೆ ಸಲ್ಲಿಸಲಾಗಿದೆ.
ಪ್ರಸ್ತುತ ಬೆಂಗಳೂರಿನಂತಹ ಪ್ರಮುಖ ಮಹಾನಗರಗಳಲ್ಲಿ ಟ್ರಾಫಿಕ್ ದಟ್ಟಣೆ ದಿನದಿಂದ ದಿನಕ್ಕೆ ಗಂಭೀರ ಸ್ವರೂಪ ಪಡೆದುಕೊಳ್ಳುತ್ತಿದೆ.

ಇದರಿಂದಾಗಿ ನಾಲ್ಕು ಚಕ್ರದ ಸಾಂಪ್ರದಾಯಿಕ 108 ಆಂಬುಲೆನ್ಸ್‌ಗಳು ನಿಗದಿತ 20 ನಿಮಿಷಗಳ ‘ಗೋಲ್ಡನ್ ಅವರ್’ ಸಮಯದಲ್ಲಿ ರೋಗಿಗಳನ್ನು ತಲುಪುವುದು ಕಷ್ಟಸಾಧ್ಯವಾಗುತ್ತಿದೆ. ಈ ಟ್ರಾಫಿಕ್ ಸಮಸ್ಯೆಗೆ ಬೈಕ್ ಆಂಬುಲೆನ್ಸ್‌ಗಳು ಅತ್ಯುತ್ತಮ ಪರಿಹಾರವಾಗಲಿದ್ದು, ಇವು ವಾಹನ ದಟ್ಟಣೆಯ ನಡುವೆಯೂ ಸುಲಭವಾಗಿ ಮುನ್ನುಗ್ಗಿ ರೋಗಿಯ ಬಳಿಗೆ ಅತ್ಯಂತ ಶೀಘ್ರವಾಗಿ ತಲುಪಬಲ್ಲವು.

ಕರ್ನಾಟಕದಲ್ಲಿ ಈ ಹಿಂದೆ 2015ರಲ್ಲೇ ದೇಶದಲ್ಲೇ ಮೊದಲ ಬಾರಿಗೆ ಈ ವಿಶಿಷ್ಟ ಸೇವೆಯನ್ನು ಬೆಂಗಳೂರು, ಮೈಸೂರು ಹಾಗೂ ಮಂಗಳೂರು ನಗರಗಳಲ್ಲಿ ಪ್ರಾಯೋಗಿಕವಾಗಿ ಆರಂಭಿಸಲಾಗಿತ್ತು. ಆದರೆ ಸೂಕ್ತ ನಿರ್ವಹಣೆಯ ಕೊರತೆ ಸೇರಿದಂತೆ ವಿವಿಧ ತಾಂತ್ರಿಕ ಕಾರಣಗಳಿಂದಾಗಿ 2022ರಲ್ಲಿ ಈ ಸೇವೆಯನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಲಾಗಿತ್ತು. ಇದೀಗ ನೆರೆರಾಜ್ಯಗಳಾದ ತಮಿಳುನಾಡು ಹಾಗೂ ಮಹಾರಾಷ್ಟ್ರ ಮಾದರಿಯಲ್ಲಿ ಈ ಯೋಜನೆಯನ್ನು ಇಲ್ಲಿಯೂ ಸಂಪೂರ್ಣ ಯಶಸ್ವಿಗೊಳಿಸಲು ಸರ್ಕಾರ ಮುಂದಾಗಿದೆ.

ಈ ವಿಶೇಷ ಬೈಕ್ ಆಂಬುಲೆನ್ಸ್‌ಗಳಲ್ಲಿ ಆಕ್ಸಿಜನ್ ಸಿಲಿಂಡರ್, ರಕ್ತದೊತ್ತಡ ತಪಾಸಣಾ ಉಪಕರಣ, ಗ್ಲುಕೋಮೀಟರ್, ಹೃದಯಬಡಿತ ವೀಕ್ಷಕ ಹಾಗೂ ಬ್ಯಾಂಡೇಜ್ ಸೇರಿದಂತೆ ಅಗತ್ಯ ಜೀವರಕ್ಷಕ ತುರ್ತು ವೈದ್ಯಕೀಯ ಕಿಟ್‌ಗಳು ಲಭ್ಯವಿರಲಿವೆ. ನರ್ಸಿಂಗ್ ಪದವಿ ಪಡೆದ ನುರಿತ ವೈದ್ಯಕೀಯ ಸಿಬ್ಬಂದಿಯೇ ಈ ಬೈಕ್ ಚಾಲನೆ ಮಾಡಲಿದ್ದು, ಸ್ಥಳದಲ್ಲೇ ತುರ್ತು ಚಿಕಿತ್ಸೆ ನೀಡಿ ಪ್ರಾಣ ರಕ್ಷಿಸಲಿದ್ದಾರೆ.

Bike ambulances to return to the state Proposal submitted to the Finance Department for the purchase of new vehicles