ಕಿರುತೆರೆಯಲ್ಲಿ ಹೂವಿನ ಬಾಣದಂತೆ ನಿತ್ಯಶ್ರೀ! ಯಾವ ಚಾನಲ್‌ನಲ್ಲಿ?

Hoovina Baanadanthe Song Nithyashree: ಬೆಂಗಳೂರು: ‘ಹೂವಿನ ಬಾಣದಂತೆ’ ಹಾಡಿನ ಮೂಲಕ ಸೋಶಿಯಲ್ ಮೀಡಿಯಾದಲ್ಲಿ ರಾತ್ರೋರಾತ್ರಿ ವೈರಲ್ ಆಗಿದ್ದ ನಿತ್ಯಶ್ರೀ, ಈಗ ಜೀ ಕನ್ನಡ ವಾಹಿನಿಯ ಜನಪ್ರಿಯ ರಿಯಾಲಿಟಿ ಶೋ ‘ಕಾಮಿಡಿ ಕಿಲಾಡಿಗಳು’ ವೇದಿಕೆಯಲ್ಲಿ ಕಾಣಿಸಿಕೊಳ್ಳುವ ಮೂಲಕ ಸುದ್ದಿಯಲ್ಲಿದ್ದಾರೆ. ಆದರೆ, ಈ ಅವಕಾಶದ ಬೆನ್ನಲ್ಲೇ ಅವರ ವಿರುದ್ಧ ಕೇಳಿಬಂದ ಟ್ರೋಲ್‌ಗಳಿಗೆ ನಿತ್ಯಶ್ರೀ ವಿಡಿಯೋ ಮೂಲಕ ತಕ್ಕ ಉತ್ತರ ನೀಡಿದ್ದಾರೆ.

ವೈರಲ್ ಸ್ಟಾರ್ ಟು ಕಾಮಿಡಿ ಕಿಲಾಡಿಗಳು
ತಮ್ಮ ವಿಭಿನ್ನ ಗಾಯನ ಶೈಲಿಯಿಂದಲೇ ಸಾಮಾಜಿಕ ಜಾಲತಾಣದಲ್ಲಿ ಚರ್ಚೆಗೆ ಒಳಗಾಗಿದ್ದ ನಿತ್ಯಶ್ರೀ ಅವರಿಗೆ ಈಗ ಹೊಸ ಅವಕಾಶಗಳ ಬಾಗಿಲು ತೆರೆದಿದೆ. ಇತ್ತೀಚೆಗೆ ನಡೆದ ‘ಕಾಮಿಡಿ ಕಿಲಾಡಿಗಳು’ ಸಂಚಿಕೆಯಲ್ಲಿ ಅತಿಥಿ ಕಲಾವಿದೆಯಾಗಿ ಕಾಣಿಸಿಕೊಂಡಿದ್ದ ಅವರು, ಅಲ್ಲಿ ತಮ್ಮ ನಟನಾ ಕೌಶಲವನ್ನು ಪ್ರದರ್ಶಿಸಿದ್ದರು. ಈ ಕುರಿತು ಅತೀವ ಸಂತಸ ವ್ಯಕ್ತಪಡಿಸಿರುವ ಅವರು, ತಮ್ಮ ಮೇಲೆ ಬರುತ್ತಿರುವ ನೆಗೆಟಿವ್ ಟೀಕೆಗಳಿಗೆ ಬೇಸರ ವ್ಯಕ್ತಪಡಿಸಿದ್ದಾರೆ.

ಟ್ರೋಲಿಗರಿಗೆ ನಿತ್ಯಶ್ರೀ ಪ್ರಶ್ನೆಗಳ ಸುರಿಮಳೆ
ತಮ್ಮನ್ನು ಟ್ರೋಲ್ ಮಾಡುವವರಿಗೆ ನೇರ ಪ್ರಶ್ನೆ ಹಾಕಿರುವ ನಿತ್ಯಶ್ರೀ, “ನನಗೆ ಸಿಕ್ಕ ಈ ಅವಕಾಶ ನಿಮ್ಮ ಮನೆಯ ಹೆಣ್ಣುಮಕ್ಕಳಿಗೆ ಸಿಕ್ಕಿದ್ದರೆ ನೀವು ಹೀಗೆಯೇ ಮಾಡುತ್ತಿದ್ದೀರಾ?” ಎಂದು ಕೇಳಿದ್ದಾರೆ.

“ನಾನು ಹಾಡನ್ನು ಸರಿಯಾಗಿ ಹಾಡಿಲ್ಲ ಎಂಬುದು ನನಗೂ ಗೊತ್ತು, ಅದಕ್ಕೆ ಕ್ಷಮೆಯನ್ನೂ ಕೇಳಿದ್ದೇನೆ. ಆದರೆ ಅವಕಾಶ ಸಿಕ್ಕಾಗ ಅದನ್ನು ಬಳಸಿಕೊಳ್ಳುವುದು ತಪ್ಪಲ್ಲ. ವೇದಿಕೆಯ ಮೇಲಿನ ಭಯವಿಲ್ಲದೆ (Stage Fear) ನೂರಾರು ಜನರ ಮುಂದೆ ನಟಿಸುವುದು ಕೂಡ ಒಂದು ಟ್ಯಾಲೆಂಟ್ ಅಲ್ವಾ?” ಎಂದು ಅವರು ವಾದಿಸಿದ್ದಾರೆ.

ಎಸ್‌ಬಿಐ ಸ್ಪೆಷಲಿಸ್ಟ್‌ ಆಫೀಸರ್‌ ಹುದ್ದೆಗಳಿಗೆ ಅರ್ಜಿ ಸಲ್ಲಿಕೆ ದಿನಾಂಕ ವಿಸ್ತರಣೆ: ಆಸಕ್ತ ಅಭ್ಯರ್ಥಿಗಳು ತಕ್ಷಣ ಅರ್ಜಿ ಸಲ್ಲಿಸಿ

ಕುಟುಂಬದವರ ಬಗ್ಗೆ ಯೋಚಿಸಿ ಎಂದು ಭಾವುಕ ಮನವಿ
ವಿಡಿಯೋದಲ್ಲಿ ಟ್ರೋಲಿಗರ ವಿರುದ್ಧ ಕಿಡಿಕಾರಿದ ಅವರು, “ನಾನು ಇನ್ನೂ ದೊಡ್ಡ ಸಾಧನೆ ಮಾಡಿಲ್ಲ ನಿಜ, ಆದರೆ ಕನ್ನಡಿಗರು ನನಗೆ ಸಾಧನೆ ಮಾಡಲು ಒಂದು ದಾರಿ ಮಾಡಿಕೊಟ್ಟಿದ್ದಾರೆ. ವಿಡಿಯೋ ಮಾಡಿ ವ್ಯಂಗ್ಯವಾಡುವ ಮೊದಲು, ಅದನ್ನು ನಮ್ಮ ತಂದೆ-ತಾಯಿ ನೋಡಿದರೆ ಅವರಿಗೆ ಎಷ್ಟು ನೋವಾಗಬಹುದು ಎಂದು ಯೋಚಿಸಿ. ಅತಿರೇಕದ ಟ್ರೋಲ್‌ಗಳನ್ನು ನಿಲ್ಲಿಸಿ” ಎಂದು ಮನವಿ ಮಾಡಿದ್ದಾರೆ.