LIC ಹೊಸ ‘ಜೀವನ್ ಉತ್ಸವ್ ಸಿಂಗಲ್ ಪ್ರೀಮಿಯಂ’ ಯೋಜನೆ ಬಿಡುಗಡೆ: ಒಮ್ಮೆ ಹಣ ಹೂಡಿ, ಜೀವನಪೂರ್ತಿ ಆದಾಯ!

ದೇಶದ ಅತಿದೊಡ್ಡ ವಿಮಾ ಸಂಸ್ಥೆಯಾದ ಲೈಫ್ ಇನ್ಶೂರೆನ್ಸ್ ಕಾರ್ಪೊರೇಷನ್ ಆಫ್ ಇಂಡಿಯಾ (LIC), ಹೂಡಿಕೆದಾರರಿಗಾಗಿ ಅತ್ಯಾಕರ್ಷಕವಾದ ‘ಜೀವನ್ ಉತ್ಸವ್ ಸಿಂಗಲ್ ಪ್ರೀಮಿಯಂ’ (Jeevan Utsav Single Premium) ಎಂಬ ಹೊಸ ವಿಮಾ ಯೋಜನೆಯನ್ನು ಪರಿಚಯಿಸಿದೆ. ಇದು ಉಳಿತಾಯ ಮತ್ತು ಜೀವನಪೂರ್ತಿ ರಕ್ಷಣೆಯನ್ನು ನೀಡುವ ವಿಶಿಷ್ಟ ಯೋಜನೆಯಾಗಿದೆ.

ಯೋಜನೆಯ ಪ್ರಮುಖ ವೈಶಿಷ್ಟ್ಯಗಳು:
ಈ ಯೋಜನೆಯು ‘ನಾನ್-ಪಾರ್’ (Non-Par), ‘ನಾನ್-ಲಿಂಕ್ಡ್’ (Non-Linked) ಮತ್ತು ವೈಯಕ್ತಿಕ ಉಳಿತಾಯದ ಸಮಗ್ರ ವಿಮಾ ಯೋಜನೆಯಾಗಿದೆ. ಇದರ ಪ್ರಮುಖ ಅಂಶಗಳೆಂದರೆ:

ಒಂದೇ ಬಾರಿ ಪ್ರೀಮಿಯಂ ಪಾವತಿ:
ಹೆಸರೇ ಸೂಚಿಸುವಂತೆ, ಈ ಪಾಲಿಸಿಯಲ್ಲಿ ಹೂಡಿಕೆದಾರರು ಪದೇ ಪದೇ ಹಣ ಪಾವತಿಸುವ ಅಗತ್ಯವಿಲ್ಲ. ಕೇವಲ ಒಂದು ಬಾರಿ ಪ್ರೀಮಿಯಂ ಪಾವತಿಸುವ ಮೂಲಕ ಯೋಜನೆಯ ಲಾಭ ಪಡೆಯಬಹುದು.

ಜೀವನಪೂರ್ತಿ ಆದಾಯ ಮತ್ತು ರಕ್ಷಣೆ: ಈ ಯೋಜನೆಯು ಪಾಲಿಸಿದಾರರಿಗೆ ಜೀವನಪೂರ್ತಿ ಸ್ಥಿರ ಆದಾಯದ ಜೊತೆಗೆ ಜೀವ ವಿಮಾ ರಕ್ಷಣೆಯನ್ನು (Life Long Risk Cover) ಖಾತರಿಪಡಿಸುತ್ತದೆ.

ಗ್ಯಾರಂಟಿ ಅಡಿಷನ್ ಸೌಲಭ್ಯ: ಗ್ಯಾರಂಟಿ ಅವಧಿಯಲ್ಲಿ ಪಾಲಿಸಿಗೆ ನಿರ್ದಿಷ್ಟ ಮೊತ್ತದ ‘ಗ್ಯಾರಂಟಿ ಅಡಿಷನ್’ ಸೇರ್ಪಡೆಯಾಗುತ್ತಾ ಹೋಗುತ್ತದೆ, ಇದು ಪಾಲಿಸಿಯ ಮೌಲ್ಯವನ್ನು ಹೆಚ್ಚಿಸುತ್ತದೆ.

ವಯೋಮಿತಿ: 30 ದಿನಗಳ ಮಗುವಿನಿಂದ ಹಿಡಿದು 65 ವರ್ಷದ ಹಿರಿಯ ನಾಗರಿಕರವರೆಗೆ ಯಾರು ಬೇಕಾದರೂ ಈ ಪಾಲಿಸಿಯನ್ನು ಖರೀದಿಸಬಹುದು.

ವಿಮಾ ಮೊತ್ತ (Sum Assured): ಈ ಯೋಜನೆಯಡಿ ಕನಿಷ್ಠ 5,00,000 ರೂಪಾಯಿಗಳ ಮೂಲ ವಿಮಾ ಮೊತ್ತವನ್ನು ನಿಗದಿಪಡಿಸಲಾಗಿದೆ. ಗರಿಷ್ಠ ಮೊತ್ತಕ್ಕೆ ಯಾವುದೇ ಮಿತಿಯಿಲ್ಲ.

ಗೂಗಲ್ ಪೇ, ಫೋನ್ ಪೇನಲ್ಲಿ ತಪ್ಪಾಗಿ ಬೇರೆಯವರಿಗೆ ಹಣ ಕಳಿಸಿದ್ದೀರಾ? ಮರಳಿ ಪಡೆಯಲು ಇಲ್ಲಿದೆ ದಾರಿ

ಖರೀದಿ ಮಾಡುವುದು ಹೇಗೆ?
ಎಲ್‌ಐಸಿಯ ಈ ‘ಜೀವನ್ ಉತ್ಸವ್ ಸಿಂಗಲ್ ಪ್ರೀಮಿಯಂ’ ಯೋಜನೆ (UIN: 512N392V01) 2026ರ ಜನವರಿ 12ರಿಂದ ಸಾರ್ವಜನಿಕರಿಗೆ ಖರೀದಿಗೆ ಲಭ್ಯವಿರುತ್ತದೆ.

ಆಫ್‌ಲೈನ್: ಪರವಾನಗಿ ಪಡೆದ ಏಜೆಂಟ್‌ಗಳು, ಬ್ರೋಕರ್‌ಗಳು ಅಥವಾ ವಿಮಾ ಮಾರ್ಕೆಟಿಂಗ್ ಸಂಸ್ಥೆಗಳ ಮೂಲಕ ಪಡೆಯಬಹುದು.

ಆನ್‌ಲೈನ್: ಎಲ್‌ಐಸಿಯ ಅಧಿಕೃತ ವೆಬ್‌ಸೈಟ್ http://www.licindia.in ಮೂಲಕ ನೇರವಾಗಿ ಖರೀದಿಸಲು ಅವಕಾಶವಿದೆ.

ಯಾರಿಗೆ ಇದು ಸೂಕ್ತ?
ತಮ್ಮ ಹತ್ತಿರವಿರುವ ದೊಡ್ಡ ಮೊತ್ತವನ್ನು ಸುರಕ್ಷಿತವಾಗಿ ಹೂಡಿಕೆ ಮಾಡಿ, ಭವಿಷ್ಯದಲ್ಲಿ ಜೀವನಪೂರ್ತಿ ಸ್ಥಿರ ಆದಾಯವನ್ನು ಬಯಸುವವರಿಗೆ ಮತ್ತು ತೆರಿಗೆ ಉಳಿತಾಯದ ಜೊತೆಗೆ ಕುಟುಂಬಕ್ಕೆ ಆರ್ಥಿಕ ಭದ್ರತೆ ನೀಡಲು ಬಯಸುವವರಿಗೆ ಈ ಯೋಜನೆ ಅತ್ಯಂತ ಸೂಕ್ತವಾಗಿದೆ.