ಉಡುಪಿ ಜಿಲ್ಲೆಯ ಹಲವು ಭಾಗಗಳಲ್ಲಿ ಸಾಧಾರಣ ಮಳೆ! ಮಧ್ಯಾಹ್ನ ಮತ್ತೆ ತಾಪ ಹೆಚ್ಚಳ

ಉಡುಪಿ: ಮುಂಗಾರು ಪೂರ್ವ ಮಳೆಯ ಚಟುವಟಿಕೆ ಜಿಲ್ಲೆಯ ಕೆಲ ಭಾಗಗಳಲ್ಲಿ ಮುಂದುವರಿದಿದ್ದು, ಶನಿವಾರ ರಾತ್ರಿ ಮಣಿಪಾಲ, ಪರ್ಕಳ ಸೇರಿದಂತೆ ಹಲವು ಪ್ರದೇಶಗಳಲ್ಲಿ ಸಾಧಾರಣ ಮಳೆಯಾಗಿದೆ. ಕೆಲವೆಡೆ ಗುಡುಗು ಮತ್ತು ಮಿಂಚಿನೊಂದಿಗೆ ಮಳೆ ಸುರಿದಿರುವ ಮಾಹಿತಿ ಲಭ್ಯವಾಗಿದೆ.

ಮುಂಜಾನೆ ವೇಳೆಯಲ್ಲೂ ಮಣಿಪಾಲ, ಹಿರಿಯಡಕ ಹಾಗೂ ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ತುಂತುರು ಮಳೆ ಜನರನ್ನು ಸ್ವಾಗತಿಸಿತು. ಬೆಳಗಿನ ವೇಳೆಗೆ ಮೋಡ ಕವಿದ ವಾತಾವರಣ ಕಂಡುಬಂದರೂ, ಮಳೆಯ ತೀವ್ರತೆ ಹೆಚ್ಚಾಗಲಿಲ್ಲ.

ಮಧ್ಯಾಹ್ನ ಸೆಖೆಯಿಂದ ಕಂಗಾಲಾದ ಜನ

ಬೆಳಗ್ಗೆ ಮೋಡಗಳು ಆವರಿಸಿದ್ದರಿಂದ ತಂಪಾದ ವಾತಾವರಣ ನಿರ್ಮಾಣವಾಗಿತ್ತು. ಆದರೆ ಮಧ್ಯಾಹ್ನದ ವೇಳೆಗೆ ಮೋಡಗಳು ಕರಗಿ ಬಿಸಿಲಿನ ತಾಪ ಹೆಚ್ಚಾಯಿತು. ಪರಿಣಾಮ ಜನರು ಉರಿ ಬಿಸಿಲಿನಿಂದ ಬಸವಳಿದ ದೃಶ್ಯಗಳು ಕಂಡುಬಂದವು.

ಉಡುಪಿ ನಗರ ಭಾಗದಲ್ಲಿ ಹೆಚ್ಚಿನ ಮಳೆಯಾಗದಿದ್ದರೂ, ಹನಿ ಹನಿ ಮಳೆಯ ಅನುಭವ ಜನರಿಗೆ ದೊರೆಯಿತು. ಕೆಲವು ಗ್ರಾಮೀಣ ಪ್ರದೇಶಗಳಲ್ಲಿ ಮಾತ್ರ ಸಾಧಾರಣ ಪ್ರಮಾಣದ ಮಳೆ ದಾಖಲಾಗಿದೆ.

ಮಳೆ ಪ್ರಮಾಣದ ವಿವರ

ಕಳೆದ 24 ಗಂಟೆಗಳಲ್ಲಿ ಜಿಲ್ಲೆಯಲ್ಲಿ ಅತಿ ಹೆಚ್ಚು ಮಳೆ ಕಾಪು ತಾಲೂಕಿನಲ್ಲಿ ದಾಖಲಾಗಿದ್ದು, 15.6 ಮಿ.ಮೀ ಮಳೆಯಾಗಿದೆ. ಉಡುಪಿಯಲ್ಲಿ 9.8 ಮಿ.ಮೀ, ಕಾರ್ಕಳದಲ್ಲಿ 5.8 ಮಿ.ಮೀ ಹಾಗೂ ಬ್ರಹ್ಮಾವರದಲ್ಲಿ 5.5 ಮಿ.ಮೀ ಮಳೆಯಾಗಿದೆ.

ಇದಲ್ಲದೆ ಬೈಂದೂರಿನಲ್ಲಿ 1 ಮಿ.ಮೀ, ಕುಂದಾಪುರದಲ್ಲಿ 0.9 ಮಿ.ಮೀ ಹಾಗೂ ಹೆಬ್ರಿಯಲ್ಲಿ 0.5 ಮಿ.ಮೀ ಮಳೆಯಾಗಿದೆ ಎಂದು ಹವಾಮಾನ ಇಲಾಖೆ ಮಾಹಿತಿ ನೀಡಿದೆ.

ಮುಂದಿನ ದಿನಗಳಲ್ಲೂ ಜಿಲ್ಲೆಯಲ್ಲಿ ಮೋಡ ಕವಿದ ವಾತಾವರಣದೊಂದಿಗೆ ಅಲ್ಲಲ್ಲಿ ಮಳೆಯಾಗುವ ಸಾಧ್ಯತೆ ಇದೆ ಎಂದು ಸ್ಥಳೀಯ ಹವಾಮಾನ ಮೂಲಗಳು ತಿಳಿಸಿವೆ.