ನಿಮ್ಮ ಉಳಿತಾಯ ಬ್ಯಾಂಕ್ ಖಾತೆ ವರ್ಗಾವಣೆಗೂ ಮುನ್ನ ಈ 5 ವಿಷಯ ತಿಳಿಯಿರಿ
ಬೇರೆ ನಗರಕ್ಕೆ ಸ್ಥಳಾಂತರವಾಗುವವರು ಉಳಿತಾಯ ಖಾತೆ ವರ್ಗಾವಣೆ ಮಾಡುವ ಮುನ್ನ ಐಎಫ್ಎಸ್ಸಿ ಬದಲಾವಣೆ, ಕೆವೈಸಿ, ದಾಖಲೆಗಳು ಹಾಗೂ ಆಟೋ ಪಾವತಿ ಸೇವೆಗಳ ಬಗ್ಗೆ ತಿಳಿದುಕೊಳ್ಳುವುದು ಅತ್ಯಂತ ಅಗತ್ಯವಾಗಿದೆ.
ಉದ್ಯೋಗ, ಶಿಕ್ಷಣ ಅಥವಾ ಇತರ ಕಾರಣಗಳಿಂದ ಬೇರೆ ನಗರಕ್ಕೆ ಸ್ಥಳಾಂತರವಾಗುವವರು ಮನೆ ಬದಲಿಸುವುದಷ್ಟೇ ಅಲ್ಲ, ತಮ್ಮ ಉಳಿತಾಯ ಖಾತೆ (Saving Account) ಯಾವ ಶಾಖೆಯಲ್ಲಿ ಇದೆ ಎಂಬುದನ್ನೂ ಗಮನಿಸಬೇಕು. ಇತ್ತೀಚಿನ ದಿನಗಳಲ್ಲಿ ಹೆಚ್ಚಿನ ಬ್ಯಾಂಕ್ಗಳು ಆನ್ಲೈನ್ ಮೂಲಕವೇ ಶಾಖೆ ಬದಲಾವಣೆ ಸೇವೆ ನೀಡುತ್ತಿರುವುದರಿಂದ ಈ ಪ್ರಕ್ರಿಯೆ ಸುಲಭವಾಗಿದೆ. ಆದರೆ ಕೆಲವು ಪ್ರಮುಖ ಅಂಶಗಳನ್ನು ನಿರ್ಲಕ್ಷಿಸಿದರೆ ನಂತರ ತೊಂದರೆ ಎದುರಾಗಬಹುದು.
ಶಾಖೆ ಬದಲಾವಣೆಯಾದ ಬಳಿಕ ಸಾಮಾನ್ಯವಾಗಿ ನಿಮ್ಮ IFSC ಕೋಡ್ ಬದಲಾಗುತ್ತದೆ. ಈ ಬದಲಾವಣೆಯ ಪರಿಣಾಮವಾಗಿ ವೇತನ ಜಮಾ, EMI, SIP, ಆಟೋ ಡೆಬಿಟ್ ಹಾಗೂ ಇತರ ಬ್ಯಾಂಕಿಂಗ್ ಸೇವೆಗಳು ಹಳೆಯ ಮಾಹಿತಿಯಲ್ಲೇ ಮುಂದುವರಿದರೆ ವ್ಯವಹಾರಗಳಲ್ಲಿ ವ್ಯತ್ಯಯ ಉಂಟಾಗಬಹುದು. ಆದ್ದರಿಂದ ಹೊಸ ಶಾಖೆಗೆ ವರ್ಗಾವಣೆ ಪೂರ್ಣಗೊಂಡ ತಕ್ಷಣ ಸಂಬಂಧಿತ ಎಲ್ಲ ಸೇವೆಗಳಲ್ಲಿ ಹೊಸ ಬ್ಯಾಂಕ್ ವಿವರಗಳನ್ನು ನವೀಕರಿಸುವುದು ಅಗತ್ಯ.
ಇಂದಿನ ದಿನಗಳಲ್ಲಿ SBI, HDFC Bank, ICICI Bank, Kotak Mahindra Bank ಸೇರಿದಂತೆ ಹಲವು ಪ್ರಮುಖ ಬ್ಯಾಂಕ್ಗಳು ಗ್ರಾಹಕರು ಹಳೆಯ ಶಾಖೆಗೆ ತೆರಳದೇ ಮನೆಯಲ್ಲಿಯೇ ನೆಟ್ ಬ್ಯಾಂಕಿಂಗ್ ಅಥವಾ ಮೊಬೈಲ್ ಬ್ಯಾಂಕಿಂಗ್ ಮೂಲಕ ಶಾಖೆ ವರ್ಗಾವಣೆ ಅರ್ಜಿ ಸಲ್ಲಿಸುವ ಅವಕಾಶವನ್ನು ನೀಡುತ್ತಿವೆ. ಇದರಿಂದ ಸಮಯ ಮತ್ತು ಶ್ರಮ ಎರಡೂ ಉಳಿಯುತ್ತವೆ.
ಆದರೆ ಎಲ್ಲ ಖಾತೆಗಳಿಗೂ ಈ ಸೌಲಭ್ಯ ತಕ್ಷಣ ಲಭ್ಯವಾಗುವುದಿಲ್ಲ. ನಿಮ್ಮ KYC ಮಾಹಿತಿ ಅಪೂರ್ಣವಾಗಿದ್ದರೆ ಅಥವಾ ಖಾತೆ ದೀರ್ಘಕಾಲ ಬಳಕೆಯಲ್ಲಿಲ್ಲದಿದ್ದರೆ ಬ್ಯಾಂಕ್ ಅರ್ಜಿಯನ್ನು ತಾತ್ಕಾಲಿಕವಾಗಿ ತಿರಸ್ಕರಿಸಬಹುದು. ಆದ್ದರಿಂದ ವರ್ಗಾವಣೆಗೆ ಮುನ್ನ KYC ದಾಖಲೆಗಳು ಹಾಗೂ ಖಾತೆಯ ಸ್ಥಿತಿಯನ್ನು ಪರಿಶೀಲಿಸಿಕೊಳ್ಳುವುದು ಉತ್ತಮ.
ಶಾಖೆ ಬದಲಾವಣೆ ವೇಳೆ ಗುರುತಿನ ಚೀಟಿ, ವಿಳಾಸದ ಪುರಾವೆ, ಪಾಸ್ಬುಕ್ ಅಥವಾ ಬ್ಯಾಂಕ್ ಸ್ಟೇಟ್ಮೆಂಟ್ ಸೇರಿದಂತೆ ಕೆಲವು ದಾಖಲೆಗಳನ್ನು ಸಲ್ಲಿಸುವ ಅಗತ್ಯ ಬರಬಹುದು. ಕೆಲವು ಸಂದರ್ಭಗಳಲ್ಲಿ ಚೆಕ್ಬುಕ್ ವಿವರಗಳನ್ನೂ ಬ್ಯಾಂಕ್ ಕೇಳಬಹುದು. ದಾಖಲೆಗಳ ಪರಿಶೀಲನೆ ಪೂರ್ಣಗೊಂಡ ಬಳಿಕವೇ ಶಾಖೆ ವರ್ಗಾವಣೆ ಪ್ರಕ್ರಿಯೆ ಪೂರ್ಣಗೊಳ್ಳುತ್ತದೆ.
ತಜ್ಞರ ಪ್ರಕಾರ, ಶಾಖೆ ಬದಲಾವಣೆ ಸುಲಭವಾದರೂ IFSC ಬದಲಾವಣೆ ಮತ್ತು ಬ್ಯಾಂಕಿಂಗ್ ಸೇವೆಗಳ ನವೀಕರಣವನ್ನು ಸಮಯಕ್ಕೆ ಮಾಡುವುದು ಅತ್ಯಂತ ಮುಖ್ಯ. ಇಲ್ಲವಾದರೆ EMI ವಿಳಂಬ, SIP ಸ್ಥಗಿತ ಅಥವಾ ವೇತನ ಜಮೆಯಲ್ಲಿ ಸಮಸ್ಯೆಗಳು ಉಂಟಾಗುವ ಸಾಧ್ಯತೆ ಇರುತ್ತದೆ.