ಗೋಲ್ಡ್ ಲೋನ್ ಪಡೆಯುವಾಗ ಯಾವುದೇ ಕಾರಣಕ್ಕೂ ಈ ತಪ್ಪುಗಳನ್ನು ಮಾಡಬೇಡಿ
ಚಿನ್ನದ ಮೇಲಿನ ಸಾಲ ಪಡೆಯುವ ಮೊದಲು ಬಡ್ಡಿದರ ಮಾತ್ರವಲ್ಲ, ಒಟ್ಟು ಸಾಲದ ವೆಚ್ಚ, ಮರುಪಾವತಿ ವಿಧಾನ ಹಾಗೂ ಬ್ಯಾಂಕ್ ನಿಯಮಗಳನ್ನು ತಿಳಿದುಕೊಳ್ಳುವುದು ಭವಿಷ್ಯದ ಆರ್ಥಿಕ ಸಮಸ್ಯೆಗಳನ್ನು ತಪ್ಪಿಸಲು ಸಹಾಯಕವಾಗುತ್ತದೆ.
ತುರ್ತು ಹಣದ ಅಗತ್ಯ ಬಂದಾಗ ಚಿನ್ನಾಭರಣಗಳನ್ನು ಮಾರಾಟ ಮಾಡುವ ಬದಲು ಅವುಗಳನ್ನು ಅಡಮಾನ ಇಟ್ಟು ಗೋಲ್ಡ್ ಲೋನ್ (Gold Loan) ಪಡೆಯುವವರ ಸಂಖ್ಯೆ ಹೆಚ್ಚುತ್ತಿದೆ. ಶಿಕ್ಷಣ, ವೈದ್ಯಕೀಯ, ವ್ಯವಹಾರ, ಕೃಷಿ ಹಾಗೂ ಇತರ ತುರ್ತು ವೆಚ್ಚಗಳಿಗೆ ಬ್ಯಾಂಕ್ಗಳು ಮತ್ತು ಹಣಕಾಸು ಸಂಸ್ಥೆಗಳು ಕಡಿಮೆ ಸಮಯದಲ್ಲಿ ಸಾಲ ಮಂಜೂರು ಮಾಡುತ್ತಿರುವುದರಿಂದ ಈ ಸಾಲಗಳಿಗೆ ಬೇಡಿಕೆಯೂ ಏರಿಕೆಯಾಗಿದೆ.
ಹಣಕಾಸು ತಜ್ಞರ ಪ್ರಕಾರ, ಮೊದಲ ಬಾರಿಗೆ ಗೋಲ್ಡ್ ಲೋನ್ ಪಡೆಯುವವರು ಸಾಮಾನ್ಯವಾಗಿ ಹೆಚ್ಚು ಸಾಲ ಸಿಗುವುದರತ್ತ ಮಾತ್ರ ಗಮನ ಹರಿಸುತ್ತಾರೆ. ಆದರೆ ಇದು ದೊಡ್ಡ ತಪ್ಪಾಗಬಹುದು. ಸಾಲದ ಮೊತ್ತದ ಜೊತೆಗೆ ಅದರ ಸಂಪೂರ್ಣ ವೆಚ್ಚವನ್ನೂ ಪರಿಶೀಲಿಸುವುದು ಅತ್ಯಂತ ಮುಖ್ಯ.
ಬಡ್ಡಿದರ ಮಾತ್ರ ನೋಡಿದರೆ ಸಾಲದು
ಬ್ಯಾಂಕ್ಗಳು ಸಾಮಾನ್ಯವಾಗಿ ಗೋಲ್ಡ್ ಲೋನ್ಗೆ ವಾರ್ಷಿಕ 8ರಿಂದ 11 ಶೇಕಡಾ ಬಡ್ಡಿದರ ವಿಧಿಸುತ್ತವೆ. ಅದೇ ವೇಳೆ ಕೆಲವು NBFC ಸಂಸ್ಥೆಗಳು 9ರಿಂದ 18 ಶೇಕಡಾವರೆಗೆ ಬಡ್ಡಿ ವಿಧಿಸುವ ಸಾಧ್ಯತೆ ಇದೆ.
ಬಡ್ಡಿದರದ ಜೊತೆಗೆ ಪ್ರೊಸೆಸಿಂಗ್ ಶುಲ್ಕ, ಚಿನ್ನ ಮೌಲ್ಯಮಾಪನ ಶುಲ್ಕ, ಸಾಲ ನವೀಕರಣ ಶುಲ್ಕ ಹಾಗೂ ತಡ ಪಾವತಿ ದಂಡ ಸೇರಿದಂತೆ ಹೆಚ್ಚುವರಿ ವೆಚ್ಚಗಳೂ ಇರಬಹುದು. ಆದ್ದರಿಂದ ಕೇವಲ ಬಡ್ಡಿದರ ನೋಡದೆ, ಸಾಲದ ಒಟ್ಟು ವೆಚ್ಚವನ್ನು ಸೂಚಿಸುವ Annual Percentage Rate (APR) ಪರಿಶೀಲಿಸುವುದು ಉತ್ತಮ.
ಮರುಪಾವತಿ ವಿಧಾನ ತಿಳಿದುಕೊಳ್ಳಿ
ಗೋಲ್ಡ್ ಲೋನ್ ಪಡೆಯುವ ಮೊದಲು ಮರುಪಾವತಿ ವಿಧಾನವನ್ನು ಅರ್ಥಮಾಡಿಕೊಳ್ಳುವುದು ಅಗತ್ಯ. ಕೆಲವು ಬ್ಯಾಂಕ್ಗಳು EMI ಮೂಲಕ ಮಾಸಿಕ ಪಾವತಿ ಸೌಲಭ್ಯ ನೀಡಿದರೆ, ಇನ್ನೂ ಕೆಲವು ಸಂಸ್ಥೆಗಳು Bullet Repayment ವಿಧಾನ ಅನುಸರಿಸುತ್ತವೆ. ಈ ವಿಧಾನದಲ್ಲಿ ಸಾಲದ ಅವಧಿ ಮುಗಿದಾಗ ಒಮ್ಮೆಯೇ ಸಂಪೂರ್ಣ ಮೂಲಧನ ಪಾವತಿಸಬೇಕಾಗುತ್ತದೆ.
ನಿಮ್ಮ ಮಾಸಿಕ ಆದಾಯ, ಖರ್ಚು ಮತ್ತು ಹಣಕಾಸಿನ ಸ್ಥಿತಿಗೆ ಅನುಗುಣವಾಗಿ ಸೂಕ್ತ ಮರುಪಾವತಿ ಆಯ್ಕೆ ಮಾಡುವುದು ಉತ್ತಮ. ಬಡ್ಡಿಯನ್ನು ಸಮಯಕ್ಕೆ ಸರಿಯಾಗಿ ಪಾವತಿಸದಿದ್ದರೆ ಹೆಚ್ಚುವರಿ ದಂಡ ಹಾಗೂ ಬಡ್ಡಿ ಭಾರ ಹೆಚ್ಚಾಗುವ ಸಾಧ್ಯತೆಯಿದೆ.
ಚಿನ್ನ ಅಡಮಾನ ಇಡುವ ಮೊದಲು ಗಮನಿಸಿ
ಸಾಲ ಪಡೆಯುವ ಮುನ್ನ ಬ್ಯಾಂಕ್ ಅಥವಾ ಹಣಕಾಸು ಸಂಸ್ಥೆಯ ಎಲ್ಲಾ ಷರತ್ತುಗಳನ್ನು ಓದಿ ತಿಳಿದುಕೊಳ್ಳಿ. ಸಾಲ ಮರುಪಾವತಿಯಲ್ಲಿ ವಿಳಂಬವಾದರೆ ಅಡಮಾನ ಇಟ್ಟಿರುವ ಚಿನ್ನದ ಮೇಲೆ ಯಾವ ಕ್ರಮ ಕೈಗೊಳ್ಳಲಾಗುತ್ತದೆ ಎಂಬುದನ್ನೂ ಸ್ಪಷ್ಟವಾಗಿ ತಿಳಿದುಕೊಳ್ಳುವುದು ಅಗತ್ಯ.
RBI ನಿಯಮಗಳ ಪ್ರಕಾರ, ಚಿನ್ನವನ್ನು ಹರಾಜು ಮಾಡುವ ಪರಿಸ್ಥಿತಿ ಬಂದರೆ ಸಾಲದಾತರು ಮುಂಚಿತವಾಗಿ ಮಾಹಿತಿ ನೀಡಬೇಕು. ಅಲ್ಲದೆ ಹರಾಜಿನ ಕನಿಷ್ಠ ಮೀಸಲು ಬೆಲೆಯನ್ನು ನಿಗದಿಪಡಿಸಬೇಕು. ಹರಾಜಿನ ನಂತರ ಸಾಲದ ಮೊತ್ತಕ್ಕಿಂತ ಹೆಚ್ಚುವರಿ ಹಣ ಉಳಿದರೆ, ಅದನ್ನು ಸಾಲಗಾರನಿಗೆ ಹಿಂದಿರುಗಿಸುವುದು ಕಡ್ಡಾಯ.
ಸಾಲವನ್ನು ಮುಂಚಿತವಾಗಿ ತೀರಿಸಿದರೆ ಹೆಚ್ಚುವರಿ ಶುಲ್ಕ ಇದೆಯೇ, ಜಪ್ತಿ ನಿಯಮಗಳು ಯಾವುವು ಎಂಬಂತಹ ಪ್ರಶ್ನೆಗಳನ್ನು ಕೇಳಿ ಸ್ಪಷ್ಟನೆ ಪಡೆದ ಬಳಿಕವೇ ಗೋಲ್ಡ್ ಲೋನ್ ಪಡೆಯುವುದು ಸುರಕ್ಷಿತ.
