ಚಲಿಸುವ ಟ್ರೈನ್ನಲ್ಲಿ ನವದಂಪತಿಯ ಮೊದಲ ರಾತ್ರಿ.. ಕರ್ತವ್ಯ ಲೋಪದಡಿ ಟಿಟಿಇ ಅಮಾನತು!
ಭಾರತೀಯ ರೈಲ್ವೆಯ ಅತ್ಯಂತ ದುಬಾರಿ ದರ್ಜೆಯಾದ ಫಸ್ಟ್ ಕ್ಲಾಸ್ ಎಸಿ ಬೋಗಿಯ ಕೊಠಡಿಯೊಂದನ್ನು ನವವಿವಾಹಿತ ದಂಪತಿಗಳು ತಮ್ಮ ಖಾಸಗಿ ಹನಿಮೂನ್ ಕೋಣೆಯನ್ನಾಗಿ ಪರಿವರ್ತಿಸಿದ್ದರು. ಕೆಂಪು-ಬಿಳಿ ಬಲೂನ್ಗಳು, ನವವಿನ್ಯಾಸದ ಹೂವಿನ ಹಾರಗಳು ಹಾಗೂ ಹಾಸಿಗೆಯ ಮೇಲೆಲ್ಲಾ ಗುಲಾಬಿ ದಳಗಳನ್ನು ಹರಡಿ ಇಡೀ ಕ್ಯಾಬಿನ್ ಅನ್ನು ಶೃಂಗರಿಸಲಾಗಿತ್ತು.
ಸಾರ್ವಜನಿಕ ಸಾರಿಗೆಯನ್ನು ಸ್ವಂತ ಹೋಟೆಲ್ ರೂಮಿನಂತೆ ಬದಲಾಯಿಸಿಕೊಂಡ ವಿಲಕ್ಷಣ ಘಟನೆಯೊಂದು ಸದ್ಯ ದೇಶಾದ್ಯಂತ ಭಾರಿ ಸಂಚಲನ ಸೃಷ್ಟಿಸಿದೆ. ಭಾರತೀಯ ರೈಲ್ವೆಯ ಅತ್ಯಂತ ದುಬಾರಿ ದರ್ಜೆಯಾದ ಫಸ್ಟ್ ಕ್ಲಾಸ್ ಎಸಿ ಬೋಗಿಯ ಕೊಠಡಿಯೊಂದನ್ನು ನವವಿವಾಹಿತ ದಂಪತಿಗಳು ತಮ್ಮ ಖಾಸಗಿ ಹನಿಮೂನ್ ಕೋಣೆಯನ್ನಾಗಿ ಪರಿವರ್ತಿಸಿದ್ದರು. ಕೆಂಪು-ಬಿಳಿ ಬಲೂನ್ಗಳು, ನವವಿನ್ಯಾಸದ ಹೂವಿನ ಹಾರಗಳು ಹಾಗೂ ಹಾಸಿಗೆಯ ಮೇಲೆಲ್ಲಾ ಗುಲಾಬಿ ದಳಗಳನ್ನು ಹರಡಿ ಇಡೀ ಕ್ಯಾಬಿನ್ ಅನ್ನು ಶೃಂಗರಿಸಲಾಗಿತ್ತು. ಈ ಐಷಾರಾಮಿ ಅಲಂಕಾರದ ದೃಶ್ಯಗಳು ಅಂತರ್ಜಾಲದಲ್ಲಿ ವ್ಯಾಪಕವಾಗಿ ಹರಡುತ್ತಿದ್ದಂತೆ, ಇಲಾಖೆಯು ಮುಖಭಂಗದಿಂದ ಬಚಾವಾಗಲು ತಕ್ಷಣವೇ ಕಾರ್ಯಪ್ರವೃತ್ತವಾಗಿದೆ. ಪ್ರಯಾಣಿಕರ ಸುರಕ್ಷತೆಯನ್ನು ನಿರ್ಲಕ್ಷಿಸಿದ ಕಾರಣಕ್ಕಾಗಿ ಆ ಬೋಗಿಯಲ್ಲಿದ್ದ ಮುಖ್ಯ ಟಿಕೆಟ್ ಪರೀಕ್ಷಕರನ್ನು (TC) ಕೆಲಸದಿಂದ ಅಮಾನತುಗೊಳಿಸಲಾಗಿದೆ.
ಈ ವಿಡಿಯೋ ಸಾಮಾಜಿಕ ಮಾಧ್ಯಮಗಳಲ್ಲಿ ಮುನ್ನೆಲೆಗೆ ಬರುತ್ತಿದ್ದಂತೆ ಸಾರ್ವಜನಿಕ ವಲಯದಿಂದ ತೀವ್ರ ವಿರೋಧ ವ್ಯಕ್ತವಾಯಿತು. ರೈಲಿನ ಒಳಗಡೆ ಬಲೂನ್ ಮತ್ತು ಒಣಗಿದ ಹೂವುಗಳಂತಹ ಸುಲಭವಾಗಿ ಉರಿಯುವ ವಸ್ತುಗಳನ್ನು ಇಷ್ಟೊಂದು ಪ್ರಮಾಣದಲ್ಲಿ ಬಳಸಿರುವುದು ಭಾರಿ ಅಪಾಯವನ್ನು ತಂದೊಡ್ಡಬಹುದು ಎಂದು ನೆಟ್ಟಿಗರು ಕಳವಳ ವ್ಯಕ್ತಪಡಿಸಿದರು. ಧೂಮಪಾನ ಅಥವಾ ಸಣ್ಣ ಕಿಡಿ ಸೋಕಿದರೂ ಇಡೀ ರೈಲು ಬೆಂಕಿಗೆ ಆಹುತಿಯಾಗುವ ಸಾಧ್ಯತೆ ಇರುತ್ತದೆ ಎಂದು ಜನರು ಆಕ್ರೋಶ ಹೊರಹಾಕಿದರು.
ಬೆಳೆಯುತ್ತಿರುವ ವಿವಾದಕ್ಕೆ ಪ್ರತಿಕ್ರಿಯಿಸಿರುವ ರೈಲ್ವೆ ಅಧಿಕಾರಿಗಳು, ಆ ಜೋಡಿಯು ಆ ಕೋಣೆಯಲ್ಲಿದ್ದ ಎರಡೂ ಸೀಟುಗಳನ್ನು ಸಂಪೂರ್ಣವಾಗಿ ಹಣ ಪಾವತಿಸಿ ಬುಕ್ ಮಾಡಿದ್ದರು. ಹೀಗಾಗಿ ಅವರು ತಮ್ಮ ಖಾಸಗಿ ಜಾಗವನ್ನು ಬಳಸಿಕೊಂಡಿದ್ದಾರೆ ವಿನಃ ಯಾವುದೇ ಕಾನೂನು ಮುರಿದಿಲ್ಲ ಎಂದು ಸಮರ್ಥಿಸಿಕೊಂಡಿದ್ದಾರೆ. ಆದರೆ, ಸಾರ್ವಜನಿಕ ಭದ್ರತೆಯ ಹಿತದೃಷ್ಟಿಯಿಂದ ಇಂತಹ ಅಪಾಯಕಾರಿ ಅಲಂಕಾರಗಳಿಗೆ ರೈಲ್ವೆ ಸಿಬ್ಬಂದಿ ಮೂಕಪ್ರೇಕ್ಷಕರಾಗಿ ಸಾಕ್ಷಿಯಾಗಬಾರದು ಎಂಬ ಕಾರಣಕ್ಕೆ ಶಿಸ್ತುಕ್ರಮ ಕೈಗೊಳ್ಳಲಾಗಿದೆ ಎಂದು ಸ್ಪಷ್ಟಪಡಿಸಿದ್ದಾರೆ.
