ಅತ್ಯಂತ ಕಡಿಮೆ ದರದಲ್ಲಿ ವಿಮಾನ ಟಿಕೆಟ್: ಏರ್ ಇಂಡಿಯಾದ ಹೊಸ ಬೇಸಿಕ್ ಫೇರ್
ಸಾಮಾನ್ಯ ಹಾಗೂ ಮಧ್ಯಮ ವರ್ಗದ ಪ್ರಯಾಣಿಕರಿಗೆ ಅನುಕೂಲವಾಗುವಂತೆ ಏರ್ ಇಂಡಿಯಾ ಹೊಸ ಬೇಸಿಕ್ ಫೇರ್ ಪರಿಚಯಿಸಿದೆ. ಕಡಿಮೆ ದರದ ಟಿಕೆಟ್ಗಳೊಂದಿಗೆ ಪ್ರಯಾಣ ಅವಕಾಶ ದೊರೆಯಲಿದ್ದು, ಆಹಾರ ಸೇವೆ ಮಾತ್ರ ಪ್ರತ್ಯೇಕವಾಗಿ ಲಭ್ಯ.
ಏರ್ ಇಂಡಿಯಾ ದೇಶೀಯ ವಿಮಾನ ಪ್ರಯಾಣಿಕರಿಗೆ ಮತ್ತೊಂದು ಹೊಸ ಆಯ್ಕೆಯನ್ನು ಪರಿಚಯಿಸಿದೆ. ಕಡಿಮೆ ವೆಚ್ಚದಲ್ಲಿ ವಿಮಾನಯಾನ ಮಾಡಲು ಬಯಸುವವರಿಗೆ ಅನುಕೂಲವಾಗುವಂತೆ ‘ಬೇಸಿಕ್ ಫೇರ್’ ಯೋಜನೆಯನ್ನು ಆರಂಭಿಸಿದೆ. ಈ ಯೋಜನೆ ಮುಖ್ಯವಾಗಿ ಎಕಾನಮಿ ಕ್ಲಾಸ್ ಪ್ರಯಾಣಿಕರನ್ನು ಗಮನದಲ್ಲಿಟ್ಟುಕೊಂಡು ರೂಪಿಸಲಾಗಿದೆ.
ಹೊಸ ಬೇಸಿಕ್ ಫೇರ್ ಅಡಿಯಲ್ಲಿ ಪ್ರಯಾಣಿಸುವವರಿಗೆ ಟಿಕೆಟ್ ದರವು ಇತರ ಆಯ್ಕೆಗಳಿಗಿಂತ ಕಡಿಮೆ ಇರಲಿದೆ. ಆದರೆ ಈ ಯೋಜನೆಯಲ್ಲಿ ಉಚಿತ ಊಟದ ಸೌಲಭ್ಯ ಇರುವುದಿಲ್ಲ. ಪ್ರಯಾಣದ ವೇಳೆ ಕಾಫಿ, ಟೀ ಸೇರಿದಂತೆ ಕೆಲವು ಪಾನೀಯಗಳನ್ನು ಮಾತ್ರ ಒದಗಿಸಲಾಗುತ್ತದೆ. ಊಟ ಬೇಕಿದ್ದರೆ ಪ್ರಯಾಣಿಕರು ಪ್ರತ್ಯೇಕವಾಗಿ ಮುಂಗಡ ಬುಕ್ಕಿಂಗ್ ಮಾಡಿಕೊಳ್ಳಬಹುದು.
ಪ್ರಯಾಣಿಕರಿಗೆ ಆಯ್ಕೆ ಸ್ವಾತಂತ್ರ್ಯ ನೀಡುವ ಉದ್ದೇಶದಿಂದ ಈ ಯೋಜನೆ ಜಾರಿಗೆ ತರಲಾಗಿದೆ ಎಂದು ಸಂಸ್ಥೆ ತಿಳಿಸಿದೆ. ಕಡಿಮೆ ವೆಚ್ಚದಲ್ಲಿ ಪ್ರಯಾಣಿಸಲು ಬಯಸುವವರು ಬೇಸಿಕ್ ಫೇರ್ ಆಯ್ಕೆ ಮಾಡಬಹುದು. ಅದೇ ವೇಳೆ ಹೆಚ್ಚುವರಿ ಸೌಲಭ್ಯಗಳನ್ನು ಬಯಸುವವರು ವಾಲ್ಯು, ಕ್ಲಾಸಿಕ್ ಹಾಗೂ ಫ್ಲೆಕ್ಸ್ ಪ್ಲಾನ್ಗಳನ್ನು ಮುಂದುವರಿಸಿ ಆಯ್ಕೆ ಮಾಡಬಹುದಾಗಿದೆ.
ಬೇಸಿಕ್ ಫೇರ್ನಲ್ಲಿ 15 ಕಿಲೋ ಚೆಕ್-ಇನ್ ಬ್ಯಾಗೇಜ್ ಹಾಗೂ 7 ಕಿಲೋ ಕ್ಯಾಬಿನ್ ಬ್ಯಾಗೇಜ್ ಅವಕಾಶ ದೊರೆಯಲಿದೆ. ಜೊತೆಗೆ ವೆಜ್, ನಾನ್ವೆಜ್, ಜೈನ್ ಹಾಗೂ ಡಯಾಬಿಟಿಕ್ ಊಟಗಳನ್ನು ಹೆಚ್ಚುವರಿ ಶುಲ್ಕ ಪಾವತಿಸಿ ಬುಕ್ ಮಾಡಿಕೊಳ್ಳುವ ವ್ಯವಸ್ಥೆಯೂ ಇರುತ್ತದೆ. ಪ್ರಯಾಣದ 24 ಗಂಟೆಗಳೊಳಗೆ ಆಹಾರ ಬುಕ್ಕಿಂಗ್ ಮಾಡಲು ಅವಕಾಶ ನೀಡಲಾಗಿದೆ.
ಪ್ರಸ್ತುತ ಈ ಯೋಜನೆಯನ್ನು ಆಯ್ದ ಕೆಲವು ದೇಶೀಯ ಮಾರ್ಗಗಳಲ್ಲಿ ಮಾತ್ರ ಜಾರಿಗೆ ತರಲಾಗಿದೆ. ಪ್ರಯಾಣಿಕರಿಂದ ದೊರೆಯುವ ಪ್ರತಿಕ್ರಿಯೆಯ ಆಧಾರದ ಮೇಲೆ ಮುಂದಿನ ದಿನಗಳಲ್ಲಿ ಇದರ ವ್ಯಾಪ್ತಿಯನ್ನು ವಿಸ್ತರಿಸುವ ಸಾಧ್ಯತೆ ಇದೆ. ಕಡಿಮೆ ದರದಲ್ಲಿ ವಿಮಾನ ಪ್ರಯಾಣವನ್ನು ಇನ್ನಷ್ಟು ಜನರಿಗೆ ತಲುಪಿಸುವ ಪ್ರಯತ್ನವಾಗಿ ಈ ಹೊಸ ಯೋಜನೆಯನ್ನು ಏರ್ ಇಂಡಿಯಾ ಪರಿಚಯಿಸಿದೆ.
