Hanuman Jayanti 2023: ದಿನಾಂಕ, ಇತಿಹಾಸ, ಮಹತ್ವ, ಶುಭ ಮುಹೂರ್ತಗಳ ಬಗ್ಗೆ ಇಲ್ಲಿದೆ ಸಂಪೂರ್ಣ ವಿವರ

(Hanuman Jayanti 2023) ಹನುಮ ಜಯಂತಿಯು ಹಿಂದೂ ಧರ್ಮದಲ್ಲಿ ಒಂದು ಪ್ರಮುಖ ಧಾರ್ಮಿಕ ಹಬ್ಬವಾಗಿದ್ದು, ಭಗವಾನ್ ಹನುಮಾನ್ ಜನ್ಮ ದಿನವನ್ನು ಆಚರಿಸಲಾಗುತ್ತದೆ. ಹನುಮ ಜಯಂತಿಯು ಚೈತ್ರ ಮಾಸದ ಪೂರ್ಣಿಮಾ ತಿಥಿ ಅಥವಾ ಶುಕ್ಲ ಪಕ್ಷದ ಹುಣ್ಣಿಮೆಯಂದು ಬರುತ್ತದೆ. ಭಗವಾನ್ ಹನುಮ ಅಂಜನಾ ಮತ್ತು ಕೇಸರಿಯ ಪುತ್ರನಾಗಿದ್ದು, ಅವನನ್ನು ವಾನರ ದೇವರು, ಬಜರಂಗಬಲಿ, ವಾಯು ದೇವ ಎಂದೂ ಕರೆಯುತ್ತಾರೆ. ಶ್ರೀರಾಮ ಮತ್ತು ಸೀತೆಯ ಪರಮ ಭಕ್ತನಾದ ಹನುಮಂತನನ್ನು ಆಂಜನೇಯ ಎಂತಲೂ ಕರೆಯುತ್ತಾರೆ. ಹನುಮ ಜಯಂತಿ ಆಚರಣೆಯ ಹಿಂದೆ ಒಂದು ಪುರಾತನ ಕಥೆ ಕೂಡ ಇದೆ ಎಂದು ಹೇಳಲಾಗುತ್ತದೆ. ಹಾಗಿದ್ದರೆ ಹನುಮ ಜಯಂತಿಯ ಹಿಂದಿನ ಇತಿಹಾಸವೇನು ಎಂಬ ಬಗ್ಗೆ ಮಾಹಿತಿ ಇಲ್ಲಿದೆ.

ಹನುಮ ಜಯಂತಿ ಇತಿಹಾಸ ಮತ್ತು ಮಹತ್ವ ;
ಹನುಮ ಜಯಂತಿಯನ್ನು ಭಗವಾನ್ ಹನುಮಂತನ ಜನ್ಮದಿನವೆಂದು ಆಚರಿಸಲಾಗುತ್ತದೆ. ಹನುಮಂತನು ಭಗವಾನ್ ರಾಮನ ಭಕ್ತನಾಗಿದ್ದು, ರಾಮಾಯಣದ ಕೇಂದ್ರ ಬಿಂದು ಹನುಮ ಎಂದು ಹೇಳಲಾಗುತ್ತದೆ. ಇದಲ್ಲದೆ ಹನುಮಂತನ ಜನ್ಮದ ಮೂಲವು ಭಗವಾನ್ ರಾಮನ ಯುಗಕ್ಕೆ ಸಂಬಂಧಿಸಿದೆ ಎಂದು ಕೂಡ ಹೇಳಲಾಗುತ್ತದೆ. ಇದಲ್ಲದೇ ಹನುಮಂತ ಮಹಾದೇವನ ಅವತಾರ, ಅಷ್ಟ ಸಿದ್ಧಿ ಮತ್ತು ನವ ನಿಧಿಗಳನ್ನು ಹೊಂದಿರುವವನು ಎಂದೂ ಹೇಳಲಾಗುತ್ತದೆ.

ಹನುಮಂತನ ತಾಯಿ ಅಂಜನಾ ಅಪ್ಸರೆಯಾಗಿದ್ದು, ಶಾಪಗೃಸ್ತಳಾಗಿ ಭೂಮಿಯಲ್ಲಿ ಜನಿಸಿದಳು. ಹನುಮಂತನಿಗೆ ಜನ್ಮ ನೀಡಿದ ನಂತರ ಆಕೆಗೆ ಶಾಪ ವಿಮೋಚನೆಯಾಯಿತು. ಅಂಜನಾ ಮಗುವನ್ನು ಹೆರಲು ರುದ್ರನಿಗೆ ಹನ್ನೆರಡು ವರ್ಷಗಳ ಕಾಲ ತೀವ್ರವಾದ ಪ್ರಾರ್ಥನೆಗಳನ್ನು ಮಾಡಿದಳು ಎಂದು ಹೇಳಲಾಗುತ್ತದೆ. ಆಕೆಯ ಭಕ್ತಿಯಿಂದ ಸಂತುಷ್ಟನಾದ ನಂತರ, ರುದ್ರನು ಅವರು ಬಯಸಿದ ಮಗನನ್ನು ಅವರಿಗೆ ನೀಡಿದನು. ದೃಕ್ ಪಂಚಾಂಗದ ಪ್ರಕಾರ, ಹನುಮಂತನು ಸೂರ್ಯೋದಯದ ಸಮಯದಲ್ಲಿ ಜನಿಸಿದನೆಂದು ನಂಬಲಾಗಿದೆ. ಹೀಗಾಗಿ ಹನುಮ ಜಯಂತಿಯ ದಿನದಂದು, ದೇವಾಲಯಗಳು ಸೂರ್ಯೋದಯಕ್ಕೆ ಮುಂಚಿತವಾಗಿ ತೆರೆದು ಆಧ್ಯಾತ್ಮಿಕ ಪ್ರವಚನಗಳನ್ನು ಪ್ರಾರಂಭಿಸುತ್ತವೆ ಮತ್ತು ಸೂರ್ಯೋದಯದ ನಂತರ ಅದನ್ನು ನಿಲ್ಲಿಸುತ್ತವೆ ಎಂದು ನಂಬಲಾಗುತ್ತದೆ. ಈ ದಿನದ ಮಹತ್ವವು ಭಗವಾನ್ ಹನುಮಂತನ ಗುಣಗಳಾದ ನಿಷ್ಠೆ, ಧೈರ್ಯ, ನಿಸ್ವಾರ್ಥತೆಯಲ್ಲಿದೆ. ಹನುಮಂತನು ಎಲ್ಲಾ ದುಷ್ಟರಿಂದ, ದುಷ್ಟ ಕ್ರಿಯೆಗಳಿಂದ ರಕ್ಷಿಸುತ್ತಾನೆ ಎಂದು ಭಕ್ತರು ನಂಬುತ್ತಾರೆ.

ಚೈತ್ರ ಪೂರ್ಣಿಮೆ ಸಮಯದಲ್ಲಿ ಹನುಮ ಜಯಂತಿ ಉತ್ತರ ಭಾರತದ ರಾಜ್ಯಗಳಲ್ಲಿ ಅತ್ಯಂತ ಜನಪ್ರಿಯವಾಗಿದೆ. ಆದಾಗ್ಯೂ, ಆಂಧ್ರಪ್ರದೇಶ ಮತ್ತು ತೆಲಂಗಾಣದಲ್ಲಿ ಹನುಮ ಜಯಂತಿಯನ್ನು 41 ದಿನಗಳ ಕಾಲ ಆಚರಿಸಲಾಗುತ್ತದೆ, ಇದು ಚೈತ್ರ ಪೂರ್ಣಿಮೆಯಂದು ಪ್ರಾರಂಭವಾಗಿ ವೈಶಾಖ ಮಾಸದ ಕೃಷ್ಣ ಪಕ್ಷದ ಹತ್ತನೇ ದಿನದಂದು ಕೊನೆಗೊಳ್ಳುತ್ತದೆ. ತಮಿಳುನಾಡಿನಲ್ಲಿ ಹನುಮ ಜಯಂತಿಯನ್ನು ಹನುಮತ್ ಜಯಂತಿ ಎಂದು ಕರೆಯಲಾಗುತ್ತದೆ ಮತ್ತು ಮಾರ್ಗಶೀರ್ಷ ಅಮಾವಾಸ್ಯೆಯಲ್ಲಿ ಇದನ್ನು ಆಚರಿಸಲಾಗುತ್ತದೆ. ಗ್ರೆಗೋರಿಯನ್ ಕ್ಯಾಲೆಂಡರ್ ಪ್ರಕಾರ ತಮಿಳು ನಾಡಿನಲ್ಲಿ ಹನುಮ ಜಯಂತಿ ಜನವರಿ ಅಥವಾ ಡಿಸೆಂಬರ್‌ನಲ್ಲಿ ಬರುತ್ತದೆ. ಕರ್ನಾಟಕದಲ್ಲಿ ಮಾರ್ಗಶೀರ್ಷ ಮಾಸದ ಶುಕ್ಲ ಪಕ್ಷ ತ್ರಯೋದಶಿಯಂದು ಹನುಮ ಜಯಂತಿಯನ್ನು ಆಚರಿಸಲಾಗುತ್ತದೆ. ದೃಕ್ ಪಂಚಾಂಗದ ಪ್ರಕಾರ ಈ ದಿನವನ್ನು ಹನುಮಾನ್ ವ್ರತ ಎಂದು ಕರೆಯಲಾಗುತ್ತದೆ.

ಹನುಮ ಜಯಂತಿ ಮುಹೂರ್ತ:
ಹನುಮ ಜಯಂತಿಯನ್ನು ಗುರುವಾರ ಅಂದರೆ 6 ಏಪ್ರಿಲ್ 2023 ರಂದು ಆಚರಿಸಲಾಗುವುದು.
ಪೂರ್ಣಿಮಾ ತಿಥಿ ಆರಂಭ – 5 ಏಪ್ರಿಲ್, 2023 ರಂದು ಬೆಳಿಗ್ಗೆ 09:19
ಪೂರ್ಣಿಮಾ ತಿಥಿ ಅಂತ್ಯ- 6 ಏಪ್ರಿಲ್, 2023 ರಂದು ಬೆಳಿಗ್ಗೆ 10:04

ದೃಕ್ ಪಂಚಾಂಗದ ಪ್ರಕಾರ, ಶುಭ ಮುಹೂರ್ತದ ಸಮಯಗಳು ಇಲ್ಲಿವೆ:
ಬೆಳಿಗ್ಗೆ 06:06 – ಬೆಳಿಗ್ಗೆ 07:40 ರವರೆಗೆ
ಸಂಜೆ 12:24 – ಸಂಜೆ 01:58 ರವರೆಗೆ
ಮಧ್ಯಾಹ್ನ 1:58 – ಮಧ್ಯಾಹ್ನ 03:33 ರ ವರೆಗೆ
ಸಂಜೆ 5:07 – ಸಂಜೆ 06:42 ರ ವರೆಗೆ
ಸಂಜೆ 6:42 – ಸಂಜೆ 8:07 ರವರೆಗೆ

ಏಪ್ರಿಲ್ 7 ರಂದು, ಬೆಳಿಗ್ಗೆ 12:23 – ಬೆಳಿಗ್ಗೆ 01:49 ರವರೆಗೆ
ಬೆಳಿಗ್ಗೆ 04:39 – ಬೆಳಿಗ್ಗೆ 06:05 ರವರೆಗೆ

ಇದನ್ನೂ ಓದಿ : Mahavira Jayanti 2023: ಮಹಾವೀರ ಜಯಂತಿಗೆ ಇಲ್ಲಿವೆ ರುಚಿಕರವಾದ ಸಾಂಪ್ರದಾಯಿಕ ಭಕ್ಷ್ಯಗಳು

ಹನುಮ ಜಯಂತಿ ಆಚರಣೆ:
ಭಕ್ತರು ಈ ದಿನವನ್ನು ಹನುಮನ ದೇವಸ್ಥಾನಕ್ಕೆ ಭೇಟಿ ನೀಡುವ ಮೂಲಕ ಆಚರಿಸುತ್ತಾರೆ ಮತ್ತು ಕೆಲವರು ಹನುಮಂತನಿಗೆ ಸಿಂಧೂರವನ್ನು ಅರ್ಪಿಸುತ್ತಾರೆ. ಕೆಲವು ಭಕ್ತರು ಈ ದಿನ ಉಪವಾಸವನ್ನು ಕೂಡ ಆಚರಿಸುತ್ತಾರೆ.

Here is complete details about Hanuman Jayanti 2023: Date, History, Significance, Auspicious Moments