ಇಂದಿನಿಂದ ಮೂಟೆ ಸಿಮೆಂಟ್ ದರವೂ ದುಬಾರಿ : ರಿಯಲ್ ಎಸ್ಟೇಟ್ ವಲಯಕ್ಕೆ ಭಾರೀ ಆಘಾತ..!
ದೇಶಾದ್ಯಂತ ಎಲ್ಲಾ ಪ್ರಮುಖ ಬ್ರ್ಯಾಂಡ್ಗಳ ಸಿಮೆಂಟ್ ದರದಲ್ಲಿ ಏರಿಕೆ ಮಾಡಲಾಗಿದ್ದು, ಇಂದಿನಿಂದಲೇ ಪರಿಷ್ಕೃತ ದರ ಜಾರಿಗೆ ಬರಲಿದೆ.
Cement Price Hike: 2026ರ ವರ್ಷ ಆರಂಭವಾದಾಗಿನಿಂದ ದೇಶದ ಜನತೆ ಬೆಲೆ ಏರಿಕೆ ಸುದ್ದಿಯನ್ನೇ ಕೇಳುತ್ತಾ ಬರುತ್ತಿದ್ದಾರೆ. ಈಗಾಗಲೇ ಗ್ಯಾಸ್ ಸಿಲಿಂಡರ್ ದರ ಹಾಗೂ ಟೋಲ್ ಶುಲ್ಕ ಏರಿಕೆಯಿಂದ ಸುಸ್ತಾಗಿದ್ದ ಜನತೆಗೆ ಇದೀಗ ಮತ್ತೊಂದು ಶಾಕ್ ಎದುರಾಗಿದೆ. ದೇಶಾದ್ಯಂತ ಎಲ್ಲಾ ಪ್ರಮುಖ ಬ್ರ್ಯಾಂಡ್ಗಳ ಸಿಮೆಂಟ್ ದರದಲ್ಲಿ ಏರಿಕೆ ಮಾಡಲಾಗಿದ್ದು, ಇಂದಿನಿಂದಲೇ ಪರಿಷ್ಕೃತ ದರ ಜಾರಿಗೆ ಬರಲಿದೆ.
ನಿನ್ನೆಯವರೆಗೆ ಬುಕ್ಕಿಂಗ್ ಆಗಿರುವ ಸಿಮೆಂಟ್ಗಳಿಗೆಯ ಹಳೆಯ ದರಗಳನ್ನೇ ಕಂಪನಿಗಳು ವಿಧಿಸಲಿವೆ. ಆದರೆ ಇಂದಿನಿಂದ ಬುಕ್ಕಿಂಗ್ ಆಗುವ ಸಿಮೆಂಟ್ ಗಳಿಗೆ ಪರಿಷ್ಕೃತ ದರ ಅನ್ವಯವಾಗಲಿದೆ. ಒಂದು ಮೂಟೆ ಸಿಮೆಂಟ್ ದರದಲ್ಲಿ 30 ರಿಂದ 50 ರೂಪಾಯಿ ಏರಿಕೆ ಮಾಡಲಾಗಿದೆ. ಈ ಪರಿಷ್ಕೃತ ದರವು ರಿಯಲ್ ಎಸ್ಟೇಟ್ ಉದ್ಯಮದ ಮೇಲೆ ಭಾರೀ ಪರಿಣಾಮ ಬೀರಿದೆ. ಈಗಾಗಲೇ ನಿರ್ಮಾಣ ಹಂತದಲ್ಲಿರುವ ಮನೆಗಳ ನಿರ್ಮಾಣಕ್ಕೆ ಅಂದಾಜಿಗಿಂತ ಹೆಚ್ಚು ವೆಚ್ಚ ತಗುಲಲಿದೆ.
ಇನ್ನು ಸಿಮೆಂಟ್ ದರ ಏರಿಕೆಗೆ ಪೆಟ್ರೋಲ್ ಹಾಗೂ ಡೀಸೆಲ್ ಕೊರತೆಯೇ ಪ್ರಮುಖ ಕಾರಣ ಎನ್ನಲಾಗಿದೆ. ಸಾಗಣೆ ವೆಚ್ಚ ಏರಿಕೆಯಾಗುತ್ತಿರುವ ಹಿನ್ನೆಲೆಯಲ್ಲಿ ಸಿಮೆಂಟ್ ದರದಲ್ಲಿ ಏರಿಕೆ ಮಾಡಲಾಗಿದೆ. ಸಾಗಣೆ ವೆಚ್ಚವನ್ನು ಸಿಮೆಂಟ್ ಕಂಪನಿಗಳು ಗ್ರಾಹಕರ ಮೇಲೆ ಹೇರಲು ನಿರ್ಧರಿಸಿದ್ದು ಇದರಿಂದ ಮನೆ ಕಟ್ಟಬೇಕು ಎಂದುಕೊಂಡವರಿಗೆಲ್ಲ ಭಾರೀ ಆಘಾತ ಎದುರಾಗಿದೆ. ಮೂಲಗಳ ಪ್ರಕಾರ ಪ್ರೀಮಿಯಂ ಬ್ರ್ಯಾಂಡ್ ಸಿಮೆಂಟ್ ದರವು ಮೂಟೆಗೆ 360 ರೂಪಾಯಿಯನ್ನೂ ಮೀರಿಸಲಿದೆ ಎನ್ನಲಾಗಿದೆ.
ಇದನ್ನೂ ಓದಿ: ಡಿಜಿಟಲ್ ಜಗತ್ತಿಗೆ ಕಾದಿದೆ ಭಾರೀ ಗಂಡಾತರ..! ಇಂಟರ್ನೆಟ್ ಸೇವೆಗೂ ತಟ್ಟಿದ ಯುದ್ಧದ ಭೀತಿ..!
ರಿಯಲ್ ಎಸ್ಟೇಟ್ ಉದ್ಯಮವು ಕಳೆದ ಕೆಲವು ದಿನಗಳಿಂದ ಸಾಲು ಸಾಲು ಬೆಲೆ ಏರಿಕೆಯ ಸುದ್ದಿಯನ್ನೇ ಕೇಳುತ್ತಿದೆ. ಕೆಲ ತಿಂಗಳ ಹಿಂದಷ್ಟೇ ಕಬ್ಬಿಣ, ಮರಳು ಹಾಗೂ ಜಲ್ಲಿ ಕಲ್ಲುಗಳ ದರದಲ್ಲಿ ಏರಿಕೆಯಾಗಿತ್ತು. ಇದೀಗ ಸಿಮೆಂಟ್ ಕೂಡ ಈ ಬೆಲೆ ಏರಿಕೆಯ ಪಟ್ಟಿಗೆ ಸೇರಿಕೊಂಡಿದೆ. ಈ ರೀತಿ ಗೃಹ ನಿರ್ಮಾಣ ವಸ್ತುಗಳ ದರ ಏರಿಕೆಯಿಂದಾಗಿ ಭವಿಷ್ಯದಲ್ಲಿ ಅಪಾರ್ಟ್ಮೆಂಟ್ಗಳ ಖರೀದಿ ದರವೂ ಹೆಚ್ಚಾಗಲಿದೆ ಎಂದು ಅಂದಾಜಿಸಬಹುದಾಗಿದೆ. ಇದು ಮಾತ್ರವಲ್ಲದೇ ಮನೆ ನಿರ್ಮಾಣದ ಅಂದಾಜು ಖರ್ಚಿನಲ್ಲಿಯೂ ಲಕ್ಷಾಂತರ ರೂಪಾಯಿಗಳ ಏರಿಕೆ ಕಂಡುಬರಲಿದೆ. ಇದು ಸಾಮಾನ್ಯ ವರ್ಗಗಳ ಜೀವನದ ಮೇಲೆ ಗಂಭೀರ ಪರಿಣಾಮ ಬೀರಲಿದೆ.
