2026ರ ನಾಸ್ಟ್ರಡಾಮಸ್ ಭವಿಷ್ಯ: ಫ್ರೆಂಚ್ ಜ್ಯೋತಿಷಿ ಈ ವರ್ಷದ ಬಗ್ಗೆ ಹೇಳಿರುವುದೇನು?
Nostradamus predictions 2026: ಶತಮಾನಗಳ ಹಿಂದೆಯೇ ಜಗತ್ತಿನ ಪ್ರಮುಖ ಘಟನೆಗಳನ್ನು ನಿಖರವಾಗಿ ನುಡಿದಿದ್ದಾರೆ ಎಂದು ನಂಬಲಾದ ಫ್ರೆಂಚ್ ಜ್ಯೋತಿಷಿ ಮೈಕೆಲ್ ಡಿ ನಾಸ್ಟ್ರಡಾಮಸ್ ಅವರ 2026ರ ಭವಿಷ್ಯವಾಣಿಗಳು ಈಗ ಹೊರಬಿದ್ದಿವೆ. ಹವಾಮಾನ ಬದಲಾವಣೆ, ಭೌಗೋಳಿಕ ರಾಜಕೀಯ ಸಂಘರ್ಷ ಮತ್ತು ತಂತ್ರಜ್ಞಾನದ ಅತಿರೇಕದ ಬಗ್ಗೆ ಅವರು ನೀಡಿರುವ ಎಚ್ಚರಿಕೆಗಳು ಜಗತ್ತನ್ನು ಆತಂಕಕ್ಕೆ ತಳ್ಳಿವೆ.
ಮೂರನೇ ಮಹಾಯುದ್ಧದ ಆತಂಕ: ನಾಸ್ಟ್ರಡಾಮಸ್ ಅವರ ಬರಹಗಳನ್ನು ವಿಶ್ಲೇಷಿಸುವ ತಜ್ಞರ ಪ್ರಕಾರ, 2026ರಲ್ಲಿ ಜಗತ್ತಿನ ಎರಡು ಪ್ರಬಲ ಶಕ್ತಿಗಳ ನಡುವೆ ದೊಡ್ಡ ಮಟ್ಟದ ಸಶಸ್ತ್ರ ಸಂಘರ್ಷ ಏರ್ಪಡುವ ಸಾಧ್ಯತೆಯಿದೆ. ಇದು ಏಳು ತಿಂಗಳ ಕಾಲ ನಡೆಯುವ ಭೀಕರ ಯುದ್ಧವಾಗಿರಲಿದ್ದು, ಅನೇಕ ಪ್ರಾಣಹಾನಿಗೆ ಕಾರಣವಾಗಲಿದೆ ಎಂದು ಅವರು ಉಲ್ಲೇಖಿಸಿದ್ದಾರೆ ಎನ್ನಲಾಗಿದೆ.
ತಾಪಮಾನ ಏರಿಕೆ ಮತ್ತು ಭೀಕರ ಬರಗಾಲ: “ಭೂಮಿಯು ಇನ್ನಷ್ಟು ಒಣಗಲಿದೆ ಮತ್ತು ನಂತರ ದೊಡ್ಡ ಮಟ್ಟದ ಪ್ರವಾಹಗಳು ಬರಲಿವೆ” ಎಂದು ನಾಸ್ಟ್ರಡಾಮಸ್ ಬರೆದಿದ್ದಾರೆ. ಇದು ಪ್ರಸ್ತುತ ಜಗತ್ತು ಎದುರಿಸುತ್ತಿರುವ ಹವಾಮಾನ ವೈಪರೀತ್ಯಕ್ಕೆ ಕನ್ನಡಿ ಹಿಡಿದಂತಿದೆ. ಅತಿವೃಷ್ಟಿ ಮತ್ತು ಅನಾವೃಷ್ಟಿಯಿಂದಾಗಿ ಆಹಾರದ ಅಭಾವ ಸೃಷ್ಟಿಯಾಗಬಹುದು ಎಂಬ ಮುನ್ಸೂಚನೆ ಇದರಲ್ಲಿ ಅಡಗಿದೆ.
ಬಾಹ್ಯಾಕಾಶದಲ್ಲಿ ಹೊಸ ಶೋಧ: ಮಾನವನ ಆಸಕ್ತಿಯು ಭೂಮಿಯನ್ನು ಮೀರಿ ಬೆಳೆಯಲಿದ್ದು, ಬಾಹ್ಯಾಕಾಶದಲ್ಲಿ ಅನಿರೀಕ್ಷಿತ ಬೆಳವಣಿಗೆಯೊಂದು ನಡೆಯಲಿದೆ. ಇದು ಅನ್ಯಗ್ರಹ ಜೀವಿಗಳ ಕುರಿತಾದ ಸಂಶೋಧನೆ ಅಥವಾ ಹೊಸ ಗ್ರಹದ ಪತ್ತೆಯಾಗಿರಬಹುದು ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
IPL 2026: RCB ಜೆರ್ಸಿಯಲ್ಲಿ ಮಿಂಚಲಿದೆಯೇ ‘ನಂದಿನಿ’? ಅಮೂಲ್ vs ಕೆಎಂಎಫ್ ಬಿಗ್ ಫೈಟ್!
ಎಷ್ಟು ನಿಜ? ಎಷ್ಟು ನಂಬಿಕೆ?
ನಾಸ್ಟ್ರಡಾಮಸ್ ಅವರು 1555ರಲ್ಲಿ ಬರೆದ ‘ಲೆಸ್ ಪ್ರೊಫೆಟೀಸ್’ (Les Propheties) ಎಂಬ ಪುಸ್ತಕದಲ್ಲಿ ಒಟ್ಟು 942 ಕವಿತೆಗಳ ರೂಪದಲ್ಲಿ ಭವಿಷ್ಯ ನುಡಿದಿದ್ದಾರೆ. ಈ ಹಿಂದೆ ಹಿಟ್ಲರ್ನ ಉದಯ, ಕೆನಡಿ ಹತ್ಯೆ ಮತ್ತು 9/11 ದಾಳಿಯಂತಹ ಘಟನೆಗಳನ್ನು ಇವರು ಮೊದಲೇ ನುಡಿದಿದ್ದರು ಎಂಬ ನಂಬಿಕೆಯಿದೆ.
ಆದರೆ, ವಿಜ್ಞಾನಿಗಳು ಮತ್ತು ವಿಮರ್ಶಕರ ಪ್ರಕಾರ ಇವರ ಬರಹಗಳು ಅಸ್ಪಷ್ಟವಾಗಿದ್ದು, ಘಟನೆಗಳು ನಡೆದ ನಂತರ ಅವುಗಳನ್ನು ಅನ್ವಯಿಸಿ ವಿಶ್ಲೇಷಿಸಲಾಗುತ್ತದೆ. ಹೀಗಾಗಿ, ಈ ಭವಿಷ್ಯವಾಣಿಗಳನ್ನು ಕೇವಲ ಸಾಧ್ಯತೆಗಳೆಂದು ನೋಡಬೇಕೇ ಹೊರತು ಸಂಪೂರ್ಣ ಸತ್ಯವೆಂದು ಪರಿಗಣಿಸಲು ಬರುವುದಿಲ್ಲ.
