ಹೋಂ ಲೋನ್ EMI ತಪ್ಪಿದರೆ ಮನೆ ಹರಾಜಾಗುತ್ತದೆಯೇ? ಮಹತ್ವದ ಮಾಹಿತಿ
ಗೃಹ ಸಾಲದ EMI ಪಾವತಿಯಲ್ಲಿ ವಿಳಂಬವಾದರೆ ಬ್ಯಾಂಕ್ ತಕ್ಷಣ ಮನೆ ಹರಾಜು ಮಾಡುವುದಿಲ್ಲ. ಆದರೆ ನಿರಂತರ ಬಾಕಿ ಉಳಿದರೆ ಕಾನೂನು ಪ್ರಕ್ರಿಯೆ ಆರಂಭವಾಗುತ್ತದೆ. ಪ್ರತಿಯೊಬ್ಬ ಸಾಲಗಾರರು ತಿಳಿಯಬೇಕಾದ ಪ್ರಮುಖ ಮಾಹಿತಿ ಇಲ್ಲಿದೆ.
ಗೃಹ ಸಾಲ ಪಡೆದಿರುವ ಅನೇಕರು ಪ್ರತಿ ತಿಂಗಳ EMI ಪಾವತಿಯನ್ನು ತಮ್ಮ ಮೊದಲ ಆದ್ಯತೆಯಾಗಿ ಪರಿಗಣಿಸುತ್ತಾರೆ. ಕಾರಣ, EMI ಪಾವತಿಯಲ್ಲಿ ನಿರ್ಲಕ್ಷ್ಯ ತೋರಿದರೆ ಮನೆ ಕಳೆದುಕೊಳ್ಳುವ ಭಯ ಬಹುತೇಕರಲ್ಲಿದೆ. ಆದರೆ ಒಂದು ಅಥವಾ ಎರಡು EMI ಬಾಕಿ ಉಳಿದ ತಕ್ಷಣ ಬ್ಯಾಂಕ್ ಮನೆ ಹರಾಜು ಮಾಡುವುದಿಲ್ಲ ಎಂಬುದು ತಿಳಿದಿರಬೇಕು.
ಸಾಲಗಾರರು ಆರ್ಥಿಕ ತೊಂದರೆಯಿಂದಾಗಿ EMI ಪಾವತಿಸಲು ಸಾಧ್ಯವಾಗದ ಪರಿಸ್ಥಿತಿ ಎದುರಾದರೆ, ಮೊದಲಿಗೆ ಬ್ಯಾಂಕ್ ಅನ್ನು ಸಂಪರ್ಕಿಸಿ ಸಮಸ್ಯೆಯನ್ನು ವಿವರಿಸುವುದು ಉತ್ತಮ. ಸಮಯಕ್ಕೆ ಸರಿಯಾಗಿ ಮಾಹಿತಿ ನೀಡುವುದರಿಂದ ಕೆಲ ಸಂದರ್ಭಗಳಲ್ಲಿ ಮರುಪಾವತಿ ಅವಧಿ ವಿಸ್ತರಣೆ ಅಥವಾ ಇತರ ಸೌಲಭ್ಯಗಳನ್ನು ಪಡೆಯುವ ಅವಕಾಶ ಇರಬಹುದು.
ಭಾರತೀಯ ರಿಸರ್ವ್ ಬ್ಯಾಂಕ್ನ ನಿಯಮಗಳ ಪ್ರಕಾರ, ಸತತ ಮೂರು ತಿಂಗಳು ಅಥವಾ ಸುಮಾರು 90 ದಿನಗಳವರೆಗೆ EMI ಪಾವತಿಸದಿದ್ದರೆ ಆ ಸಾಲ ಖಾತೆಯನ್ನು ಎನ್ಪಿಎ (Non-Performing Asset) ಎಂದು ಘೋಷಿಸಲಾಗುತ್ತದೆ. ಈ ಹಂತ ತಲುಪಿದ ಬಳಿಕ ಬ್ಯಾಂಕ್ ಮುಂದಿನ ಕಾನೂನು ಕ್ರಮಗಳಿಗೆ ಮುಂದಾಗಬಹುದು.
ಎನ್ಪಿಎ ಎಂದು ಘೋಷಿಸಿದ ನಂತರ, SARFAESI ಕಾಯ್ದೆಯ ಸೆಕ್ಷನ್ 13(2) ಅಡಿಯಲ್ಲಿ ಬ್ಯಾಂಕ್ ಸಾಲಗಾರರಿಗೆ 60 ದಿನಗಳ ಲಿಖಿತ ನೋಟಿಸ್ ಕಳುಹಿಸುತ್ತದೆ. ಈ ಅವಧಿಯಲ್ಲಿ ಬಾಕಿ ಮೊತ್ತವನ್ನು ಪಾವತಿಸಲು ಅಥವಾ ತಮ್ಮ ಆಕ್ಷೇಪಣೆಗಳನ್ನು ಸಲ್ಲಿಸಲು ಅವಕಾಶ ನೀಡಲಾಗುತ್ತದೆ.
60 ದಿನಗಳ ನೋಟಿಸ್ ಅವಧಿಯ ನಂತರವೂ ಪಾವತಿ ಆಗದಿದ್ದರೆ, ಬ್ಯಾಂಕ್ ಆಸ್ತಿಯನ್ನು ತನ್ನ ವಶಕ್ಕೆ ಪಡೆಯುವ ಪ್ರಕ್ರಿಯೆ ಆರಂಭಿಸಬಹುದು. ಮನೆ ಹರಾಜು ಮಾಡುವ ಮೊದಲು ಮತ್ತೊಮ್ಮೆ 30 ದಿನಗಳ ಮಾರಾಟ ನೋಟಿಸ್ ನೀಡುವುದು ಕಡ್ಡಾಯವಾಗಿದೆ. ಈ ನೋಟಿಸ್ನಲ್ಲಿ ಆಸ್ತಿಯ ಮೌಲ್ಯ ಹಾಗೂ ಹರಾಜಿನ ದಿನಾಂಕದ ವಿವರಗಳು ಇರುತ್ತವೆ.
ಸಾಮಾನ್ಯವಾಗಿ ಮೊದಲ EMI ಬಾಕಿ ಉಳಿದ ದಿನದಿಂದ ಮನೆ ಹರಾಜು ಪ್ರಕ್ರಿಯೆ ಪೂರ್ಣಗೊಳ್ಳುವವರೆಗೆ 8 ರಿಂದ 12 ತಿಂಗಳವರೆಗೆ ಸಮಯ ತೆಗೆದುಕೊಳ್ಳಬಹುದು. ಈ ಅವಧಿಯಲ್ಲಿ ಸಾಲಗಾರರು ಬಾಕಿ ಮೊತ್ತ ಪಾವತಿಸಿ ಅಥವಾ ಬ್ಯಾಂಕ್ ಜೊತೆ ಸಮಾಲೋಚನೆ ನಡೆಸಿ ಪರಿಸ್ಥಿತಿಯನ್ನು ಸರಿಪಡಿಸಿಕೊಳ್ಳುವ ಅವಕಾಶ ಹೊಂದಿರುತ್ತಾರೆ.
ತಜ್ಞರ ಪ್ರಕಾರ, EMI ಪಾವತಿಯಲ್ಲಿ ತೊಂದರೆ ಉಂಟಾದ ಕೂಡಲೇ ಬ್ಯಾಂಕ್ನೊಂದಿಗೆ ಸಂಪರ್ಕ ಸಾಧಿಸುವುದು ಮತ್ತು ಸಿಬಿಲ್ ಸ್ಕೋರ್ ಹಾಳಾಗದಂತೆ ನೋಡಿಕೊಳ್ಳುವುದು ಅತ್ಯಂತ ಮುಖ್ಯ. ಏಕೆಂದರೆ ಎನ್ಪಿಎ ದಾಖಲೆಗಳು ಭವಿಷ್ಯದಲ್ಲಿ ಹೊಸ ಸಾಲ ಪಡೆಯುವ ಅವಕಾಶಗಳ ಮೇಲೂ ಪರಿಣಾಮ ಬೀರುತ್ತವೆ.
