ನವದೆಹಲಿ : ದೇಶದಲ್ಲಿ ಕೋವಿಡ್-19 ವೈರಸ್ ಪ್ರಕರಣಗಳ ಸಂಖ್ಯೆ ಹೆಚ್ಚಳವಾಗುತ್ತಿರುವ ಬೆನ್ನಲ್ಲೇ ಭಾರತದ ಎಲ್ಲಾ ವಿಮಾನಗಳ ಹಾರಾಟವನ್ನು ರದ್ದುಪಡಿಸುವುದಾಗಿ ಯುಎಇ ಪ್ರಕಟಿಸಿದೆ.
ಕೋವಿಡ್ ಸೋಂಕಿನ ಪ್ರಕರಣಗಳು ದಿನೇ ದಿನೇ ಹೆಚ್ಚುತ್ತಲೇ ಇದೆ. ಕೊರೊನಾ ಸೋಂಕಿನ ತಡೆಯ ಹಿನ್ನೆಲೆಯಲ್ಲಿ ಯುಎಇ ಎಪ್ರಿಲ್ 25 ರಿಂದ ಮೇ 3ರ ವರೆಗೆ ತನ್ನ ದೇಶಕ್ಕೆ ಬರುವ ಭಾರತದ ವಿಮಾನಗಳನ್ನು ರದ್ದು ಪಡಿಸಿದೆ. ಮಾತ್ರವಲ್ಲ ಭಾರತದಿಂದ ಪ್ರಯಾಣಿಕರು ಬೇರೆ ರಾಷ್ಟ್ರಗಳ ಮೂಲಕ ಯುಎಇ ಪ್ರವೇಶಿಸುವುದಕ್ಕೂ ನಿರ್ಬಂಧ ವಿಧಿಸಲಾಗಿದೆ. ಒಂದೊಮ್ಮೆ ಇತರ ರಾಷ್ಟ್ರಗಳಿಗೆ ತೆರಳ ಬೇಕಾದ ಭಾರತೀಯರು ಯುಎಇಯಲ್ಲಿ 14 ದಿನಗಳ ಕಾಲ ಕ್ವಾರಂಟೈನ್ ಗೆ ಒಳಪಟ್ಟರೆ ತದನಂತರದಲ್ಲಿ ಯುಎಇ ಪ್ರವೇಶವನ್ನು ಅವಕಾಶ ಕಲ್ಪಿಸಲಾಗಿದೆ.
ಭಾರತ ಹಾಗೂ ಯುಎಇ ನಡುವೆ ಕೇವಲ ಪ್ರಯಾಣಿಕರ ವಿಮಾನಗಳಿಗಷ್ಟೇ ನಿರ್ಬಂಧ ವಿಧಿಸಲಾಗಿದೆ. ಆದರೆ ಉಭಯ ರಾಷ್ಟ್ರಗಳ ನಡುವೆ ಕಾರ್ಗೊ ವಿಮಾನಗಳು ಹಾಗೂ ಯುಎಇನಿಂದ ಭಾರತಕ್ಕೆ ಬಂದಿಳಿಯುವ ವಿಮಾನಗಳ ಮೇಲೆ ಯಾವುದೇ ನಿರ್ಬಂಧ ಇರುವುದಿಲ್ಲ ಎಂದು ಪ್ರಕಟಣೆಯಲ್ಲಿ ತಿಳಿಸಿದೆ.
