ಹನಿಮೂನ್ ನೆಪದಲ್ಲಿ ಜೊತೆ ಬಂದ ಇಡೀ ಸಂಸಾರ : ಸಿಟ್ಟಿಗೆದ್ದು ಪತಿಗೆ ವಿಚ್ಛೇದನ ನೋಟಿಸ್ ನೀಡಿದ ನವವಧು

ಹನಿಮೂನ್ ಎನ್ನುವುದು ಪ್ರತಿಯೊಬ್ಬ ನವದಂಪತಿಗಳ ಜೀವನದ ಅತ್ಯಂತ ಸುಂದರ ಮತ್ತು ಏಕಾಂತದ ಕ್ಷಣ. ಆದರೆ, ಉತ್ತರ ಪ್ರದೇಶದ ಮೀರತ್‌ನಲ್ಲಿ ನಡೆದ ವಿಚಿತ್ರ ಘಟನೆಯೊಂದರಲ್ಲಿ, ಹನಿಮೂನ್ ಪ್ರವಾಸಕ್ಕೆ ಪತಿಯ ಇಡೀ ಕುಟುಂಬವೇ ಜೊತೆಯಾಗಿ ಬಂದಿದ್ದರಿಂದ ಬೇಸತ್ತ ನವವಧುವೊಬ್ಬಳು ನೇರವಾಗಿ ವಿಚ್ಛೇದನಕ್ಕೆ ಅರ್ಜಿ ಸಲ್ಲಿಸಿ ಸದ್ದು ಮಾಡಿದ್ದಾಳೆ.

ದೆಹಲಿ ಮೂಲದ ಯುವಕನೊಂದಿಗೆ ಸಾಂಪ್ರದಾಯಿಕವಾಗಿ ಅರೇಂಜ್ಡ್ ಮ್ಯಾರೇಜ್ ಮಾಡಿಕೊಂಡಿದ್ದ ಮೀರತ್‌ನ ಯುವತಿ, ಮದುವೆಯ ನಂತರ ಪತಿಯೊಂದಿಗೆ ಪ್ರವಾಸಕ್ಕೆ ಹೋಗಲು ಸಕಲ ಸಿದ್ಧತೆ ಮಾಡಿಕೊಂಡಿದ್ದಳು. ಹೊಸ ಜೀವನದ ಸುಂದರ ಕನಸುಗಳೊಂದಿಗೆ ವಿಮಾನ ನಿಲ್ದಾಣಕ್ಕೆ ಬಂದಿಳಿದ ವಧುಗೆ ಅಲ್ಲಿ ಕಾದಿದ್ದು ಮಾತ್ರ ದೊಡ್ಡ ಶಾಕ್. ಏಕೆಂದರೆ, ಅಲ್ಲಿ ಕೇವಲ ಪತಿ ಮಾತ್ರ ಇರಲಿಲ್ಲ, ಬದಲಿಗೆ ಆತನ ತಂದೆ-ತಾಯಿ, ಅಕ್ಕ-ತಂಗಿಯರು ಸೇರಿದಂತೆ ಇಡೀ ಸಂಸಾರವೇ ಲಗೇಜ್ ಸಮೇತ ಪ್ರತ್ಯಕ್ಷವಾಗಿತ್ತು!

ತನ್ನ ಹನಿಮೂನ್ ಪ್ರವಾಸವು ಫ್ಯಾಮಿಲಿ ಟ್ರಿಪ್ ಬದಲಾಗಿದ್ದಕ್ಕೆ ವಧು ಸ್ಥಳದಲ್ಲೇ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ್ದಾಳೆ. ಆದರೆ, ಪತಿ ಮತ್ತು ಅತ್ತೆ-ಮಾವಂದಿರು ಆಕೆಯ ಬೇಸರವನ್ನು ಗಂಭೀರವಾಗಿ ಪರಿಗಣಿಸದೆ ನಿರ್ಲಕ್ಷ್ಯ ಮಾಡಿದ್ದಾರೆ. ಇದರಿಂದ ಇಡೀ ಪ್ರವಾಸದುದ್ದಕ್ಕೂ ಅಸಮಾಧಾನಗೊಂಡಿದ್ದ ವಧು, ಪ್ರವಾಸ ಮುಗಿಸಿ ಮನೆಗೆ ಮರಳಿದ ತಕ್ಷಣವೇ ಕೌಟುಂಬಿಕ ನ್ಯಾಯಾಲಯಕ್ಕೆ ತೆರಳಿ ವಿಚ್ಛೇದನಕ್ಕೆ ಅರ್ಜಿ ಸಲ್ಲಿಸಿದ್ದಾಳೆ.

Also Read: ವಾಹನ ಸವಾರರಿಗೆ ಮಹತ್ವದ ಸುದ್ದಿ, ಡ್ರೈವಿಂಗ್ ಲೈಸೆನ್ಸ್‌ಗೆ 50 ವರ್ಷ ಮಾನ್ಯತೆ!

ಸಾಮಾನ್ಯವಾಗಿ ವರದಕ್ಷಿಣೆ ಕಿರುಕುಳ, ಗೃಹ ಹಿಂಸೆ ಅಥವಾ ಹೊಂದಾಣಿಕೆಯ ಕೊರತೆಯಿಂದ ವಿಚ್ಛೇದನ ಕೋರುವುದು ಸಾಮಾನ್ಯ. ಆದರೆ, ಹನಿಮೂನ್‌ಗೆ ಕುಟುಂಬಸ್ಥರು ಬಂದಿದ್ದನ್ನೇ ದೊಡ್ಡ ಕಾರಣವಾಗಿಸಿ ದಂಪತಿಗಳು ಕೋರ್ಟ್ ಮೆಟ್ಟಿಲೇರಿರುವುದನ್ನು ಕಂಡು ಕೌನ್ಸಿಲರ್‌ಗಳು ಹಾಗೂ ನ್ಯಾಯಾಧೀಶರು ದಂಗಾಗಿದ್ದಾರೆ.

ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಈ ಸುದ್ದಿ ಭಾರೀ ವೈರಲ್ ಆಗುತ್ತಿದ್ದು, ನೆಟ್ಟಿಗರಲ್ಲಿ ದೊಡ್ಡ ಪರ-ವಿರೋಧದ ಚರ್ಚೆಯನ್ನು ಹುಟ್ಟುಹಾಕಿದೆ. ಕೆಲವರು ವಧುವಿನ ಖಾಸಗಿತನದ ನಿರ್ಧಾರವನ್ನು ಬೆಂಬಲಿಸಿದರೆ, ಇನ್ನು ಕೆಲವರು ಸಣ್ಣ ವಿಷಯಕ್ಕೆ ಸಂಸಾರ ಮುರಿಯುವುದು ಸರಿಯಲ್ಲ ಎಂದಿದ್ದಾರೆ.

The entire family came together on the pretext of honeymoon The newlyweds got angry and gave their husband a divorce notice