1979ರ ನಂತರ ಅತಿ ಹೆಚ್ಚು ಲಾಭ ತಂದು ಕೊಟ್ಟ ಬೆಳ್ಳಿ; 2026ರಲ್ಲಿ ಬೆಲೆ ಕುಸಿದು ಹೋಗುತ್ತಾ?

Silver Rate Today: ಪ್ರಸಕ್ತ 2025ನೇ ಸಾಲಿನಲ್ಲಿ ಬೆಳ್ಳಿಯ ಬೆಲೆಯು ಜಾಗತಿಕ ಮಾರುಕಟ್ಟೆಯಲ್ಲಿ ಹಿಂದೆಂದೂ ಕಾಣದ ರೀತಿಯಲ್ಲಿ ಶೇ. 150 ರಷ್ಟು ಭಾರಿ ಏರಿಕೆ ಕಾಣುವ ಮೂಲಕ ಇತಿಹಾಸ ಸೃಷ್ಟಿಸಿದೆ. ಈ ಮೂಲಕ 1979ರ ನಂತರ ಅತಿ ಹೆಚ್ಚು ವಾರ್ಷಿಕ ಲಾಭ ತಂದುಕೊಟ್ಟ ಶ್ರೇಷ್ಠ ಹೂಡಿಕೆ ಸಾಧನವಾಗಿ ಬೆಳ್ಳಿ ಹೊರಹೊಮ್ಮಿದೆ.

ದಶಕಗಳ ದಾಖಲೆ ಅಳಿಸಿದ ಬೆಳ್ಳಿ
ಶುಕ್ರವಾರದ ವಹಿವಾಟಿನಲ್ಲಿ ಅಂತರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಬೆಳ್ಳಿಯ ಬೆಲೆ ಪ್ರತಿ ಔನ್ಸ್‌ಗೆ (Ounce) ಮೊದಲ ಬಾರಿಗೆ 75 ಡಾಲರ್ ಗಡಿ ದಾಟುವ ಮೂಲಕ ಶೇ. 5 ರಷ್ಟು ಏರಿಕೆ ಕಂಡಿದೆ. ಭಾರತೀಯ ಮಾರುಕಟ್ಟೆಯಾದ ಎಂಸಿಎಕ್ಸ್ (MCX) ನಲ್ಲಿ ಬೆಳ್ಳಿ ಬೆಲೆ ಶೇ. 4 ರಷ್ಟು ಜಿಗಿದು ಪ್ರತಿ ಕೆಜಿಗೆ ₹2,32,700 ಎಂಬ ಸಾರ್ವಕಾಲಿಕ ದಾಖಲೆಯ ಮಟ್ಟವನ್ನು ತಲುಪಿದೆ.

1970ರ ದಶಕದ ಹೋಲಿಕೆ:
1970ರಲ್ಲಿ ಬೆಳ್ಳಿಯ ಬೆಲೆ ಪ್ರತಿ ಔನ್ಸ್‌ಗೆ ಕೇವಲ 1.60 ಡಾಲರ್‌ನಿಂದ 1.80 ಡಾಲರ್ ಆಸುಪಾಸಿನಲ್ಲಿತ್ತು. 1979ರಲ್ಲಿ ಹಂಟ್ ಬ್ರದರ್ಸ್ ಮಾರುಕಟ್ಟೆಯನ್ನು ನಿಯಂತ್ರಿಸಲು ಯತ್ನಿಸಿದಾಗ ಬೆಲೆಗಳಲ್ಲಿ ಭಾರಿ ಏರಿಕೆ ಕಂಡುಬಂದಿತ್ತು. ಈಗ 2025ರಲ್ಲಿ ಬೆಳ್ಳಿಯು 1979ರ ಆ ಐತಿಹಾಸಿಕ ಏರಿಕೆಯ ದಾಖಲೆಯನ್ನು ಸರಿಗಟ್ಟುವ ಹಾದಿಯಲ್ಲಿದೆ. 1970ರ ಬೆಲೆಗೆ ಹೋಲಿಸಿದರೆ ಇಂದು ಬೆಳ್ಳಿಯ ಮೌಲ್ಯ ಸುಮಾರು 45 ಪಟ್ಟು ಹೆಚ್ಚಾಗಿದೆ.

ಬೆಲೆ ಏರಿಕೆಗೆ ಪ್ರಮುಖ ಕಾರಣಗಳು:
ಜಾಗತಿಕ ರಾಜಕೀಯ ವಿದ್ಯಮಾನಗಳು ಬೆಳ್ಳಿಯನ್ನು ‘ಸುರಕ್ಷಿತ ಹೂಡಿಕೆ’ಯಾಗಿ ಬದಲಿಸಿವೆ: ರಷ್ಯಾ-ಉಕ್ರೇನ್ ಬಿಕ್ಕಟ್ಟು ಸುದೀರ್ಘವಾಗಿ ನಡೆಯುತ್ತಿರುವ ಈ ಯುದ್ಧವು ಮಾರುಕಟ್ಟೆಯಲ್ಲಿ ಅನಿಶ್ಚಿತತೆ ಮೂಡಿಸಿದೆ.

ಅಮೆರಿಕ-ವೆನೆಜುವೆಲಾ ಸಂಘರ್ಷ: ಇತ್ತೀಚೆಗೆ ಅಮೆರಿಕ ಮತ್ತು ವೆನೆಜುವೆಲಾ ನಡುವೆ ಉಂಟಾಗಿರುವ ಉದ್ವಿಗ್ನತೆಯು ಹೂಡಿಕೆದಾರರನ್ನು ಲೋಹದ ಮಾರುಕಟ್ಟೆಯತ್ತ ಸೆಳೆದಿದೆ.

ಕೈಗಾರಿಕಾ ಬೇಡಿಕೆ: ಹಸಿರು ಇಂಧನ ಮತ್ತು ಎಲೆಕ್ಟ್ರಾನಿಕ್ ಉಪಕರಣಗಳಲ್ಲಿ ಬೆಳ್ಳಿಯ ಬಳಕೆ ಹೆಚ್ಚುತ್ತಿರುವುದು ಕೂಡ ಬೆಲೆ ಏರಿಕೆಗೆ ಪೂರಕವಾಗಿದೆ.

ಇದನ್ನೂ ಓದಿ: 10,000ಕ್ಕೆ ಬೆಸ್ಟ್ 5G ಸ್ಮಾರ್ಟ್‌ಫೋನ್‌ಗಳು: ಸ್ಯಾಮ್‌ಸಂಗ್, ರೆಡ್ಮಿ ಮತ್ತು ಪೊಕೊ ಯಾವುದು ಬೆಸ್ಟ್?

ತಜ್ಞರ ಎಚ್ಚರಿಕೆ: ಲಾಭಾಂಶ ಬುಕ್ಕಿಂಗ್ (Profit Booking) ಸಂಭವ
ಬೆಳ್ಳಿಯು ಎಲ್ಲಾ ವರ್ಗದ ಆಸ್ತಿಗಳಿಗಿಂತ (Asset Classes) ಉತ್ತಮ ಲಾಭ ನೀಡಿದ್ದರೂ, ಮಾರುಕಟ್ಟೆ ತಜ್ಞರು ಈಗ ಎಚ್ಚರಿಕೆಯ ಸಂದೇಶ ನೀಡಿದ್ದಾರೆ. ‘ಚಿನ್ನ-ಬೆಳ್ಳಿ ಅನುಪಾತ’ವನ್ನು (Gold-Silver Ratio) ಗಮನಿಸಿದರೆ, ಬೆಳ್ಳಿ ಸದ್ಯ ಅತಿಯಾದ ಮೌಲ್ಯೀಕರಣಕ್ಕೆ (Overvalued) ಒಳಗಾದಂತೆ ಕಾಣುತ್ತಿದೆ. ಅಂದರೆ, ಸದ್ಯದ ಗರಿಷ್ಠ ಮಟ್ಟದಲ್ಲಿ ಹೂಡಿಕೆದಾರರು ತಮ್ಮ ಲಾಭವನ್ನು ನಗದೀಕರಿಸಿಕೊಳ್ಳಲು (Profit Booking) ಮುಂದಾಗಬಹುದು, ಇದರಿಂದಾಗಿ ಬೆಲೆಗಳಲ್ಲಿ ಅಲ್ಪಮಟ್ಟದ ಕುಸಿತ ಅಥವಾ ಸ್ಥಿರತೆ ಕಂಡುಬರುವ ಸಾಧ್ಯತೆಯಿದೆ ಎಂದು ಆರ್ಥಿಕ ತಜ್ಞರು ವಿಶ್ಲೇಷಿಸಿದ್ದಾರೆ. ಬೆಳ್ಳಿಯಲ್ಲಿ ಹೂಡಿಕೆ ಮಾಡಿದವರಿಗೆ 2025 ಲಕ್ಕಿ ವರ್ಷವಾಗಿದೆ. ಆದರೆ ಹೊಸದಾಗಿ ಹೂಡಿಕೆ ಮಾಡುವವರು ಮಾರುಕಟ್ಟೆಯ ಏರಿಳಿತವನ್ನು ಗಮನಿಸಿ ಹೆಜ್ಜೆ ಇಡುವುದು ಕ್ಷೇಮ.