ಮಳೆಗಾಲಕ್ಕೂ ಮುನ್ನ ಕಾರ್‌ ಇನ್ಸೂರೆನ್ಸ್ ಒಮ್ಮೆ ಪರಿಶೀಲಿಸಿ, ಇಲ್ಲದೇ ಹೋದರೆ..

ಮಳೆಗಾಲ ಆರಂಭವಾಗುತ್ತಿದ್ದಂತೆ ನಗರ ಪ್ರದೇಶಗಳಲ್ಲಿ ರಸ್ತೆಗಳಲ್ಲಿ ನೀರು ನಿಂತುಕೊಳ್ಳುವುದು ಸಾಮಾನ್ಯವಾಗಿದೆ. ಇದರಿಂದ ಕಾರುಗಳು ಮಧ್ಯರಸ್ತೆಯಲ್ಲೇ ನಿಂತು ಹೋಗುವುದು, ಎಂಜಿನ್ ಹಾಗೂ ಎಲೆಕ್ಟ್ರಿಕಲ್ ಭಾಗಗಳು ಹಾನಿಗೊಳಗಾಗುವುದು ಹೆಚ್ಚುತ್ತಿದೆ. ಆದರೆ ಬಹುತೇಕ ವಾಹನ ಮಾಲೀಕರು ತಮ್ಮ ಮೋಟಾರ್ ಇನ್ಸೂರೆನ್ಸ್ ಎಲ್ಲ ರೀತಿಯ ಹಾನಿಯನ್ನು ಕವರ್ ಮಾಡುತ್ತದೆ ಎಂದು ಭಾವಿಸುತ್ತಾರೆ. ವಾಸ್ತವದಲ್ಲಿ ಪಾಲಿಸಿ ಯಾವ ರೀತಿಯದು ಎಂಬುದರ ಮೇಲೆ ಪರಿಹಾರ ಅವಲಂಬಿತವಾಗಿರುತ್ತದೆ.

ಥರ್ಡ್ ಪಾರ್ಟಿ ಪಾಲಿಸಿ ಸಾಕಾಗುವುದಿಲ್ಲ

ಸಾಮಾನ್ಯ ಥರ್ಡ್ ಪಾರ್ಟಿ ಕಾರ್‌ ಇನ್ಸೂರೆನ್ಸ್ನಲ್ಲಿ ಪ್ರವಾಹ ಅಥವಾ ಮಳೆ ನೀರಿನಿಂದ ಉಂಟಾಗುವ ಹಾನಿಗೆ ಪರಿಹಾರ ಸಿಗುವುದಿಲ್ಲ. ಇಂತಹ ಸಂದರ್ಭಗಳಲ್ಲಿ ಸಮಗ್ರ (Comprehensive) ಇನ್ಸೂರೆನ್ಸ್ ಇದ್ದರೆ ಮಾತ್ರ ಪರಿಹಾರ ಪಡೆಯುವ ಅವಕಾಶ ಇರುತ್ತದೆ. ಅದರಲ್ಲೂ ಎಂಜಿನ್ ಪ್ರೊಟೆಕ್ಷನ್ ಹಾಗೂ ಜೀರೋ ಡಿಪ್ರಿಸಿಯೇಷನ್‌ ಮುಂತಾದ ಹೆಚ್ಚುವರಿ ಕವರ್‌ಗಳನ್ನು ಸೇರಿಸಿಕೊಂಡಿದ್ದರೆ ಹೆಚ್ಚಿನ ಭದ್ರತೆ ಸಿಗುತ್ತದೆ.

ತಜ್ಞರ ಪ್ರಕಾರ, ಪ್ರವಾಹದ ನೀರು ಎಂಜಿನ್ ಒಳಗೆ ಸೇರಿದ ನಂತರ ಕಾರ್‌ ಸ್ಟಾರ್ಟ್ ಮಾಡಿದರೆ ‘ಹೈಡ್ರೋಸ್ಟಾಟಿಕ್ ಲಾಕ್’ ಸಮಸ್ಯೆ ಉಂಟಾಗಿ ಎಂಜಿನ್ ಸಂಪೂರ್ಣ ಹಾಳಾಗುವ ಸಾಧ್ಯತೆ ಇರುತ್ತದೆ. ಈ ರೀತಿಯ ಹಾನಿಗೆ ಸಾಮಾನ್ಯ ಪಾಲಿಸಿಗಳು ಅನೇಕ ಬಾರಿ ಕವರ್ ನೀಡುವುದಿಲ್ಲ.

ಕಾರು ನೀರಿನಲ್ಲಿ ಸಿಲುಕಿದರೆ ಏನು ಮಾಡಬೇಕು?

ಮಳೆ ನೀರಿನಲ್ಲಿ ಕಾರು ಸಿಲುಕಿದ ತಕ್ಷಣ ಎಂಜಿನ್ ಸ್ಟಾರ್ಟ್ ಮಾಡಲು ಪ್ರಯತ್ನಿಸಬಾರದು. ಮೊದಲು ವಾಹನವನ್ನು ಸುರಕ್ಷಿತ ಸ್ಥಳಕ್ಕೆ ಕೊಂಡೊಯ್ಯಲು ಸಹಾಯ ಪಡೆಯಬೇಕು. ಬಳಿಕ ತಕ್ಷಣವೇ ಇನ್ಸೂರೆನ್ಸ್ ಕಂಪನಿಗೆ ಮಾಹಿತಿ ನೀಡಬೇಕು. ವಿಳಂಬವಾದರೆ ಕ್ಲೇಮ್ ಪ್ರಕ್ರಿಯೆಯಲ್ಲಿ ತೊಂದರೆ ಎದುರಾಗಬಹುದು.

ಕ್ಲೇಮ್ ಸಲ್ಲಿಸಲು ಸಾಮಾನ್ಯವಾಗಿ ಪಾಲಿಸಿ ದಾಖಲೆ, ವಾಹನದ RC, ಚಾಲನಾ ಪರವಾನಗಿ, ಹಾನಿಯಾದ ಕಾರಿನ ಫೋಟೋಗಳು ಹಾಗೂ ಸರಿಯಾಗಿ ಭರ್ತಿ ಮಾಡಿದ ಕ್ಲೇಮ್ ಫಾರ್ಮ್ ಅಗತ್ಯವಿರುತ್ತದೆ. ಕೆಲ ಸಂದರ್ಭಗಳಲ್ಲಿ ಪೊಲೀಸ್ ದೂರು ಸಹ ಕೇಳಬಹುದು.

ಸರ್ವೇಯರ್ ವರದಿ ಮುಖ್ಯ

ಇನ್ಸೂರెన್ಸ್ ಕಂಪನಿ ಕ್ಲೇಮ್ ಬಂದ ನಂತರ ಸರ್ವೇಯರ್‌ರನ್ನು ಕಳುಹಿಸಿ ವಾಹನದ ಹಾನಿಯನ್ನು ಪರಿಶೀಲಿಸುತ್ತದೆ. ಅವರ ವರದಿ ಆಧರಿಸಿ ಪರಿಹಾರದ ಮೊತ್ತ ನಿಗದಿಯಾಗುತ್ತದೆ. ಕಂಪನಿಯ ಅನುಮತಿ ಸಿಗುವ ಮೊದಲು ರಿಪೇರಿ ಕೆಲಸ ಆರಂಭಿಸಿದರೆ ನಂತರ ವಿವಾದ ಉಂಟಾಗುವ ಸಾಧ್ಯತೆ ಇದೆ ಎಂದು ತಜ್ಞರು ಎಚ್ಚರಿಸುತ್ತಾರೆ.

ಮಳೆಗಾಲಕ್ಕೂ ಮೊದಲು ಪರಿಶೀಲನೆ ಅಗತ್ಯ

ಪ್ರವಾಹಕ್ಕೆ ಒಳಗಾಗುವ ಪ್ರದೇಶಗಳಲ್ಲಿ ವಾಸಿಸುವವರು ತಮ್ಮ ಕಾರ್‌ ಇನ್ಸೂರೆನ್ಸ್ ಪಾಲಿಸಿಯನ್ನು ಒಂದು ಬಾರಿ ಪರಿಶೀಲಿಸಿಕೊಳ್ಳುವುದು ಉತ್ತಮ. ಅಗತ್ಯವಿದ್ದರೆ ಹೆಚ್ಚುವರಿ ಕವರ್‌ಗಳನ್ನು ಸೇರಿಸಿಕೊಳ್ಳುವುದರಿಂದ ಭವಿಷ್ಯದಲ್ಲಿ ಲಕ್ಷಾಂತರ ರೂಪಾಯಿ ರಿಪೇರಿ ವೆಚ್ಚದಿಂದ ತಪ್ಪಿಸಿಕೊಳ್ಳಬಹುದು.