ಗ್ಯಾಸ್ ಸಂಪರ್ಕ ಹೊಂದಿರುವ ಗ್ರಾಹಕರಿಗೆ ಎಚ್ಚರಿಕೆ! 30 ದಿನಗಳಲ್ಲಿ ಈ ಕೆಲಸ ಮಾಡದಿದ್ದರೆ ಕನೆಕ್ಷನ್ ರದ್ದು

ದೇಶದ ಗ್ಯಾಸ್ ಬಳಕೆದಾರರಿಗೆ ಜೂನ್ ತಿಂಗಳ ಆರಂಭದಲ್ಲೇ ಮಹತ್ವದ ಬದಲಾವಣೆಗಳು ಜಾರಿಯಾಗಿವೆ. ವಾಣಿಜ್ಯ ಬಳಕೆಯ ಎಲ್‌ಪಿಜಿ ಸಿಲಿಂಡರ್ ದರ ಏರಿಕೆಯ ಜೊತೆಗೆ, ಗ್ಯಾಸ್ ಸಂಪರ್ಕ ಹೊಂದಿರುವ ಗ್ರಾಹಕರಿಗೆ ಸರ್ಕಾರ ಹೊಸ ನಿಯಮವನ್ನೂ ಕಟ್ಟುನಿಟ್ಟಾಗಿ ಜಾರಿಗೆ ತಂದಿದೆ.

ಪೈಪ್‌ಲೈನ್ ಮೂಲಕ ನೈಸರ್ಗಿಕ ಅನಿಲ (PNG) ಸೌಲಭ್ಯ ಪಡೆದಿರುವ ಮನೆಗಳಲ್ಲಿ ಇನ್ನೂ ಹಳೆಯ LPG ಸಂಪರ್ಕಗಳನ್ನು ಸಕ್ರಿಯವಾಗಿಯೇ ಉಳಿಸಿಕೊಳ್ಳುತ್ತಿರುವ ಪ್ರಕರಣಗಳು ಹೆಚ್ಚಾಗಿವೆ. ಇದನ್ನು ತಡೆಯುವ ಉದ್ದೇಶದಿಂದ ‘ಒಂದು ಮನೆ – ಒಂದು ಗ್ಯಾಸ್ ಸಂಪರ್ಕ’ ನೀತಿಯನ್ನು ಸರ್ಕಾರ ಮುಂದಿಟ್ಟಿದೆ.

ಹೊಸ ಆದೇಶದ ಪ್ರಕಾರ, ಯಾರ ಮನೆಗಳಲ್ಲಿ PNG ಮತ್ತು LPG ಎರಡೂ ಸಂಪರ್ಕಗಳು ಸಕ್ರಿಯವಾಗಿವೆಯೋ ಅವರು 30 ದಿನಗಳೊಳಗೆ ತಮ್ಮ LPG ಸಿಲಿಂಡರ್ ಮತ್ತು ಸಂಪರ್ಕವನ್ನು ಸಂಬಂಧಿತ ಗ್ಯಾಸ್ ಏಜೆನ್ಸಿಗೆ ಅಧಿಕೃತವಾಗಿ ಹಿಂತಿರುಗಿಸಬೇಕು. ನಿಗದಿತ ಅವಧಿಯಲ್ಲಿ ಈ ಪ್ರಕ್ರಿಯೆ ಪೂರ್ಣಗೊಳಿಸದಿದ್ದರೆ, ಕಂಪನಿಗಳು ಆನ್‌ಲೈನ್ ವ್ಯವಸ್ಥೆಯ ಮೂಲಕ LPG ಸಂಪರ್ಕವನ್ನು ಸ್ಥಗಿತಗೊಳಿಸುವ ಅಥವಾ ರದ್ದುಪಡಿಸುವ ಕ್ರಮ ಕೈಗೊಳ್ಳಬಹುದು.

ಅಧಿಕೃತ ಅಂಕಿಅಂಶಗಳ ಪ್ರಕಾರ, ದೇಶಾದ್ಯಂತ ಲಕ್ಷಾಂತರ ಹೊಸ PNG ಸಂಪರ್ಕಗಳು ನೀಡಲಾಗಿದ್ದರೂ ಅನೇಕ ಗ್ರಾಹಕರು ಹಳೆಯ LPG ಸಂಪರ್ಕಗಳನ್ನು ಹಿಂದಿರುಗಿಸಿಲ್ಲ. ಇದರಿಂದ ಅನಿಲ ವಿತರಣಾ ವ್ಯವಸ್ಥೆಯಲ್ಲಿ ಅಸಮತೋಲನ ಉಂಟಾಗುವ ಸಾಧ್ಯತೆ ಇದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ಜಾಗತಿಕ ಮಟ್ಟದಲ್ಲಿ ಇಂಧನ ಸರಬರಾಜು ಸವಾಲುಗಳು ಮುಂದುವರಿದಿರುವ ಹಿನ್ನೆಲೆ, ಲಭ್ಯವಿರುವ ಗ್ಯಾಸ್ ಸಂಪನ್ಮೂಲಗಳನ್ನು ಸಮರ್ಪಕವಾಗಿ ನಿರ್ವಹಿಸುವುದು ಸರ್ಕಾರದ ಪ್ರಮುಖ ಗುರಿಯಾಗಿದೆ. ಇದೇ ಕಾರಣಕ್ಕೆ ಪೆಟ್ರೋಲಿಯಂ ಇಲಾಖೆ ಈ ಕ್ರಮಕ್ಕೆ ಹೆಚ್ಚಿನ ಆದ್ಯತೆ ನೀಡಿದೆ.

ಈ ನಿಯಮವನ್ನು 2026ರ ಜೂನ್ 1ರಿಂದ ಕಡ್ಡಾಯವಾಗಿ ಜಾರಿಗೆ ತರಲಾಗಿದೆ. PNG ಸೌಲಭ್ಯ ಆರಂಭವಾದ ದಿನದಿಂದ 30 ದಿನಗಳೊಳಗೆ ಹಳೆಯ LPG ಸಂಪರ್ಕವನ್ನು ವಾಪಸ್ ನೀಡಬೇಕಾಗಿದೆ. ಗಡುವು ಮುಗಿದ ಬಳಿಕ ಯಾವುದೇ ವಿಶೇಷ ವಿನಾಯಿತಿ ದೊರೆಯದ ಸಾಧ್ಯತೆ ಇರುವುದರಿಂದ ಗ್ರಾಹಕರು ಎಚ್ಚರಿಕೆಯಿಂದ ಕ್ರಮ ಕೈಗೊಳ್ಳುವುದು ಸೂಕ್ತ.

ಇನ್ನೊಂದೆಡೆ, ಗ್ರಾಹಕರ ಅನುಕೂಲಕ್ಕಾಗಿ ಇಂಡೇನ್, ಭಾರತ್ ಗ್ಯಾಸ್ ಮತ್ತು ಹೆಚ್‌ಪಿ ಗ್ಯಾಸ್ ಕಂಪನಿಗಳು ‘ಕನೆಕ್ಷನ್ ಟ್ರಾನ್ಸ್‌ಫರ್ ವೋಚರ್’ ವ್ಯವಸ್ಥೆಯನ್ನು ಆರಂಭಿಸಿವೆ. LPG ಸಂಪರ್ಕವನ್ನು ಹಿಂತಿರುಗಿಸಿದಾಗ ಗ್ರಾಹಕರಿಗೆ ಅಧಿಕೃತ ವೋಚರ್ ನೀಡಲಾಗುತ್ತದೆ.

ಭವಿಷ್ಯದಲ್ಲಿ PNG ಸೌಲಭ್ಯವಿಲ್ಲದ ಹೊಸ ನಗರ ಅಥವಾ ಪ್ರದೇಶಕ್ಕೆ ಸ್ಥಳಾಂತರವಾದರೆ, ಇದೇ ವೋಚರ್ ತೋರಿಸಿ ಹೆಚ್ಚುವರಿ ಠೇವಣಿ ಪಾವತಿಸದೆ ಮತ್ತೆ LPG ಸಂಪರ್ಕ ಪಡೆಯಲು ಅವಕಾಶ ಸಿಗಲಿದೆ. ಇದರಿಂದ ಗ್ರಾಹಕರಿಗೆ ಆರ್ಥಿಕ ಭಾರವೂ ಕಡಿಮೆಯಾಗಲಿದೆ.

ಇದರ ನಡುವೆ ಗ್ಯಾಸ್ ದರಗಳಲ್ಲಿಯೂ ಬದಲಾವಣೆ ಕಂಡುಬಂದಿದೆ. ವಾಣಿಜ್ಯ ಬಳಕೆಯ 19 ಕೆಜಿ ಸಿಲಿಂಡರ್ ಬೆಲೆ ಹೆಚ್ಚಳಗೊಂಡಿದ್ದು, ಕೆಲವು ನಗರಗಳಲ್ಲಿ ಗೃಹ ಬಳಕೆಯ ಸಿಲಿಂಡರ್ ದರದಲ್ಲಿಯೂ ಏರಿಕೆ ದಾಖಲಾಗಿದೆ. ಇತ್ತೀಚಿನ ಪರಿಷ್ಕರಣೆಯ ಪ್ರಕಾರ ಗೃಹ ಬಳಕೆಯ LPG ಸಿಲಿಂಡರ್ ದರವು ಸುಮಾರು ₹29ರವರೆಗೆ ಹೆಚ್ಚಾಗಿದೆ.