ಇದು ಸಾಮಾನ್ಯ ಅಕ್ಕಿಯಲ್ಲ: ಬೆಳೆದ 6 ತಿಂಗಳ ನಂತರವಷ್ಟೇ ಮಾರಾಟವಾಗುವ ಜಪಾನಿನ ಅತ್ಯಂತ ದುಬಾರಿ ಅಕ್ಕಿ
ಪ್ರಪಂಚದ ಅತ್ಯಂತ ದುಬಾರಿ ಅಕ್ಕಿ ಎಂಬ ಗಿನ್ನೆಸ್ ವಿಶ್ವ ದಾಖಲೆ (Guinness World Record) ಬರೆದಿರುವ ಈ ಅಕ್ಕಿಯ ಹೆಸರು 'ಕಿನೆಮೈ ಪ್ರೀಮಿಯಂ ರೈಸ್' (Kinmemai Premium Rice). ಇದನ್ನು ಜಪಾನ್ನಲ್ಲಿ ವಿಶೇಷ ತಂತ್ರಜ್ಞಾನ ಬಳಸಿ ಬೆಳೆಯಲಾಗುತ್ತದೆ.
ಇಂದಿನ ದಿನಗಳಲ್ಲಿ ತರಕಾರಿ, ಬೇಳೆಕಾಳು ಸೇರಿದಂತೆ ದಿನಸಿ ಪದಾರ್ಥಗಳ ಬೆಲೆ ಏರಿಕೆಯಾಗುತ್ತಿರುವುದು ಸಾಮಾನ್ಯ ಜನರ ಜೇಬಿಗೆ ಕತ್ತರಿ ಹಾಕುತ್ತಿದೆ. ಸಾಮಾನ್ಯ ಅಕ್ಕಿಯ ಬೆಲೆ ಕೆಜಿಗೆ ₹50 ರಿಂದ ₹100 ದಾಟಿದರೆ ಜನರು ಅಯ್ಯೋ ಬೆಲೆ ಜಾಸ್ತಿಯಾಯ್ತು ಎಂದು ಯೋಚಿಸುತ್ತಾರೆ. ಆದರೆ ಪ್ರಪಂಚದಲ್ಲೇ ಅತ್ಯಂತ ದುಬಾರಿ ಎನಿಸಿಕೊಂಡಿರುವ ಅಕ್ಕಿಯೊಂದಿದೆ. ಇದರ ಒಂದು ಕೆಜಿ ಬೆಲೆಯಲ್ಲಿ ಸಾಧಾರಣ ಕುಟುಂಬವೊಂದು ಕನಿಷ್ಠ ಮೂರು ತಿಂಗಳ ಇಡೀ ಮನೆಗೆ ಬೇಕಾಗುವ ದಿನಸಿ ಸಾಮಗ್ರಿಗಳನ್ನು ಸುಲಭವಾಗಿ ಖರೀದಿಸಬಹುದು! ಏನಿದು ಅಪರೂಪದ ಅಕ್ಕಿ? ಯಾಕಿಷ್ಟು ದುಬಾರಿ? ಇಲ್ಲಿದೆ ಆಸಕ್ತಿಕರ ಮಾಹಿತಿ.
ಪ್ರಪಂಚದ ಅತ್ಯಂತ ದುಬಾರಿ ಅಕ್ಕಿ ಎಂಬ ಗಿನ್ನೆಸ್ ವಿಶ್ವ ದಾಖಲೆ (Guinness World Record) ಬರೆದಿರುವ ಈ ಅಕ್ಕಿಯ ಹೆಸರು ‘ಕಿನೆಮೈ ಪ್ರೀಮಿಯಂ ರೈಸ್’ (Kinmemai Premium Rice). ಇದನ್ನು ಜಪಾನ್ನಲ್ಲಿ ವಿಶೇಷ ತಂತ್ರಜ್ಞಾನ ಬಳಸಿ ಬೆಳೆಯಲಾಗುತ್ತದೆ.
ಮಾರುಕಟ್ಟೆಯಲ್ಲಿ ಈ ಅಕ್ಕಿಯ ಒಂದು ಕೆಜಿ ಬೆಲೆ ಬರೋಬ್ಬರಿ ₹12,000 ದಿಂದ ₹15,000 ರೂಪಾಯಿ. ಕಿನೆಮೈ ಅಕ್ಕಿ ಒಂದೇ ರೀತಿಯ ತಳಿಯಲ್ಲ. ಜಪಾನ್ನಲ್ಲಿ ಪ್ರತಿ ವರ್ಷ ಬೆಳೆಯುವ ಸಾವಿರಾರು ಅಕ್ಕಿ ತಳಿಗಳಿಂದ ಅತ್ಯಂತ ಉತ್ತಮ ಗುಣಮಟ್ಟದ 4 ರಿಂದ 6 ತಳಿಗಳನ್ನು ತಜ್ಞರು ಆಯ್ಕೆ ಮಾಡುತ್ತಾರೆ. ಆ ತಳಿಗಳನ್ನು ನಿರ್ದಿಷ್ಟ ಪ್ರಮಾಣದಲ್ಲಿ ಮಿಶ್ರಣ ಮಾಡಿ (Blending) ಈ ‘ಕಿನೆಮೈ ಪ್ರೀಮಿಯಂ’ ಅಕ್ಕಿಯನ್ನು ಸಿದ್ಧಪಡಿಸಲಾಗುತ್ತದೆ.
ಸಾಮಾನ್ಯವಾಗಿ ಅಕ್ಕಿಯನ್ನು ಪಾಲಿಶ್ ಮಾಡುವಾಗ ಅದರ ಮೇಲಿರುವ ಪೋಷಕಾಂಶಗಳ ಪದರ ಮತ್ತು ಜೀವಸತ್ವಗಳು ನಾಶವಾಗುತ್ತವೆ. ಆದರೆ ಕಿನೆಮೈ ಅಕ್ಕಿಗೆ ಜಪಾನ್ನ ಪೇಟೆಂಟ್ ಹೊಂದಿರುವ ವಿಶೇಷ ಪಾಲಿಶಿಂಗ್ ತಂತ್ರಜ್ಞಾನವನ್ನು ಬಳಸಲಾಗುತ್ತದೆ. ಇದರಿಂದ ಅಕ್ಕಿಯ ಅನಗತ್ಯ ಹೊಟ್ಟು ಮಾತ್ರ ಹೊರಟುಹೋಗಿ, ಪೋಷಕಾಂಶಗಳು ಮತ್ತು ನೈಸರ್ಗಿಕ ರುಚಿ ಶೇಕಡಾ 100 ರಷ್ಟು ಹಾಗೆಯೇ ಉಳಿಯುತ್ತದೆ.
ಈ ಅಕ್ಕಿಯ ಮತ್ತೊಂದು ವಿಶೇಷವೆಂದರೆ, ಬೆಳೆ ಕೊಯ್ಲಾದ ತಕ್ಷಣ ಇದನ್ನು ಮಾರುಕಟ್ಟೆಗೆ ತರುವುದಿಲ್ಲ. ಕೊಯ್ಲಿನ ನಂತರ ಸುಮಾರು 6 ತಿಂಗಳ ಕಾಲ ಅತ್ಯಂತ ಕಟ್ಟುನಿಟ್ಟಾದ ಉಷ್ಣಾಂಶ ಹಾಗೂ ಆರ್ದ್ರತೆಯಿರುವ ಉಗ್ರಾಣಗಳಲ್ಲಿ ಶೇಖರಿಸಿಡಲಾಗುತ್ತದೆ (Ageing Process).
ಹೀಗೆ ವಿಶೇಷ ವಿಧಾನದಲ್ಲಿ ಶೇಖರಿಸಿಡುವುದರಿಂದ ಅಕ್ಕಿಯ ಸುವಾಸನೆ, ವಿನ್ಯಾಸ ಹಾಗೂ ರುಚಿ ದ್ವಿಗುಣಗೊಳ್ಳುತ್ತದೆ. ಆ ನಂತರವೇ ಇದನ್ನು ಪ್ರೀಮಿಯಂ ಪ್ಯಾಕಿಂಗ್ ಮಾಡಿ ಮಾರುಕಟ್ಟೆಗೆ ಬಿಡುಗಡೆ ಮಾಡಲಾಗುತ್ತದೆ.
ಕಿನೆಮೈ ಅಕ್ಕಿಯನ್ನು ವಾಣಿಜ್ಯಿಕವಾಗಿ ಬೃಹತ್ ಪ್ರಮಾಣದಲ್ಲಿ ಉತ್ಪಾದಿಸುವುದಿಲ್ಲ. ಪ್ರಪಂಚದಾದ್ಯಂತ ಅತ್ಯಂತ ಸೀಮಿತ ಪ್ರಮಾಣದಲ್ಲಿ (Limited Edition) ಮಾತ್ರ ಪೂರೈಸಲಾಗುತ್ತದೆ. ಇದರ ಪ್ಯಾಕೇಜಿಂಗ್ ಕೂಡ ಅತ್ಯಂತ ವಿಶಿಷ್ಟವಾಗಿದ್ದು, ಪ್ರತಿಯೊಂದು ಸಣ್ಣ ಪ್ಯಾಕೇಟ್ ಉಡುಗೊರೆಯ ರೂಪದಲ್ಲಿ ಸಿದ್ಧವಾಗಿರುತ್ತದೆ. ಈ ಎಲ್ಲಾ ಕಾರಣಗಳಿಂದಾಗಿ ಈ ಅಕ್ಕಿ ಪ್ರಪಂಚದಲ್ಲೇ ಅತ್ಯಂತ ದುಬಾರಿ ಧಾನ್ಯವಾಗಿ ಗುರುತಿಸಿಕೊಂಡಿದೆ.
