ಬಿಗ್ ಬಾಸ್ ಇತಿಹಾಸದಲ್ಲೇ ಹೊಸ ದಾಖಲೆ: ಗೆಲ್ಲುವ ಈ ಸ್ಪರ್ಧಿಗೆ ಬರೋಬ್ಬರಿ 37 ಕೋಟಿ ಮತ!

Bigg Boss Season 12 Live: ಬಿಗ್ ಬಾಸ್ ಕನ್ನಡ ಸೀಸನ್ 12ರ ಮಹಾ ಸಮರ ಅಂತ್ಯದ ಹಂತಕ್ಕೆ ತಲುಪಿದೆ. ಭಾನುವಾರ ಗ್ರ್ಯಾಂಡ್ ಫಿನಾಲೆ ನಡೆಯಲಿದ್ದು, ವಿನ್ನರ್ ಯಾರಾಗಲಿದ್ದಾರೆ ಎಂಬ ಕುತೂಹಲ ಎಲ್ಲೆಡೆ ಮನೆ ಮಾಡಿದೆ. ಈ ಮಧ್ಯೆ, ಈ ಬಾರಿಯ ವೋಟಿಂಗ್ ವಿಚಾರದಲ್ಲಿ ಬಿಗ್ ಬಾಸ್ ಅಕ್ಷರಶಃ ಇತಿಹಾಸ ನಿರ್ಮಿಸಿದ್ದು, ಕಳೆದ ಎಲ್ಲಾ ಸೀಸನ್‌ಗಳ ದಾಖಲೆಯನ್ನು ಪುಡಿಪುಡಿ ಮಾಡಿದೆ.

ಕಳೆದ ಸೀಸನ್‌ಗಿಂತ 6 ಪಟ್ಟು ಹೆಚ್ಚು ಮತ!

ಶನಿವಾರದ ‘ವಾರದ ಕಥೆ ಕಿಚ್ಚನ ಜೊತೆ’ ಸಂಚಿಕೆಯಲ್ಲಿ ಕಿಚ್ಚ ಸುದೀಪ್ ಅವರು ಮತದಾನದ ಈ ದೈತ್ಯಾಕಾರದ ಸಂಖ್ಯೆಯನ್ನು ಬಹಿರಂಗಪಡಿಸಿದ್ದಾರೆ. ವೋಟಿಂಗ್ ಲೈನ್ ಕ್ಲೋಸ್ ಆಗಲು ಇನ್ನೂ ಹಲವು ಗಂಟೆಗಳಿರುವಾಗಲೇ, ರೇಸ್‌ನಲ್ಲಿ ಮುಂಚೂಣಿಯಲ್ಲಿರುವ ಒಬ್ಬನೇ ಸ್ಪರ್ಧಿಗೆ 37 ಕೋಟಿಗೂ ಹೆಚ್ಚು ಮತಗಳು ಬಂದಿವೆ ಎಂದು ತಿಳಿಸಿ ಸ್ಪರ್ಧಿಗಳನ್ನು ದಂಗಾಗಿಸಿದ್ದಾರೆ.

ಇದರ ಗಾಂಭೀರ್ಯವನ್ನು ವಿವರಿಸಿದ ಸುದೀಪ್, “ಕಳೆದ ಸೀಸನ್ 11ರ ವಿನ್ನರ್ ಪಡೆದಿದ್ದ ಒಟ್ಟು ಮತಗಳು ಕೇವಲ 5 ಕೋಟಿ. ಆದರೆ ಈ ಬಾರಿ ವಿನ್ನರ್ ಆಗಲಿರುವ ಸ್ಪರ್ಧಿಗೆ ಈಗಾಗಲೇ ಅದರ ಆರು ಪಟ್ಟು ಅಂದರೆ 37 ಕೋಟಿ ಮತಗಳು ಹರಿದು ಬಂದಿವೆ” ಎಂದು ದಾಖಲೆಯನ್ನು ಬಿಚ್ಚಿಟ್ಟರು.

ಕಠಿಣ ಪೈಪೋಟಿ: ವಿನ್ನರ್ ಮತ್ತು ರನ್ನರ್ ಅಪ್ ನಡುವೆ ಸಣ್ಣ ಅಂತರ

ಕಿಚ್ಚ ಸುದೀಪ್ ಕೇವಲ ಮತಗಳ ಸಂಖ್ಯೆಯನ್ನು ಮಾತ್ರ ಹೇಳಲಿಲ್ಲ, ಬದಲಾಗಿ ಪೈಪೋಟಿಯ ತೀವ್ರತೆಯನ್ನೂ ವಿವರಿಸಿದರು. “ಒಬ್ಬ ಸ್ಪರ್ಧಿಗೆ 37 ಕೋಟಿ ಮತಗಳು ಬಂದಿದ್ದರೂ ಸಹ, ಮೊದಲ ಸ್ಥಾನ ಮತ್ತು ಎರಡನೇ ಸ್ಥಾನದಲ್ಲಿರುವ ಸ್ಪರ್ಧಿಗಳ ನಡುವಿನ ಮತಗಳ ಅಂತರ ಬಹಳ ಕಡಿಮೆ ಇದೆ” ಎಂದು ಹೇಳುವ ಮೂಲಕ ಪಂದ್ಯ ಎಷ್ಟು ಕಠಿಣವಾಗಿದೆ ಎಂಬುದನ್ನು ಸೂಚಿಸಿದರು.

ವೋಟಿಂಗ್‌ನ ಇತರ ಪ್ರಮುಖಾಂಶಗಳು:

6ನೇ ಸ್ಪರ್ಧಿಯ ದಾಖಲೆ: ಕಳೆದ ವರ್ಷ 6ನೇ ಸ್ಥಾನದಲ್ಲಿದ್ದ ಸ್ಪರ್ಧಿಗೆ 64 ಲಕ್ಷ ಮತಗಳು ಬಂದಿದ್ದವು. ಆದರೆ ಈ ಬಾರಿ 6ನೇ ಸ್ಥಾನದಲ್ಲಿರುವ ಸ್ಪರ್ಧಿಗೆ ಈಗಾಗಲೇ 94 ಲಕ್ಷಕ್ಕೂ ಹೆಚ್ಚು ಮತಗಳು ಬಂದಿದ್ದು, ಇದು 1 ಕೋಟಿ ದಾಟುವ ಸಾಧ್ಯತೆ ಇದೆ.

ಪ್ರೇಕ್ಷಕರ ಇನ್ವಾಲ್ವ್‌ಮೆಂಟ್: ಜನ ಕೇವಲ ಶೋ ನೋಡುತ್ತಿಲ್ಲ, ಪ್ರತಿಯೊಬ್ಬರೂ ತಮ್ಮ ನೆಚ್ಚಿನ ಸ್ಪರ್ಧಿಗಾಗಿ ಮತ ಚಲಾಯಿಸುವ ಮೂಲಕ ಬಿಗ್ ಬಾಸ್ ಅನ್ನು ತಮ್ಮ ಜೀವನದ ಭಾಗವಾಗಿಸಿಕೊಂಡಿದ್ದಾರೆ ಎಂದು ಸುದೀಪ್ ಮೆಚ್ಚುಗೆ ವ್ಯಕ್ತಪಡಿಸಿದರು.

ಕನ್ನಡ ಬಿಗ್‌ಬಾಸ್ ಹವಾ: ರಕ್ಷಿತಾ ಶೆಟ್ಟಿಗೆ ವೋಟ್ ಮಾಡಿದವರಿಗೆ ಉಚಿತ ಬ್ಯೂಟಿ ಸೇವೆ ಘೋಷಣೆ

ಸದ್ಯ ಮನೆಯಲ್ಲಿ ಗಿಲ್ಲಿ, ಅಶ್ವಿನಿ, ರಕ್ಷಿತಾ, ಧನುಶ್, ಕಾವ್ಯಾ ಮತ್ತು ರಘು ಅಂತಿಮ ಕದನದಲ್ಲಿದ್ದಾರೆ. ಭಾನುವಾರ ಬೆಳಿಗ್ಗೆ 10 ಗಂಟೆಯವರೆಗೆ ಪ್ರೇಕ್ಷಕರು ತಮ್ಮ ನೆಚ್ಚಿನ ಸ್ಪರ್ಧಿಗೆ ಮತ ಹಾಕಲು ಅವಕಾಶವಿದೆ. ಗಿಲ್ಲಿ ಸೇರಿದಂತೆ ಹಲವು ಸ್ಪರ್ಧಿಗಳ ಪರವಾಗಿ ಸೋಶಿಯಲ್ ಮೀಡಿಯಾ ಮತ್ತು ಬೀದಿಗಳಲ್ಲಿ ದೊಡ್ಡ ಮಟ್ಟದ ಮತದಾನದ ಅಭಿಯಾನಗಳು ನಡೆಯುತ್ತಿವೆ. ಅಂತಿಮವಾಗಿ ಈ 37 ಕೋಟಿ ಮತಗಳ ಸರದಾರ ಯಾರು? ಬಿಗ್ ಬಾಸ್ ಸೀಸನ್ 12ರ ಟ್ರೋಫಿ ಯಾರ ಪಾಲಾಗಲಿದೆ? ಎಂಬುದು ನಾಳೆ ಅಧಿಕೃತವಾಗಿ ಹೊರಬೀಳಲಿದೆ.