ಹೊಸ ದೇಶ ಸೋಮಾಲಿಲ್ಯಾಂಡ್‌ ಉದಯ; ಇಸ್ರೇಲ್‌ನಿಂದ ಅಧಿಕೃತ ಮಾನ್ಯತೆ

New country Somaliland- Israel : ಜೆರುಸಲೆಮ್: ಆಫ್ರಿಕಾ ಖಂಡದ ಸೋಮಾಲಿಲ್ಯಾಂಡ್ (Somaliland) ಪ್ರದೇಶವನ್ನು ಸ್ವತಂತ್ರ ಮತ್ತು ಸಾರ್ವಭೌಮ ರಾಷ್ಟ್ರವೆಂದು ಇಸ್ರೇಲ್ ಅಧಿಕೃತವಾಗಿ ಗುರುತಿಸಿದೆ. ಈ ಮೂಲಕ ಸೋಮಾಲಿಲ್ಯಾಂಡ್‌ಗೆ ರಾಜತಾಂತ್ರಿಕ ಮಾನ್ಯತೆ ನೀಡಿದ ವಿಶ್ವದ ಮೊದಲ ರಾಷ್ಟ್ರ ಎಂಬ ಐತಿಹಾಸಿಕ ದಾಖಲೆಗೆ ಇಸ್ರೇಲ್ ಪಾತ್ರವಾಗಿದೆ.

ಶುಕ್ರವಾರ ನಡೆದ ವರ್ಚುವಲ್ ಸಭೆಯಲ್ಲಿ ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಮತ್ತು ಸೋಮಾಲಿಲ್ಯಾಂಡ್ ಅಧ್ಯಕ್ಷ ಅಬ್ದಿರಹಮಾನ್ ಮೊಹಮ್ಮದ್ ಅಬ್ದುಲ್ಲಾಹಿ ಅವರು ಪರಸ್ಪರ ಹಸ್ತಲಾಘವ ಮಾಡುವ ಮೂಲಕ ಈ ಐತಿಹಾಸಿಕ ಮೈತ್ರಿಗೆ ಸಾಕ್ಷಿಯಾದರು.

ಈ ನಿರ್ಧಾರದ ಬೆನ್ನಲ್ಲೇ ಉಭಯ ದೇಶಗಳ ನಡುವೆ ರಾಯಭಾರ ಕಚೇರಿಗಳನ್ನು ಸ್ಥಾಪಿಸಲು ಮತ್ತು ಕೃಷಿ, ತಂತ್ರಜ್ಞಾನ ಹಾಗೂ ಭದ್ರತಾ ಕ್ಷೇತ್ರದಲ್ಲಿ ಸಹಕರಿಸಲು ಒಪ್ಪಂದ ಮಾಡಿಕೊಳ್ಳಲಾಗಿದೆ.

New country Somaliland- Israel : ಮೂರು ದಶಕಗಳ ಕಾಯುವಿಕೆಗೆ ಅಂತ್ಯ

ಸೋಮಾಲಿಲ್ಯಾಂಡ್ 1991ರಲ್ಲಿಯೇ ಸೋಮಾಲಿಯಾದಿಂದ ಬೇರ್ಪಟ್ಟು ಸ್ವತಂತ್ರ ಆಡಳಿತವನ್ನು ಹೊಂದಿದ್ದರೂ, ಜಾಗತಿಕವಾಗಿ ಯಾವುದೇ ದೇಶವು ಇದನ್ನು ಪ್ರತ್ಯೇಕ ರಾಷ್ಟ್ರವೆಂದು ಅಂಗೀಕರಿಸಿರಲಿಲ್ಲ.

ಇಸ್ರೇಲ್‌ನ ಈ ದಿಟ್ಟ ನಿರ್ಧಾರವು ಸೋಮಾಲಿಲ್ಯಾಂಡ್‌ನ 34 ವರ್ಷಗಳ ರಾಜತಾಂತ್ರಿಕ ಹೋರಾಟಕ್ಕೆ ಸಂದ ಜಯವೆಂದು ವಿಶ್ಲೇಷಿಸಲಾಗುತ್ತಿದೆ. ಅಲ್ಲದೆ, ಮುಸ್ಲಿಂ ಬಹುಸಂಖ್ಯಾತ ರಾಷ್ಟ್ರವಾದ ಸೋಮಾಲಿಲ್ಯಾಂಡ್ ‘ಅಬ್ರಹಾಂ ಒಪ್ಪಂದ’ಕ್ಕೆ ಸೇರ್ಪಡೆಗೊಳ್ಳುವ ಮೂಲಕ ಇಸ್ರೇಲ್ ಜೊತೆಗಿನ ಸಂಬಂಧವನ್ನು ಸಾಮಾನ್ಯೀಕರಿಸುವ ಮಹತ್ವದ ಹೆಜ್ಜೆ ಇಟ್ಟಿದೆ.

ಇದನ್ನೂ ಓದಿ: ಮೊಟ್ಟೆಯಲ್ಲಿ ಕ್ಯಾನ್ಸರ್​ಕಾರ ಅಂಶವಿಲ್ಲ : ಸ್ಪಷ್ಟನೆ ನೀಡಿದ ದಿನೇಶ್​ ಗುಂಡೂರಾವ್​

ಸೋಮಾಲಿಯಾ ಆಕ್ರೋಶ, ಜಾಗತಿಕ ಸಂಚಲನ

ಇಸ್ರೇಲ್‌ನ ಈ ನಡೆಯು ಹಾರ್ನ್ ಆಫ್ ಆಫ್ರಿಕಾ (Horn of Africa) ಭಾಗದಲ್ಲಿ ಭಾರಿ ರಾಜಕೀಯ ಸಂಚಲನ ಸೃಷ್ಟಿಸಿದೆ. ಸೋಮಾಲಿಯಾ ಸರ್ಕಾರವು ಈ ಕ್ರಮವನ್ನು ತೀವ್ರವಾಗಿ ಖಂಡಿಸಿದ್ದು, ಇದು ತನ್ನ ದೇಶದ ಅಖಂಡತೆಯ ಮೇಲೆ ನಡೆದ ದಾಳಿ ಎಂದು ಕಿಡಿಕಾರಿದೆ.

ಆಫ್ರಿಕನ್ ಯೂನಿಯನ್ ಕೂಡ ಈ ಬೆಳವಣಿಗೆಯಿಂದ ಭವಿಷ್ಯದಲ್ಲಿ ಉಂಟಾಗಬಹುದಾದ ಭೌಗೋಳಿಕ ಬದಲಾವಣೆಗಳ ಬಗ್ಗೆ ಆತಂಕ ವ್ಯಕ್ತಪಡಿಸಿದೆ. ಆದರೆ, ಇಸ್ರೇಲ್ ಸರ್ಕಾರವು ಈ ಮೈತ್ರಿಯನ್ನು ಸಮರ್ಥಿಸಿಕೊಂಡಿದ್ದು, ಪ್ರಜಾಪ್ರಭುತ್ವದ ಮೌಲ್ಯಗಳನ್ನು ಹೊಂದಿರುವ ಸೋಮಾಲಿಲ್ಯಾಂಡ್‌ನೊಂದಿಗೆ ಕೈಜೋಡಿಸುವುದು ಆ ಪ್ರದೇಶದ ಆರ್ಥಿಕ ಅಭಿವೃದ್ಧಿಗೆ ಪೂರಕವಾಗಲಿದೆ ಎಂದು ತಿಳಿಸಿದೆ.