ಆರ್‌ಎಸ್‌ಎಸ್ ಹೊಗಳಿದ ಹಿರಿಯ ಕಾಂಗ್ರೆಸ್‌ ನಾಯಕ! ಕೈ ಪಾಳಯದಲ್ಲಿ ಸಂಚಲನ

Digvijaya Singh Praises RSS and PM Modi: ನವದೆಹಲಿ: ಸದಾ ರಾಷ್ಟ್ರೀಯ ಸ್ವಯಂಸೇವಕ ಸಂಘ (RSS) ಮತ್ತು ಪ್ರಧಾನಿ ನರೇಂದ್ರ ಮೋದಿ ಅವರ ವಿರುದ್ಧ ವಾಗ್ದಾಳಿ ನಡೆಸುವ ಕಾಂಗ್ರೆಸ್‌ನ ಹಿರಿಯ ನಾಯಕ ದಿಗ್ವಿಜಯ್ ಸಿಂಗ್, ಇಂದು ಅಚ್ಚರಿಯ ನಡೆ ಪ್ರದರ್ಶಿಸಿದ್ದಾರೆ. ಆರ್‌ಎಸ್‌ಎಸ್‌ನ ಸಂಘಟನಾ ಶಕ್ತಿ ಮತ್ತು ಕಾರ್ಯಕರ್ತರ ಶಿಸ್ತನ್ನು ಬಹಿರಂಗವಾಗಿ ಹೊಗಳುವ ಮೂಲಕ ರಾಜಕೀಯ ವಲಯದಲ್ಲಿ ಹೊಸ ಸಂಚಲನ ಮೂಡಿಸಿದ್ದಾರೆ.

ಸಂಘದ ಶಿಸ್ತಿಗೆ ಫುಲ್ ಮಾರ್ಕ್ಸ್
ಇಂದು ಸಾಮಾಜಿಕ ಜಾಲತಾಣ ‘X’ ನಲ್ಲಿ ಅಪರೂಪದ ಹಳೆಯ ಫೋಟೋವೊಂದನ್ನು ಹಂಚಿಕೊಂಡ ದಿಗ್ವಿಜಯ್ ಸಿಂಗ್, ಆರ್‌ಎಸ್‌ಎಸ್ ತಳಮಟ್ಟದ ಕಾರ್ಯಕರ್ತನನ್ನು ಬೆಳೆಸುವ ರೀತಿಯನ್ನು ಮುಕ್ತವಾಗಿ ಶ್ಲಾಘಿಸಿದ್ದಾರೆ. “ಒಬ್ಬ ಸಾಮಾನ್ಯ ಸ್ವಯಂಸೇವಕ ನಾಯಕರ ಪಾದದ ಬಳಿ ಕುಳಿತು ಕೆಲಸ ಆರಂಭಿಸಿ, ದೇಶದ ಪ್ರಧಾನಿ ಮಟ್ಟಕ್ಕೆ ಏರಲು ಆ ಸಂಘಟನೆಯಲ್ಲಿರುವ ಅವಕಾಶ ಮತ್ತು ಶಿಸ್ತು ನಿಜಕ್ಕೂ ಪ್ರಭಾವಶಾಲಿ” ಎಂದು ಅವರು ಬರೆದುಕೊಂಡಿದ್ದಾರೆ.

ಕಾಂಗ್ರೆಸ್‌ಗೆ ಮುಜುಗರ, ಬಿಜೆಪಿಗೆ ಅಸ್ತ್ರ
ಸಿಂಗ್ ಅವರ ಈ ಹೇಳಿಕೆ ಸ್ವಪಕ್ಷವಾದ ಕಾಂಗ್ರೆಸ್‌ಗೆ ತೀವ್ರ ಮುಜುಗರ ಉಂಟುಮಾಡಿದೆ. ಪಕ್ಷದ ಕಾರ್ಯಕಾರಿ ಸಮಿತಿ (CWC) ಸಭೆ ನಡೆಯುತ್ತಿರುವಾಗಲೇ ಇಂತಹ ಹೇಳಿಕೆ ಹೊರಬಂದಿರುವುದು ನಾಯಕರ ಕೆಂಗಣ್ಣಿಗೆ ಗುರಿಯಾಗಿದೆ. ಇನ್ನೊಂದೆಡೆ, ಬಿಜೆಪಿಯು ಇದನ್ನು ಸಂಭ್ರಮಿಸಿದ್ದು, “ಕೊನೆಗೂ ದಿಗ್ವಿಜಯ್ ಸಿಂಗ್ ಅವರಿಗೆ ಸತ್ಯದ ದರ್ಶನವಾಗಿದೆ. ವಂಶಪಾರಂಪರ್ಯ ರಾಜಕಾರಣಕ್ಕಿಂತ ಸಂಘಟನಾತ್ಮಕ ಶ್ರಮ ದೊಡ್ಡದು ಎಂಬುದನ್ನು ಅವರು ಒಪ್ಪಿಕೊಂಡಿದ್ದಾರೆ” ಎಂದು ಬಿಜೆಪಿ ಲೇವಡಿ ಮಾಡಿದೆ.

ಇದನ್ನೂ ಓದಿ: ಎಚ್ಚರ! ’19-ನಿಮಿಷದ ವೈರಲ್ ವಿಡಿಯೋ’ ಹೆಸರಲ್ಲಿ ನಡೆಯುತ್ತಿದೆ ಭಾರಿ ವಂಚನೆ!

‘ಸೈದ್ಧಾಂತಿಕ ವಿರೋಧ ಮುಂದುವರಿಯಲಿದೆ’
ವಿವಾದ ಬೆನ್ನಲ್ಲೇ ಸ್ಪಷ್ಟನೆ ನೀಡಿರುವ ದಿಗ್ವಿಜಯ್ ಸಿಂಗ್, “ನಾನು ಆರ್‌ಎಸ್‌ಎಸ್ ಸಿದ್ಧಾಂತವನ್ನು ಒಪ್ಪುವುದಿಲ್ಲ, ನನ್ನ ಹೋರಾಟ ಅದರ ವಿರುದ್ಧವೇ ಇರಲಿದೆ. ಆದರೆ ಒಂದು ಸಂಘಟನೆಯಾಗಿ ಅದು ಬೆಳೆದಿರುವ ರೀತಿ ಮತ್ತು ಕಾರ್ಯಕರ್ತರಿಗೆ ನೀಡುವ ಗೌರವದ ಬಗ್ಗೆ ಮಾತ್ರ ನಾನು ಮಾತನಾಡಿದ್ದೇನೆ. ಕಾಂಗ್ರೆಸ್ ಕೂಡ ತನ್ನ ಸಂಘಟನಾತ್ಮಕ ರಚನೆಯಲ್ಲಿ ಇಂತಹ ಬದಲಾವಣೆ ತರಬೇಕಿದೆ ಎಂಬುದು ನನ್ನ ಕಾಳಜಿ” ಎಂದಿದ್ದಾರೆ.