ಮೆಟಲ್ ಬಾಡಿ ಎಲೆಕ್ಟ್ರಿಕ್ ಸ್ಕೂಟರ್‌ಗಳ ಬಿಡುಗಡೆ.. 150 ಕಿ.ಮೀ ರೇಂಜ್‌, ಕೈಗೆಟುಕುವ ಬೆಲೆ

ಭಾರತದಲ್ಲಿ ಎಲೆಕ್ಟ್ರಿಕ್ ದ್ವಿಚಕ್ರ ವಾಹನಗಳ ಬೇಡಿಕೆ ದಿನದಿಂದ ದಿನಕ್ಕೆ ಏರುತ್ತಿದೆ. ಇದೇ ವೇಳೆ ಗ್ರಾಹಕರಿಗೆ ಕಡಿಮೆ ಬೆಲೆಯಲ್ಲೂ ಗುಣಮಟ್ಟದ ವಾಹನಗಳನ್ನು ನೀಡುವ ಉದ್ದೇಶದಿಂದ ಕೊಮಾಕಿ ಎರಡು ಹೊಸ ಎಲೆಕ್ಟ್ರಿಕ್ ಸ್ಕೂಟರ್‌ಗಳನ್ನು ಪರಿಚಯಿಸಿದೆ. MG Pro V ಮತ್ತು MG Pro+ ಎಂಬ ಹೆಸರಿನ ಈ ಮಾದರಿಗಳು ಬಲಿಷ್ಠ ನಿರ್ಮಾಣ ಹಾಗೂ ಆಧುನಿಕ ತಂತ್ರಜ್ಞಾನದಿಂದ ಗಮನ ಸೆಳೆಯುತ್ತಿವೆ.

ಈ ಎರಡು ಸ್ಕೂಟರ್‌ಗಳ ಪ್ರಮುಖ ವಿಶೇಷತೆ ಎಂದರೆ ಆಲ್-ಮೆಟಲ್ ಬಾಡಿ. ಸಾಮಾನ್ಯವಾಗಿ ಈ ಬೆಲೆ ವಿಭಾಗದ ಹಲವು ಎಲೆಕ್ಟ್ರಿಕ್ ಸ್ಕೂಟರ್‌ಗಳು ಫೈಬರ್ ಬಾಡಿಯೊಂದಿಗೆ ಬರುತ್ತವೆ. ಆದರೆ ದೀರ್ಘಕಾಲ ಬಾಳಿಕೆ ಮತ್ತು ಉತ್ತಮ ಸುರಕ್ಷತೆಯನ್ನು ಗಮನದಲ್ಲಿಟ್ಟುಕೊಂಡು ಕಂಪನಿ ಮೆಟಲ್ ಬಾಡಿ ವಿನ್ಯಾಸವನ್ನು ಬಳಸಿದೆ.

ಬೆಲೆಯ ವಿಚಾರಕ್ಕೆ ಬಂದರೆ, MG Pro V ಆರಂಭಿಕ ಬೆಲೆ ₹73,999 ಇದ್ದು, MG Pro+ ಬೆಲೆ ₹79,999 ನಿಗದಿಯಾಗಿದೆ. ಕಡಿಮೆ ವೆಚ್ಚದಲ್ಲಿ ಉತ್ತಮ ಗುಣಮಟ್ಟದ ಎಲೆಕ್ಟ್ರಿಕ್ ವಾಹನ ಹುಡುಕುತ್ತಿರುವವರಿಗೆ ಇದು ಗಮನಾರ್ಹ ಆಯ್ಕೆಯಾಗಬಹುದು.

ರೇಂಜ್ ಕೂಡ ಈ ಸ್ಕೂಟರ್‌ಗಳ ಮತ್ತೊಂದು ಬಲವಾಗಿದೆ. ಕಂಪನಿಯ ಮಾಹಿತಿಯ ಪ್ರಕಾರ MG Pro V ಒಂದು ಬಾರಿ ಪೂರ್ಣ ಚಾರ್ಜ್ ಮಾಡಿದರೆ ಸುಮಾರು 90 ರಿಂದ 100 ಕಿಲೋಮೀಟರ್ ಸಂಚರಿಸಬಹುದು. MG Pro+ ಮಾದರಿ ಒಂದೇ ಚಾರ್ಜ್‌ನಲ್ಲಿ 150 ಕಿಲೋಮೀಟರ್‌ವರೆಗೆ ಓಡಬಲ್ಲ ಸಾಮರ್ಥ್ಯ ಹೊಂದಿದೆ. ಪ್ರತಿದಿನ ಕಚೇರಿ ಅಥವಾ ನಗರದಲ್ಲಿ ಹೆಚ್ಚು ದೂರ ಪ್ರಯಾಣಿಸುವವರಿಗೆ ಇದು ಅನುಕೂಲಕರವಾಗಿದೆ.

ಎರಡೂ ಮಾದರಿಗಳಲ್ಲಿ BLDC ಹಬ್ ಮೋಟಾರ್ ಹಾಗೂ LiFePO4 (ಲಿಥಿಯಂ ಐರನ್ ಫಾಸ್ಫೇಟ್) ಬ್ಯಾಟರಿ ತಂತ್ರಜ್ಞಾನ ಬಳಸಲಾಗಿದೆ. ಈ ಬ್ಯಾಟರಿ ಹೆಚ್ಚು ಸುರಕ್ಷಿತವಾಗಿದ್ದು, ದೀರ್ಘಾವಧಿ ಬಾಳಿಕೆ ಮತ್ತು ಕಡಿಮೆ ನಿರ್ವಹಣಾ ವೆಚ್ಚವನ್ನು ನೀಡುತ್ತದೆ.

ಫೀಚರ್‌ಗಳ ವಿಷಯದಲ್ಲೂ ಕಂಪನಿ ಯಾವುದೇ ರಾಜಿ ಮಾಡಿಲ್ಲ. ಮೊಬೈಲ್ ಆಪ್ ಸಂಪರ್ಕದ ಮೂಲಕ ಬ್ಯಾಟರಿ ಮಟ್ಟ ಮತ್ತು ಉಳಿದಿರುವ ರೇಂಜ್ ಮಾಹಿತಿ ಪಡೆಯಬಹುದು. ಇದರ ಜೊತೆಗೆ ಫ್ರಂಟ್ ಡಿಸ್ಕ್ ಬ್ರೇಕ್, ಟೆಲಿಸ್ಕೋಪಿಕ್ ಫ್ರಂಟ್ ಸಸ್ಪೆನ್ಷನ್, ಆಂಟಿ-ಥೆಫ್ಟ್ ಲಾಕ್, ಪಾರ್ಕಿಂಗ್ ಅಸಿಸ್ಟ್, ರಿಪೇರಿ ಸ್ವಿಚ್ ಹಾಗೂ ಆರಾಮದಾಯಕ ರೈಡಿಂಗ್ ಪ್ಲಾಟ್‌ಫಾರ್ಮ್ ಸೇರಿದಂತೆ ಹಲವು ಆಧುನಿಕ ಸೌಲಭ್ಯಗಳನ್ನು ಸೇರಿಸಲಾಗಿದೆ. MG Pro+ ಮಾದರಿಯಲ್ಲಿ ದೊಡ್ಡ ಬೂಟ್ ಸ್ಪೇಸ್ ಕೂಡ ಲಭ್ಯವಿದ್ದು, ಸಾಮಾನು ಸಾಗಿಸಲು ನೆರವಾಗುತ್ತದೆ.

ಕಂಪನಿಯ ಸಹ ಸಂಸ್ಥಾಪಕಿ ಗುಂಜನ್ ಮಲ್ಹೋತ್ರಾ ಮಾತನಾಡಿ, ಕಡಿಮೆ ಬೆಲೆ ಎಂದರೆ ಗುಣಮಟ್ಟದಲ್ಲಿ ರಾಜಿ ಎಂಬ ಕಲ್ಪನೆಯನ್ನು ಬದಲಾಯಿಸುವ ಉದ್ದೇಶದಿಂದ ಈ ಸ್ಕೂಟರ್‌ಗಳನ್ನು ಅಭಿವೃದ್ಧಿಪಡಿಸಲಾಗಿದೆ ಎಂದು ತಿಳಿಸಿದ್ದಾರೆ. ಇದುವರೆಗೆ ದುಬಾರಿ ಎಲೆಕ್ಟ್ರಿಕ್ ವಾಹನಗಳಲ್ಲಿ ಮಾತ್ರ ಕಂಡುಬಂದ ಕೆಲವು ಪ್ರೀಮಿಯಂ ವೈಶಿಷ್ಟ್ಯಗಳನ್ನು ಈಗ ಸಾಮಾನ್ಯ ಗ್ರಾಹಕರಿಗೂ ಕೈಗೆಟುಕುವ ಬೆಲೆಯಲ್ಲಿ ನೀಡಲು ಕಂಪನಿ ಪ್ರಯತ್ನಿಸುತ್ತಿದೆ ಎಂದು ಅವರು ಹೇಳಿದ್ದಾರೆ.