ಕೈಯಲ್ಲಿ 5,000 ರೂಪಾಯಿ ಇದೆಯೇ? ತಕ್ಷಣ ಹೀಗೆ ‘ತುರ್ತು ನಿಧಿ’ ಸಿದ್ಧಪಡಿಸಿ

Emergency Fund in 5000 Rs: ಇಂದಿನ ದಿನಗಳಲ್ಲಿ ಮ್ಯೂಚುವಲ್ ಫಂಡ್ ಮತ್ತು ಎಸ್‌ಐಪಿ (SIP) ಬಗ್ಗೆ ಎಲ್ಲೆಡೆ ಚರ್ಚೆ ನಡೆಯುತ್ತಿದೆ. ಕೈಯಲ್ಲಿ ಅಲ್ಪ ಹಣ ಉಳಿದರೂ ತಕ್ಷಣ ಎಸ್‌ಐಪಿ ಆರಂಭಿಸಿ ಶ್ರೀಮಂತರಾಗುವ ಕನಸು ಕಾಣುವುದು ಸಹಜ. ಆದರೆ, ಆರ್ಥಿಕ ತಜ್ಞರ ಪ್ರಕಾರ, ನಿಮ್ಮ ಮೊದಲ 5,000 ರೂಪಾಯಿಯನ್ನು ಎಸ್‌ಐಪಿಗೆ ಹಾಕುವ ಮೊದಲು ನೀವು ‘ತುರ್ತು ನಿಧಿ’ (Emergency Fund) ಸಿದ್ಧಪಡಿಸಿಕೊಳ್ಳುವುದು ಅತ್ಯಂತ ಜಾಣತನದ ಕ್ರಮ.

ಏನಿದು ತುರ್ತು ನಿಧಿ? ಯಾಕೆ ಮೊದಲು ಬೇಕು?

ನಾವೆಲ್ಲರೂ ಸಂಪತ್ತು ವೃದ್ಧಿಸಲು ಎಸ್‌ಐಪಿ ಆರಂಭಿಸುತ್ತೇವೆ. ಆದರೆ ಜೀವನದಲ್ಲಿ ಅನಿರೀಕ್ಷಿತ ಅಪಘಾತ, ವೈದ್ಯಕೀಯ ತುರ್ತು ಪರಿಸ್ಥಿತಿ ಅಥವಾ ಉದ್ಯೋಗ ನಷ್ಟದಂತಹ ಸನ್ನಿವೇಶಗಳು ಎದುರಾದಾಗ, ನಮಗೆ ತಕ್ಷಣದ ಹಣದ ಅವಶ್ಯಕತೆ ಇರುತ್ತದೆ. ಆ ಸಮಯದಲ್ಲಿ ನಿಮ್ಮ ಬಳಿ ತುರ್ತು ನಿಧಿ ಇಲ್ಲದಿದ್ದರೆ, ನೀವು ಅನಿವಾರ್ಯವಾಗಿ ನಿಮ್ಮ ಎಸ್‌ಐಪಿಯನ್ನು ಅರ್ಧಕ್ಕೇ ನಿಲ್ಲಿಸಬೇಕಾಗುತ್ತದೆ ಅಥವಾ ನಷ್ಟದಲ್ಲಿದ್ದರೂ ಹೂಡಿಕೆಯನ್ನು ಹಿಂಪಡೆಯಬೇಕಾಗುತ್ತದೆ.

ಆರ್ಥಿಕ ತಜ್ಞರು ಏನು ಹೇಳುತ್ತಾರೆ?

ಪರ್ಸನಲ್ ಫೈನಾನ್ಸ್ ತಜ್ಞರಾದ ರಿತೇಶ್ ಸಬರ್ವಾಲ್ ಅವರ ಪ್ರಕಾರ ತುರ್ತು ನಿಧಿ ಇಲ್ಲದೆ ಎಸ್‌ಐಪಿ ಆರಂಭಿಸುವ 70% ಜನರು, ಕೇವಲ 2 ವರ್ಷಗಳೊಳಗೆ ತಮ್ಮ ಹೂಡಿಕೆಯನ್ನು ಹಿಂಪಡೆಯುತ್ತಾರೆ. ಆದರೆ ಮೊದಲು ಸುರಕ್ಷತಾ ನಿಧಿ ಹೊಂದಿರುವವರಲ್ಲಿ 85% ರಷ್ಟು ಜನರು 5 ವರ್ಷಗಳಿಗಿಂತ ಹೆಚ್ಚು ಕಾಲ ಹೂಡಿಕೆಯನ್ನು ಮುಂದುವರಿಸುತ್ತಾರೆ.

KSRTC price hike: ನಾಳೆಯಿಂದ ಕೆಎಸ್‌ಆರ್‌ಟಿಸಿ ಲಗೇಜ್ ದರ ಏರಿಕೆ-ಹೊಸ ದರ ಪಟ್ಟಿ ಗಮನಿಸಿ

ನೀವು ಏನು ಮಾಡಬೇಕು?

ಮೊದಲು ಸುರಕ್ಷತಾ ಕವಚ: ನಿಮ್ಮ ಮಾಸಿಕ ಖರ್ಚಿನ ಕನಿಷ್ಠ 6 ರಿಂದ 12 ತಿಂಗಳಷ್ಟು ಮೊತ್ತವನ್ನು ತುರ್ತು ನಿಧಿಯಾಗಿ ಮೀಸಲಿಡಿ.

ಹಣ ಎಲ್ಲಿರಬೇಕು?: ಈ ಹಣವನ್ನು ಕೇವಲ ಸೇವಿಂಗ್ಸ್ ಖಾತೆಯಲ್ಲಿ ಇಡುವ ಬದಲು, ಸುಲಭವಾಗಿ ಹಿಂಪಡೆಯಬಹುದಾದ (Liquidity) ‘ಲಿಕ್ವಿಡ್ ಫಂಡ್‌’ಗಳು ಅಥವಾ ಅಲ್ಪಾವಧಿಯ ಫಿಕ್ಸೆಡ್ ಡಿಪಾಸಿಟ್‌ಗಳಲ್ಲಿ ಇಡಬಹುದು.

ಸಮತೋಲನ ಸಾಧಿಸಿ: ನಿಮ್ಮ ಬಳಿ ಇರುವ 5,000 ರೂಪಾಯಿಯಲ್ಲಿ ಸ್ವಲ್ಪ ಭಾಗವನ್ನು ತುರ್ತು ನಿಧಿಗೆ ಮತ್ತು ಇನ್ನು ಸ್ವಲ್ಪ ಭಾಗವನ್ನು ಸಣ್ಣ ಎಸ್‌ಐಪಿಗೆ ಮೀಸಲಿಡುವ ಮೂಲಕ ಹೂಡಿಕೆಯ ಅಭ್ಯಾಸ ಬೆಳೆಸಿಕೊಳ್ಳಿ.

ಎಸ್‌ಐಪಿ ಎಂಬುದು ನಿಮ್ಮ ಭವಿಷ್ಯದ ಆಸ್ತಿ ನಿರ್ಮಾಣಕ್ಕೆ, ಆದರೆ ತುರ್ತು ನಿಧಿ ಎಂಬುದು ನಿಮ್ಮ ಇಂದಿನ ನೆಮ್ಮದಿಗೆ. ತಳಪಾಯ ಭದ್ರವಾಗಿದ್ದರೆ ಮಾತ್ರ ನಿಮ್ಮ ಹೂಡಿಕೆಯ ಕಟ್ಟಡ ಎತ್ತರಕ್ಕೆ ಬೆಳೆಯಲು ಸಾಧ್ಯ. ಆದ್ದರಿಂದ, ಮೊದಲ 5,000 ರೂಪಾಯಿಯನ್ನು ಹೂಡುವ ಮುನ್ನ ನಿಮ್ಮ ಸುರಕ್ಷತಾ ಕವಚವನ್ನು ಭದ್ರಪಡಿಸಿಕೊಳ್ಳಿ.