ಗುರು ಪೂರ್ಣಿಮೆ 2026: ಶುಭ ಮುಹೂರ್ತ, ಮಹತ್ವ ಮತ್ತು ಆಚರಣೆಯ ಸಂಪೂರ್ಣ ಮಾಹಿತಿ
ಗುರು ಮತ್ತು ಶಿಷ್ಯರ ಪವಿತ್ರ ಸಂಪ್ರದಾಯಕ್ಕೆ ಮೀಸಲಾದ ಅತ್ಯಂತ ವಿಶೇಷ ಹಬ್ಬವೇ ‘ಗುರು ಪೂರ್ಣಿಮೆ’. ಪ್ರತಿ ವರ್ಷ ಆಷಾಢ ಶುಕ್ಲ ಪೂರ್ಣಿಮೆ ತಿಥಿಯಂದು ಈ ಹಬ್ಬವನ್ನು ಅತ್ಯಂತ ಭಕ್ತಿ ಮತ್ತು ಶ್ರದ್ಧೆಯಿಂದ ಆಚರಿಸಲಾಗುತ್ತದೆ.
ಗುರು ಮತ್ತು ಶಿಷ್ಯರ ಪವಿತ್ರ ಸಂಪ್ರದಾಯಕ್ಕೆ ಮೀಸಲಾದ ಅತ್ಯಂತ ವಿಶೇಷ ಹಬ್ಬವೇ ‘ಗುರು ಪೂರ್ಣಿಮೆ’. ಪ್ರತಿ ವರ್ಷ ಆಷಾಢ ಶುಕ್ಲ ಪೂರ್ಣಿಮೆ ತಿಥಿಯಂದು ಈ ಹಬ್ಬವನ್ನು ಅತ್ಯಂತ ಭಕ್ತಿ ಮತ್ತು ಶ್ರದ್ಧೆಯಿಂದ ಆಚರಿಸಲಾಗುತ್ತದೆ. ನಮ್ಮ ಜೀವನದ ಅಜ್ಞಾನದ ಕತ್ತಲನ್ನು ಹೋಗಲಾಡಿಸಿ, ಜ್ಞಾನದ ಬೆಳಕನ್ನು ತೋರುವ ಪ್ರತಿಯೊಬ್ಬ ಗುರುಗೂ ಕೃತಜ್ಞತೆ ಸಲ್ಲಿಸುವ ದಿನವಿದು.
ಮಹರ್ಷಿ ವೇದವ್ಯಾಸರ ಜನ್ಮದಿನ (ವ್ಯಾಸ ಪೂರ್ಣಿಮೆ)
ಗುರು ಪೂರ್ಣಿಮೆಯನ್ನು ‘ವ್ಯಾಸ ಪೂರ್ಣಿಮೆ’ ಎಂದೂ ಕರೆಯಲಾಗುತ್ತದೆ. ಸನಾತನ ಧರ್ಮಕ್ಕೆ ವೇದಗಳನ್ನು ವಿಂಗಡಿಸಿ ನೀಡಿ, ಮಹಾಭಾರತ, ಶ್ರೀಮದ್ ಭಾಗವತ ಹಾಗೂ ಪುರಾಣಗಳನ್ನು ರಚಿಸಿದ ಆದಿ ಗುರು ಮಹರ್ಷಿ ವೇದವ್ಯಾಸರು ಆಷಾಢ ಹುಣ್ಣಿಮೆಯಂದೇ ಜನಿಸಿದರು ಎಂದು ನಂಬಲಾಗಿದೆ. ಈ ದಿನದಂದು ಗುರು ಪೂಜೆಯ ಜತೆಗೆ ವೇದವ್ಯಾಸರನ್ನು ಸ್ಮರಿಸಿ ಪೂಜಿಸುವುದು ವಿಶೇಷ ಫಲವನ್ನು ನೀಡುತ್ತದೆ.
ಗುರು ಪೂರ್ಣಿಮೆ 2026: ದಿನಾಂಕ ಮತ್ತು ತಿಥಿ ವಿವರ
ಪಂಚಾಂಗದ ಪ್ರಕಾರ, 2026 ರಲ್ಲಿ ಆಷಾಢ ಶುಕ್ಲ ಪೂರ್ಣಿಮೆ ತಿಥಿಯು ಈ ಕೆಳಗಿನಂತಿದೆ:
- ಪೂರ್ಣಿಮೆ ತಿಥಿ ಆರಂಭ: ಜುಲೈ 28, 2026 ರ ಸಂಜೆ 06:18ಕ್ಕೆ.
- ಪೂರ್ಣಿಮೆ ತಿಥಿ ಅಂತ್ಯ: ಜುಲೈ 29, 2026 ರ ರಾತ್ರಿ 08:05ಕ್ಕೆ.
- ಆಚರಣೆಯ ದಿನ: ಉದಯ ತಿಥಿಯ ಪ್ರಕಾರ ಜುಲೈ 29, 2026 (ಬುಧವಾರ) ರಂದು ಗುರು ಪೂರ್ಣಿಮೆಯನ್ನು ಆಚರಿಸಲಾಗುತ್ತದೆ.
ಪೂಜೆಗೆ ಶುಭ ಮುಹೂರ್ತಗಳು
ಜುಲೈ 29 ರಂದು ಇಡೀ ದಿನ ಪೂರ್ಣಿಮೆ ಇರುವುದರಿಂದ ಪೂಜೆ ಹಾಗೂ ಧಾರ್ಮಿಕ ಕಾರ್ಯಗಳಿಗೆ ಅತ್ಯಂತ ಅನುಕೂಲಕರ ದಿನವಾಗಿದೆ. ವಿಶೇಷವಾಗಿ ಈ ಕೆಳಗಿನ ಮುಹೂರ್ತಗಳು ಅತ್ಯಂತ ಶ್ರೇಷ್ಠವಾಗಿವೆ:
- ಬ್ರಹ್ಮ ಮುಹೂರ್ತ: ಬೆಳಿಗ್ಗೆ 04:17 ರಿಂದ 04:59 ರವರೆಗೆ
- ಅಮೃತ ಕಾಲ: ಬೆಳಿಗ್ಗೆ 08:34 ರಿಂದ 10:20 ರವರೆಗೆ
- ಅಭಿಜಿತ್ ಮುಹೂರ್ತ: ಮಧ್ಯಾಹ್ನ 12:00 ರಿಂದ 12:55 ರವರೆಗೆ
ಗುರು ಪೂರ್ಣಿಮೆಯ ಆಚರಣೆ ಮತ್ತು ಮಹತ್ವ
- ಗುರು ವಂದನೆ: ನಮ್ಮ ಜೀವನದಲ್ಲಿ ಅಕ್ಷರ ಕಲಿಸಿದ ಶಿಕ್ಷಕರು, ವಿದ್ಯೆ ನೀಡಿದ ಗುರುಗಳು, ಆಧ್ಯಾತ್ಮಿಕ ಮಾರ್ಗದರ್ಶಕರು ಹಾಗೂ ನಮ್ಮ ಪ್ರಥಮ ಗುರುಗಳಾದ ತಂದೆ-ತಾಯಿಯನ್ನು ಈ ದಿನ ಗೌರವಿಸಿ, ಪಾದಪೂಜೆ ಅಥವಾ ನಮನ ಸಲ್ಲಿಸಿ ಆಶೀರ್ವಾದ ಪಡೆಯಲಾಗುತ್ತದೆ.
- ದಾನ ಮತ್ತು ಧ್ಯಾನ: ಈ ಶುಭ ದಿನದಂದು ಬ್ರಾಹ್ಮಣರಿಗೆ, ಬಡವರಿಗೆ ಅಥವಾ ವಿದ್ಯಾರ್ಥಿಗಳಿಗೆ ಪುಸ್ತಕ, ಬಟ್ಟೆ ಮತ್ತು ಅಗತ್ಯ ಸಾಮಿüಗ್ರಿಗಳನ್ನು ದಾನ ಮಾಡುವುದು ಶ್ರೇಯಸ್ಕರ. ಹಾಗೆಯೇ ಧ್ಯಾನ ಮತ್ತು ಜಪ ಮಾಡುವುದರಿಂದ ಮನಸ್ಸಿಗೆ ನೆಮ್ಮದಿ ಹಾಗೂ ಆಧ್ಯಾತ್ಮಿಕ ಉನ್ನತಿ ಸಿಗುತ್ತದೆ.
- ಶಿವ ಹಾಗೂ ಯೋಗ ಪರಂಪರೆ: ಯೋಗ ಪರಂಪರೆಯ ಪ್ರಕಾರ, ಆದಿಯೋಗಿಯಾದ ಶಿವನು ಸಪ್ತರಿಷಿಗಳಿಗೆ ಪ್ರಥಮ ಬಾರಿಗೆ ಯೋಗ ವಿದ್ಯೆಯನ್ನು ಬೋಧಿಸಿ ಗುರುವಾದ ದಿನವೆಂದೂ ಸಹ ಇದನ್ನು ಸ್ಮರಿಸಲಾಗುತ್ತದೆ.
ಗುರು ಪೂರ್ಣಿಮೆಯ ಮರುದಿನವೇ ಶಿವನ ಆರಾಧನೆಗೆ ಅತ್ಯಂತ ಪವಿತ್ರವೆಂದು ನಂಬಲಾದ ಶ್ರಾವಣ ಮಾಸವು ಆರಂಭವಾಗುತ್ತದೆ. ಇದು ಆಧ್ಯಾತ್ಮಿಕ ಸಾಧನೆಗೆ ಮತ್ತಷ್ಟು ವಿಶೇಷತೆಯನ್ನು ತಂದುಕೊಡುತ್ತದೆ.
