ಕಿಸಾನ್ ವಿಕಾಸ್ ಪತ್ರ ಯೋಜನೆ: ಹಣ ದುಪ್ಪಟ್ಟಾಗಿಸಲು ಸುವರ್ಣಾವಕಾಶ

Kisan Vikas Patra Scheme benefits: ಸುರಕ್ಷಿತ ಹೂಡಿಕೆ ಹಾಗೂ ಗ್ಯಾರಂಟಿ ಲಾಭವನ್ನು ಬಯಸುವ ಹೂಡಿಕೆದಾರರಿಗೆ ಭಾರತೀಯ ಅಂಚೆ ಇಲಾಖೆಯ ‘ಕಿಸಾನ್ ವಿಕಾಸ್ ಪತ್ರ’ (KVP) ಒಂದು ಅತ್ಯುತ್ತಮ ಆಯ್ಕೆಯಾಗಿ ಹೊರಹೊಮ್ಮಿದೆ. ಈ ಯೋಜನೆಯಲ್ಲಿ ಹೂಡಿಕೆ ಮಾಡಿದ ಹಣವು ಕೇವಲ 115 ತಿಂಗಳುಗಳಲ್ಲಿ (9 ವರ್ಷ 7 ತಿಂಗಳು) ದುಪ್ಪಟ್ಟಾಗಲಿದ್ದು, ಸಂಪ್ರದಾಯಬದ್ಧ ಹೂಡಿಕೆದಾರರಿಗೆ ಇದು ವರದಾನವಾಗಿದೆ.

ಸ್ಥಿರ ಬಡ್ಡಿ ದರ: ಪ್ರಸ್ತುತ ಈ ಯೋಜನೆಗೆ ವಾರ್ಷಿಕ 7.5% ರಷ್ಟು ಬಡ್ಡಿ ದರವನ್ನು ನಿಗದಿಪಡಿಸಲಾಗಿದೆ. ಮಾರುಕಟ್ಟೆಯ ಏರಿಳಿತಗಳ ನಡುವೆಯೂ ಈ ಯೋಜನೆಯಲ್ಲಿ ಹೂಡಿಕೆದಾರರಿಗೆ ನಿಶ್ಚಿತ ರಿಟರ್ನ್ಸ್ ಸಿಗುವುದು ಇದರ ವಿಶೇಷತೆ.

ಹಣ ದುಪ್ಪಟ್ಟು: ಈ ಯೋಜನೆಯಡಿ ಹೂಡಿಕೆದಾರರು ತಾವು ಹೂಡಿದ ಮೊತ್ತದ ಮೇಲೆ ಶೇ. 100 ರಷ್ಟು ಲಾಭವನ್ನು ಪಡೆಯುತ್ತಾರೆ. ಅಂದರೆ, ನೀವು ಹೂಡಿದ ಹಣವು ನಿಗದಿತ ಅವಧಿಯೊಳಗೆ ಎರಡು ಪಟ್ಟು ಹೆಚ್ಚಾಗುತ್ತದೆ.

ಲಾಕ್-ಇನ್ ಅವಧಿ: ಈ ಯೋಜನೆಗೆ 2.5 ವರ್ಷಗಳ (30 ತಿಂಗಳು) ಕನಿಷ್ಠ ಲಾಕ್-ಇನ್ ಅವಧಿ ಇರುತ್ತದೆ. ಈ ಅವಧಿಯ ನಂತರ ತುರ್ತು ಸಂದರ್ಭಗಳಲ್ಲಿ ಹಣವನ್ನು ಹಿಂಪಡೆಯಲು ಅವಕಾಶವಿದೆ.

ಸುರಕ್ಷತೆ: ಇದು ಸರ್ಕಾರಿ ಸ್ವಾಮ್ಯದ ಯೋಜನೆಯಾಗಿರುವುದರಿಂದ ನಿಮ್ಮ ಹೂಡಿಕೆಗೆ ಯಾವುದೇ ಅಪಾಯವಿರುವುದಿಲ್ಲ.

ಸುಕನ್ಯಾ ಸಮೃದ್ಧಿ ಯೋಜನೆ: ಹೆಣ್ಣುಮಕ್ಕಳ ಬಾಳು ಬಂಗಾರವಾಗಲು ಹೀಗೆ ಮಾಡಿ

ತೆರಿಗೆ ಮತ್ತು ವರ್ಗಾವಣೆ: ಈ ಯೋಜನೆಯಲ್ಲಿ ಹೂಡಿಕೆ ಮಾಡುವ ಮೊತ್ತಕ್ಕೆ ಆದಾಯ ತೆರಿಗೆ ಕಾಯ್ದೆಯಡಿ ಯಾವುದೇ ತೆರಿಗೆ ವಿನಾಯಿತಿ ಸಿಗುವುದಿಲ್ಲ. ಆದರೆ, ಈ ಪ್ರಮಾಣಪತ್ರವನ್ನು ಒಬ್ಬ ವ್ಯಕ್ತಿಯಿಂದ ಇನ್ನೊಬ್ಬರಿಗೆ ಅಥವಾ ಒಂದು ಅಂಚೆ ಕಚೇರಿಯಿಂದ ಇನ್ನೊಂದು ಕಚೇರಿಗೆ ವರ್ಗಾಯಿಸಲು ಅವಕಾಶವಿದೆ.

ಯಾರು ಅರ್ಜಿ ಸಲ್ಲಿಸಬಹುದು? ಯಾವುದೇ ವಯಸ್ಕ ಭಾರತೀಯ ನಾಗರಿಕರು ತಮ್ಮ ಹೆಸರಲ್ಲಿ ಅಥವಾ ಜಂಟಿಯಾಗಿ (Joint Account) ಈ ಯೋಜನೆಯನ್ನು ಆರಂಭಿಸಬಹುದು. ಅಪ್ರಾಪ್ತ ವಯಸ್ಕರ ಪರವಾಗಿ ಪೋಷಕರು ಹೂಡಿಕೆ ಮಾಡಲು ಸಹ ಅವಕಾಶವಿದೆ.

ಹೂಡಿಕೆ ಮಾಡುವುದು ಹೇಗೆ? ನಿಮ್ಮ ಹತ್ತಿರದ ಯಾವುದೇ ಅಂಚೆ ಕಚೇರಿ (Post Office) ಅಥವಾ ಅಧಿಕೃತ ಬ್ಯಾಂಕ್‌ಗಳಲ್ಲಿ ಕಿಸಾನ್ ವಿಕಾಸ್ ಪತ್ರವನ್ನು ಖರೀದಿಸಬಹುದು. ಕನಿಷ್ಠ 1,000 ರೂಪಾಯಿಗಳಿಂದ ಹೂಡಿಕೆ ಆರಂಭಿಸಬಹುದು ಮತ್ತು ಗರಿಷ್ಠ ಹೂಡಿಕೆಗೆ ಯಾವುದೇ ಮಿತಿಯಿಲ್ಲ.