ತಿರುಪತಿ ಭಕ್ತರಿಗೆ ಹೊಸ ರೈಲು ಸೌಲಭ್ಯ! ಮೇ 28ರಿಂದ ರೈಲು ಸಂಚಾರ

ತಿರುಪತಿಗೆ ಪ್ರಯಾಣಿಸುವ ಭಕ್ತರು ಹಾಗೂ ಹೈದರಾಬಾದ್ ಮಾರ್ಗದ ಪ್ರಯಾಣಿಕರಿಗೆ ಭಾರತೀಯ ರೈಲ್ವೆ ಇಲಾಖೆ ಸಂತಸದ ಸುದ್ದಿ ನೀಡಿದೆ. ಈಗಾಗಲೇ ಸ್ಪೆಷಲ್ ರೈಲಾಗಿ ಸಂಚರಿಸುತ್ತಿದ್ದ ತಿರುಪತಿ–ಚೆರ್ಲಪಳ್ಳಿ ಸೇವೆಯನ್ನು ನಿಯಮಿತ ವೀಕ್ಲಿ ಎಕ್ಸ್‌ಪ್ರೆಸ್ ರೈಲಾಗಿ ಪರಿವರ್ತಿಸಲು ರೈಲ್ವೆ ಸಚಿವಾಲಯ ಅನುಮೋದನೆ ನೀಡಿದೆ.

ಹೊಸದಾಗಿ 17443/17444 ಸಂಖ್ಯೆಯ ವೀಕ್ಲಿ ಎಕ್ಸ್‌ಪ್ರೆಸ್ ರೈಲು ಮೇ 28, 2026ರಿಂದ ಕಾರ್ಯಾಚರಣೆ ಆರಂಭಿಸಲಿದೆ. ಈ ಹೊಸ ಸೇವೆಯಿಂದ ತಿರುಪತಿ ಮತ್ತು ಹೈದರಾಬಾದ್ ನಡುವಿನ ಪ್ರಯಾಣ ಮತ್ತಷ್ಟು ಸುಲಭವಾಗುವ ನಿರೀಕ್ಷೆಯಿದೆ.

ರೈಲು ಸಂಖ್ಯೆ 17443 ತಿರುಪತಿ–ಚೆರ್ಲಪಳ್ಳಿ ವೀಕ್ಲಿ ಎಕ್ಸ್‌ಪ್ರೆಸ್ ಪ್ರತಿ ಗುರುವಾರ ಸಂಜೆ 4.30ಕ್ಕೆ ತಿರುಪತಿಯಿಂದ ಹೊರಟು, ಮುಂದಿನ ದಿನ ಬೆಳಿಗ್ಗೆ 8.25ಕ್ಕೆ ಚೆರ್ಲಪಳ್ಳಿಗೆ ತಲುಪಲಿದೆ. ಅದೇ ರೀತಿ, 17444 ಚೆರ್ಲಪಳ್ಳಿ–ತಿರುಪತಿ ಎಕ್ಸ್‌ಪ್ರೆಸ್ ಪ್ರತಿ ಶುಕ್ರವಾರ ಸಂಜೆ 4.20ಕ್ಕೆ ಹೊರಟು ಶನಿವಾರ ಬೆಳಿಗ್ಗೆ 7.30ಕ್ಕೆ ತಿರುಪತಿಗೆ ಆಗಮಿಸಲಿದೆ.

ಈ ರೈಲು ರೇಣಿಗುಂಟ, ರಾಜಂಪೇಟ, ಕಡಪ, ಎರ್ರಗುಂಟ್ಲ, ಪ್ರೊದ್ದುತೂರು, ನಂದ್ಯಾಲ, ಗಿದ್ದಲೂರು, ಮಾರ್ಕಾಪುರ ರೋಡ್, ಪಿಡುಗುರಾಳ, ನಡಿಕುಡೆ ಮತ್ತು ಮಿರ್ಯಾಲಗೂಡ ಮೊದಲಾದ ಪ್ರಮುಖ ನಿಲ್ದಾಣಗಳಲ್ಲಿ ನಿಲುಗಡೆ ಮಾಡಲಿದೆ. ಇದರಿಂದ ರಾಯಲಸೀಮ ಹಾಗೂ ತೆಲಂಗಾಣ ಪ್ರದೇಶದ ಜನರಿಗೆ ಉತ್ತಮ ಸಂಪರ್ಕ ವ್ಯವಸ್ಥೆ ಸಿಗಲಿದೆ.

ಪ್ರಯಾಣಿಕರ ಅಗತ್ಯವನ್ನು ಗಮನದಲ್ಲಿಟ್ಟುಕೊಂಡು ರೈಲಿನಲ್ಲಿ 1 ಏಸಿ 2-ಟಿಯರ್ ಕೋಚ್, 3 ಏಸಿ 3-ಟಿಯರ್ ಬೋಗಿಗಳು, 14 ಸ್ಲೀಪರ್ ಕ್ಲಾಸ್ ಕೋಚ್‌ಗಳು ಹಾಗೂ 4 ಜನರಲ್ ಸೆಕೆಂಡ್ ಕ್ಲಾಸ್ ಬೋಗಿಗಳನ್ನು ಸೇರಿಸಲಾಗಿದೆ. ಸಾಮಾನ್ಯ ಪ್ರಯಾಣಿಕರಿಂದ ಹಿಡಿದು ದೂರ ಪ್ರಯಾಣ ಮಾಡುವವರಿಗೆ ಸಹಾಯಕವಾಗುವಂತೆ ಈ ರೈಲು ವಿನ್ಯಾಸಗೊಳಿಸಲಾಗಿದೆ.

ಹೊಸ ವೀಕ್ಲಿ ಎಕ್ಸ್‌ಪ್ರೆಸ್ ಆರಂಭವಾದ ಬಳಿಕ ತಿರುಪತಿ–ಹೈದರಾಬಾದ್ ಮಾರ್ಗದಲ್ಲಿನ ಪ್ರಯಾಣಿಕರ ಒತ್ತಡವೂ ಕೆಲ ಮಟ್ಟಿಗೆ ಕಡಿಮೆಯಾಗುವ ಸಾಧ್ಯತೆ ಇದೆ ಎಂದು ರೈಲ್ವೆ ಅಧಿಕಾರಿಗಳು ತಿಳಿಸಿದ್ದಾರೆ.